Shkolla e Shërbimit Teokratik për vitin 2015 na ndihmon të bëhemi mësues më të mirë

¹ Psalmisti David shkroi: «Fjalët e gojës sime dhe meditimi i zemrës sime, qofshin të këndshme para teje, O Jehova, Shkëmbi im, Shpenguesi im!» (Psal. 19:14) Edhe ne duam që fjalët tona të jenë të këndshme për Jehovain sepse e çmojmë si thesar privilegjin për të shpallur të vërtetën në kongregacion dhe në shërbim. Shkolla e Shërbimit Teokratik është një nga mënyrat si na stërvit Jehovai për shërbimin. Kjo stërvitje bëhet në më se 111.000 kongregacionet në mbarë botën. Ajo i ka ndihmuar vëllezërit e motrat nga të gjitha vendet, shtresat e prejardhjet që të jenë të kualifikuar si lajmëtarë të lajmit të mirë, të aftë për të mësuar me bindje, takt e guxim.​—Vep. 19:8; Kolos. 4:6.

² Në programin e shkollës për vitin 2015 do të përfshihen tema nga broshura Fillojmë të njohim Fjalën e Perëndisë, si edhe materiale nga Të fitojmë gjykim të thellë nga Shkrimet. Për më tepër, janë bërë ndryshime në kohën e caktuar për pikat kryesore nga Bibla dhe për caktimin nr. 1. Këto ndryshime dhe udhëzimet si do të mbahen pjesët e shkollës do të shqyrtohen në paragrafët e mëposhtëm.

³ Pikat kryesore: Vëllezërit e caktuar për këtë pjesë do të kenë dy minuta në dispozicion për të shqyrtuar një pikë interesante dhe praktike nga leximi javor i Biblës. Nëse përgatitet mirë, ai do të mund të ndajë me kongregacionin një pikë me vlerë brenda kohës së caktuar. Më pas, kongregacioni do të ketë ashtu si më parë gjashtë minuta për të bërë komente për 30 sekonda a më pak për pika interesante që kanë gjetur gjatë leximit javor të Biblës. Kërkohet përgatitje dhe vetëdisiplinë për të bërë një koment domethënës brenda 30 sekondave, por kjo është stërvitje e mirë për ne. Gjithashtu u jep mundësi edhe të tjerëve të komentojnë për atë që kanë mësuar gjatë kërkimeve të tyre.

⁴ Caktimi nr. 1: Koha e caktuar për leximin e Biblës është reduktuar në tre minuta ose më pak dhe do të lexohen më pak vargje. Ata që caktohen të bëjnë leximin duhet të bëjnë disa prova duke lexuar me zë dhe duke i kushtuar vëmendje shqiptimit të saktë dhe rrjedhshmërisë që t’i përcjellin mendimet në mënyrë të kuptueshme. I gjithë populli i Jehovait duhet të përpiqet fort të lexojë mirë, meqë leximi luan një rol të rëndësishëm në adhurimin tonë. Sa të kënaqur jemi që shumë nga fëmijët tanë lexojnë mirë. Prindërit janë për t’u lavdëruar që i kanë ndihmuar me dashuri fëmijët në këtë aspekt.

⁵ Caktimi nr. 2: Do të jetë një prezantim prej pesë minutash që do të mbahet nga një motër. Duhet përdorur tema e caktuar. Kur një caktim bazohet te broshura Fillojmë të njohim Fjalën e Perëndisë, duhet zbatuar në një mënyrë reale dhe praktike për territorin. Kur tema e pjesës flet për një personazh biblik nga Të fitojmë gjykim të thellë nga Shkrimet, studentja duhet të bazohet te materiali që gjendet nën emrin e personazhit biblik, të zgjedhë shkrime të përshtatshme dhe të tregojë çfarë mësimi nxjerrim nga ai personazh. Studentja mund të përfshijë edhe shkrime të tjera që lidhen me temën. Ndihmësen për pjesën e cakton mbikëqyrësi i shkollës.

