Mbikëqyrës që marrin drejtimin: Mbikëqyrësi i shërbimit
1 Mbikëqyrësi i shërbimit interesohet thellësisht mbi çdo gjë që lidhet me përparimin e veprës ungjillëzuese në territorin që i është caktuar kongregacionit. Pra, ai luan një rol jetësor për të na ndihmuar që të përmbushim përgjegjësinë tonë për të predikuar lajmin e mirë. Gjithashtu si një ungjillëzues i zellshëm, ai merr drejtimin në organizimin e të gjitha çështjeve që lidhen me shërbimin. Si një mësues i aftë, ai ndihmon lajmëtarë të veçantë që të përmirësojnë efektshmërinë e tyre në shërbim.—Efes. 4:11, 12.
2 Ky plak mbikëqyr drejtpërdrejt punën e shërbëtorëve ndihmës, të caktuar për t’u marrë me literaturën, revistat dhe territoret. Ai është përgjegjës për t’u siguruar se çdo muaj, është në dispozicion për t’u përdorur një sasi e mjaftueshme literature, revistash dhe formularësh shërbimi. Një herë në vit, ai rishikon skedën e territorit, për të gjitha ato adresa shtëpish që jemi këshilluar të mos i vizitojmë dhe cakton vëllezër të kualifikuar që të bëjnë një vizitë në to.
3 Mbikëqyrësi i shërbimit është përgjegjës për të mbikëqyrur mënyrat e ndryshme të të predikuarit, duke përfshirë dëshminë në qendrat tregtare, në rrugë dhe me telefon. Ai është vigjilent që të organizojë rregullime praktike të përshtatshme për shërbim gjatë javës, duke përfshirë edhe ditët e pushimit. Ai tregon interes të sinqertë për aspektin e studimeve biblike. Po ashtu ai kërkon mënyra për t’u dhënë mbështetje frymore atyre që bëhen të parregullt ose joaktivë në shërbim. Gjithashtu, interesohet në mënyrë aktive rreth veprës së pionierëve dhe mbikëqyr programin Pionierët ndihmojnë të tjerët.
4 Si anëtar i Komitetit të Shërbimit të Kongregacionit, mbikëqyrësi i shërbimit propozon çdo rregullim të nevojshëm në grupet e Studimit të Librit të Kongregacionit. Kur ai viziton grupin tënd, sigurohu që të jesh i pranishëm dhe të marrësh pjesë me të në shërbimin në fushë.
5 Të gjithë në kongregacion duhet të bashkëpunojnë me gatishmëri sipas drejtimit të dhënë nga mbikëqyrësi i shërbimit. Kjo gjë do të na ndihmojë që të rritim efektshmërinë tonë në veprën e bërjes së dishepujve dhe të gjejmë gëzim më të madh në shërbimin tonë.