Si mund t’u vijmë në ndihmë të pranishmëve në Përkujtim?
1. Ç’dëshmi e fuqishme do të jepet më 22 mars 2008?
1 Më 22 mars 2008, miliona njerëz anembanë botës do të marrin një dëshmi të fuqishme. Ata që do të vijnë në Përkujtim do të dëgjojnë për dashurinë e madhe të Jehovait që dha një shpërblesë për njerëzimin. (Gjoni 3:16) Do të mësojnë për Mbretërinë dhe se si do ta përdorë Jehovai atë për të përmbushur qëllimin e tij për tokën. (Mat. 6:9, 10) Do të shohin me sytë e tyre dashurinë dhe unitetin e popullit të Perëndisë dhe do të provojnë mikpritjen tonë të ngrohtë.—Psal. 133:1.
2. Si mund t’u vijmë në ndihmë studentëve të Biblës që vijnë në Përkujtim?
2 Studentët e Biblës: Disa nga të pranishmit do të jenë ata që sapo kanë filluar të studiojnë Biblën. Prezantojini me vëllezërit e motrat. Shpjegojuni për mbledhjet javore dhe bëjuni një vizitë të shkurtër të Sallës së Mbretërisë. Gjatë fjalimit, oratori do t’i inkurajojë të vazhdojnë të rriten nga ana frymore. Mund të përdorni komentet e tij si bazë për të inkurajuar studentët.
3. Çfarë mund të bëhet për t’i inkurajuar lajmëtarët joaktivë që vijnë në Përkujtim?
3 Lajmëtarët joaktivë: Ndër të pranishmit do të ketë edhe nga ata që janë lajmëtarë joaktivë. Merrni iniciativën dhe përshëndetini ngrohtë. Mos u bëni pyetje personale ose mos u thoni gjëra që mund t’i vënë në siklet. Pak kohë pas Përkujtimit pleqtë duhet të vizitojnë çdo lajmëtar joaktiv që vjen në Përkujtim, ta lavdërojnë që ishte i pranishëm dhe me ngrohtësi ta ftojnë në mbledhjen e ardhshme të kongregacionit.
4. Si mund t’i ndihmojë secili prej nesh vizitorët?
4 Vizitorët: Në Përkujtim mund të vijnë edhe të njohur ose pjesëtarë të familjes që i kemi ftuar personalisht. Ose mund të ketë nga ata që kanë marrë ftesën gjatë fushatës speciale. Nëse shihni ndonjë që nuk e njihni, merrni iniciativën të prezantoheni dhe t’i uroni mirëseardhjen. Ndoshta nuk kanë qenë asnjëherë në mbledhjet tona. Gjatë bisedës mund të gjeni mënyrën për t’i kontaktuar përsëri. Duke u bërë një vizitë të shkurtër ose një telefonatë të shkurtër pak ditë pas Përkujtimit, mund të përpiqeni t’u rritni edhe më shumë interesin dhe t’u ofroni një studim biblik.
5. Çfarë mund të themi për të filluar një studim biblik?
5 Informacioni i fjalimit të Përkujtimit mund të përdoret gjatë rivizitës si bazë për prezantimin e librit Çfarë mëson vërtet Bibla? Për shembull, ai që do të mbajë fjalimin e Përkujtimit do të lexojë Isainë 65:21-23. Kur t’i vizitoni, mund të përmendni fjalimin dhe të thoni: «Më lejoni t’ju tregoj edhe bekime të tjera që do të kemi nga shpërblesa.» Pastaj shqyrtoni faqet 4 dhe 5 të librit Çfarë mëson vërtet Bibla? Ose mund të thoni: «Shumë pyesin se kur do të përmbushet profecia e Isaisë.» Pastaj shqyrtoni paragrafët 1-3 në kapitullin 9. Ose mund t’i referoheni thjesht asaj që tha oratori gjatë Përkujtimit, të prezantoni librin Çfarë mëson vërtet Bibla? dhe të demonstroni se si bëhet një studim.
6. Çfarë mundësish kemi ndërsa i bindemi urdhrit të Jezuit për të përkujtuar vdekjen e tij?
6 Qofshim të gjithë syçelë ndaj mundësive për të ndihmuar studentët e Biblës, lajmëtarët joaktivë dhe vizitorët që do të vijnë në Përkujtim! (Luka 22:19) Me siguri, Jehovai do të na bekojë për çdo përpjekje që shtojmë në shërbim të Mbretërisë.