Pjesëmarrja e rregullt në mbledhje—Thelbësore për të qëndruar të palëkundur
1 Apostulli Pavël na nxiti që të qëndrojmë «të shëndetshëm në besim». (Tit. 1:9, 13, BR) Në mbledhjet e kongregacionit ne konsiderojmë mendime të shëndetshme dhe stërvitemi se si ta mbajmë veten të veshur plotësisht me armaturën frymore, kështu që mund «të qëndrojmë të palëkundur kundër makinacioneve të Djallit».—Efes. 6:11, BR; Filip. 4:8.
2 Mbledhjet na sigurojnë atë ç’ka na nevojitet: Pjesëmarrja e rregullt në mbledhjet e kongregacionit është thelbësore për të qëndruar të palëkundur. (1. Kor. 16:13) Lutjet e ofruara në mbledhje janë për të falënderuar dhe lavdëruar Perëndinë si dhe për t’iu lutur Atij në emër të kongregacionit dhe për nevojat e tij. (Filip. 4:6, 7) Të kënduarit së bashku i këngëve të Mbretërisë na ngre dhe na mundëson që të shprehim ndjenjat dhe emocionet tona, ndërsa adhurojmë Jehovain. (Efes. 5:19, 20) Duke qëndruar bashkë në Sallën e Mbretërisë para dhe pas mbledhjes inkurajohemi, ndërtohemi dhe rifreskohemi.—1. Sel. 5:11.
3 Fjalimi special, i prillit të këtij viti «Fundi i fesë së rreme është afër», nguliti me forcë në mendjet e dashuruesve të së vërtetës se duhet të veprojnë menjëherë për të dalë nga Babilonia e Madhe. (Zbul. 18:4) Sa nxitës ishte zhvillimi i tre artikujve të studimit të Kullës së Rojës gjatë shtatorit dhe tetorit mbi vezullimin e dritës që ka ndriçuar shtegun e të drejtëve! (Prov. 4:18) Të menduarit mbi ato që na mungojnë na bën që të lëmë pas dore pjesëmarrjen në mbledhje.
4 Në kongresin tonë krahinor «Lavdërues të gëzuar» theksi u vendos në nevojën për arsimimin që rrit shërbimin tonë. Siç thekson libri Të organizuar për të kryer shërbimin tonë (angl.) në faqen 72, Shkolla e Shërbimit Teokratik është një masë e marrë për të rritur arsimimin e tërë kongregacionit. Tani, një material i programit na ndihmon që të njihemi më mirë me mësimin praktik të bazuar në librin Të bashkuar. Ne nuk mund të rrezikojmë që të humbim këtë arsimim.
5 Mbledhja jonë për shërbim na pajis që të jemi më të efektshëm. Kjo ishte ilustruar nga mbledhja në të cilën ne morëm udhëzime për të marrë pjesë në shpërndarjen e gjerë të Lajmërim i Mbretërisë nr. 34. Bekimet e Jehovait në këtë vepër ishin të bollshme, siç u pa në rezultatet e jashtëzakonshme ndërkombëtare. (Krahaso 2. Korintasve 9:6, 7.) Ata që morën pjesë rregullisht në mbledhje u inkurajuan dhe ndihmuan për të nxitur mbështetjen që iu dha fushatës.
6 Në studimin e librit të kongregacionit, besimi dhe çmueshmëria jonë për Krijuesin e madh do të rriten me siguri me ndihmën e informacioneve ndërtuese të librit Jeta: Si erdhi ajo këtu? Me evolucion apo me krijim? Ilustrimet e bukura bashkë me shpjegimet e dokumentuara shkencore, do të jenë një mjet praktik për të afruar ata që dëshirojnë të njohin Krijuesin.
7 T’i japim përparësi pjesëmarrjes së rregullt në mbledhje: Në shumë vende, ku vëllezërit tanë po vuajnë, ata akoma e dinë se sa e rëndësishme është të mblidhen së bashku çdo javë. Për shembull, në Burundi, Ruanda, Liberi dhe Bosnjë Hercegovinë, numri i të rinjve që marrin pjesë në mbledhje është dy ose edhe tre herë më i madh se numri i lajmëtarëve. Në këtë mënyrë Jehovai i ndihmon vëllezërit të qëndrojnë të palëkundur në një frymë.—Filip. 1:27; Hebr. 10:23-25.
8 Cilido që mund të ketë lënë pas dore rregullshmërinë e pjesëmarrjes në mbledhje, duhet të marrë hapat tani për të ndrequr këtë prirje. (Eklis. 4:9-12) Me qëllim që të qëndrojmë të palëkundur, kemi nevojë për një marrëdhënie reciproke me persona të pjekur, që sigurohet duke marrë pjesë rregullisht në mbledhje.—Rom. 1:11.