⁶ Caktimi nr. 3: Do të jetë një pjesë prej pesë minutash që do t’i caktohet një vëllai ose një motre. Kur i caktohet një motre, duhet bërë siç sugjerohet për caktimin nr. 2. Ndërsa kur i caktohet një vëllai, materiali i bazuar te libri Gjykim i thellë duhet të paraqitet në formë fjalimi duke mbajtur parasysh auditorin. Studenti duhet të zhvillojë temën që i është caktuar, të zgjedhë shkrime të përshtatshme e të tregojë se çfarë mund të mësohet nga shembulli i personazhit biblik që po shqyrton.

⁷ Një veçori e re e caktimit nr. 3 për vëllezërit: Kur si burim materiali është broshura Fillojmë të njohim Fjalën e Perëndisë, duhet paraqitur si demonstrim i një adhurimi familjar ose i dëshmisë në shërbim. Ndihmësin dhe rrethanën zakonisht i cakton mbikëqyrësi i shkollës. Ndihmësi duhet të jetë pjesëtar i familjes së studentit ose një vëlla në kongregacion. Mund të përfshihen edhe shkrime të tjera të cilat theksojnë parime biblike që lidhen me temën. Herë pas here kjo pjesë mund t’i caktohet një plaku. Pleqtë mund ta zgjedhin vetë ndihmësin dhe rrethanën. Do të jetë pa dyshim inkurajuese për kongregacionin të shohë pleqtë teksa demonstrojnë artin e mësimdhënies me një pjesëtar të familjes ose me një vëlla tjetër.

⁸ Këshilla: Pas pjesës së çdo studenti, mbikëqyrësi i shkollës do të ketë në dispozicion dy minuta për t’i dhënë lavdërime dhe këshilla ndërtuese të bazuara te libri Të nxjerrim dobi nga arsimimi në Shkollën e Shërbimit Teokratik. Kur mbikëqyrësi i shkollës të prezantojë pjesën e studentit, nuk do ta përmendë pikën me të cilën po punon ai. Pas çdo pjese, mbikëqyrësi duhet t’i japë studentit lavdërime të sinqerta, të njoftojë pikën me të cilën po punon dhe të thotë pse e bëri mirë ose të shpjegojë me takt pse do të ishte mirë që t’i kushtonte vëmendje të mëtejshme asaj pike.

⁹ Fleta e këshillave për studentin gjendet te faqet 79 deri 81 të librit të tij Shkolla e Shërbimit. Pasi ai të mbarojë pjesën, mbikëqyrësi i shkollës do të bëjë shënimet e duhura në librin e studentit dhe do ta pyesë më vete nëse e ka bërë ushtrimin për pikën që i ishte caktuar. Studentit mund t’i jepen edhe lavdërime e sugjerime të tjera pas mbledhjes ose në një moment tjetër. Vëmendja që i kushtohet çdo studenti në shkollë duhet konsideruar si mundësi për ta ndihmuar të përparojë frymësisht.​—1 Tim. 4:15.

¹⁰ Nëse studenti e kalon kohën e lejuar, mbikëqyrësi i shkollës ose ndihmësi duhet të jetë i vëmendshëm që të japë një sinjal, për shembull me anë të një zileje ose të një trokitjeje të lehtë në tavolinë, për t’i treguar studentit me takt se koha mbaroi. Studenti duhet t’ia vërë veshin sinjalit, të përfundojë fjalinë e të largohet nga podiumi.​—Shih librin Shkolla e Shërbimit, f. 282, p. 4.

¹¹ Të gjithë ata që plotësojnë kërkesat janë të inkurajuar të regjistrohen në Shkollën e Shërbimit Teokratik. (Shih librin Shkolla e Shërbimit, f. 282, p. 6.) Arsimimi që siguron kjo shkollë e ka ndihmuar popullin e Jehovait të predikojë dhe t’u mësojë të tjerëve lajmin e mirë të Mbretërisë me bindje, dinjitet dhe dashuri. Pa dyshim, Jehovai kënaqet kur lëvdohet nga ata që po nxjerrin kaq shumë dobi nga arsimimi teokratik.​—Psal. 148:12, 13; Isa. 50:4.