Të kultivojmë me mendjemprehtësi interesin gjatë periudhës së festave
1 Në këtë periudhë të vitit, shumë prej atyre që kanë treguar interes për lajmin tonë ka të ngjarë që të jenë të zënë me përgatitjet e festave. Prandaj, në ngjalljen e interesit duhet të përdorim mendjemprehtësi dhe të jemi gati të hidhemi drejt e në temë, me përjashtim kur i zoti i shtëpisë nuk do ta zgjasë bisedën.
2 Vendos qysh më përpara se çfarë do të thuash: Duhet ta kemi gjithmonë të qartë në mendje atë që duam të themi. Kjo kërkon që të rishikojmë shënimet e mbajtura gjatë vizitës së kaluar për të rifreskuar kështu kujtesën mbi pikat që kemi trajtuar dhe mbi pyetjet e mundshme që kemi lënë varur.
3 Nëse kemi ndjekur sugjerimin e dhënë në paragrafin 5 të artikullit të lartpërmendur, herën tjetër mund të themi:
◼ «Në këtë periudhë të vitit shumë vetë mendojnë mbi jetën e Jezuit. Herën e fundit që jemi parë ju premtova se do t’ju flisja mbi një fakt interesant në lidhje me qytetin ku lindi Jezui. A e dinit se Bibla e kish parathënë 700 vjet më parë se Jezui do të lindte në Betlehem?» Lëre të përgjigjet. Pastaj, pasi t’i kesh lexuar Mikean 5:2, mund të thuash: «A s’është një profeci habitëse? Përveç këtij fakti interesant biblik, a e dini se disa profeci biblike po plotësohen pikërisht në ditët tona?» Nëse personi ka kohë mund ta vazhdojmë bisedën. Nëse është i zënë, ne mund të tregohemi të gatshëm për t’u rikthyer e për ta trajtuar këtë aspekt vizitën tjetër.
4 Nëse kemi lënë fletushkën «A do të mbijetojë kjo botë?», mund të themi:
◼ «Shiko se ç’thuhet këtu në faqet 3 dhe 4, në nëntitullin ‘Shenja’. Janë përshkruar disa gjëra që Jezui tha se do të karakterizonin ditët e fundit. [Të shqyrtohen me të zotin e shtëpisë dy ose tri aspekte të profecive.] Sipas jush, a ekzistojnë prova se kjo profeci po vërtetohet sot?» Nëse shikon interes të sinqertë dhe ke kohë, mund të propozosh të shqyrtoni librin Njeriu më i madh. Trego se si kapitulli 111 trajton në mënyrë më të hollësishme shenjën e dhënë prej Jezuit. Nëse lë vetëm fletushkën, gjatë rivizitës mund ta kalosh bisedën në një fletushkë tjetër apo në një broshurë si p.sh. Qeveria që do të vendosë parajsën ose «Shiko! Unë bëj çdo gjë të re.»
5 Si të ofrojmë një studim biblik: Nëse i lëmë të zotit të shtëpisë librin Njeriu më i madh apo nëse ai tashmë e ka atë, do të ishte mirë të tregonim se si mbahet një studim biblik në shtëpi pa pagesë, duke përdorur kapitullin 111. Mund të përdorim të njëjtën metodë që ndjekim gjatë studimit të librit të kongregacionit. Nëse studimi fillon të përparojë, mund ta ndryshojmë botimin e të studiojmë një broshurë tjetër ose drejtpërdrejtë librin Ti mund të jetosh përgjithmonë në parajsë mbi Tokë.
6 Tregohu gjithmonë i përgatitur për të kultivuar interesin e gjetur. Duhet të jemi mendjemprehtë dhe gjithmonë duhet të përpiqemi që ta përgatisim terrenin për një rivizitë duke lënë varur pyetje interesante në fund të çdo bisede. Kjo do të na ndihmojë të jemi «plotësisht të përgatitur për çdo vepër të mirë.»—2 Tim. 3:17.