Bekimi i Jehovait na bën të pasur
1 Shpesh suksesi i një personi matet nga ajo se sa e madhe është paga e tij. Ja pse shumë njerëz mendojnë se ata që kanë para janë personat më të lumtur e më të kënaqur. Por, mjerisht, njerëzit që mendojnë se lumturia mund të blihet me para, gabojnë. (Ekl. 5:12) Nuk ka gëzim të përhershëm për ata që janë «të vendosur për të qenë të pasur» nga ana materiale. (1 Tim. 6:9) Në kontrast me këtë, shërbëtorët e Jehovait janë me të vërtetë të lumtur dhe janë njerëzit më të pasur në botë. (Prov. 10:22; Zbul. 2:9) Si kështu?
2 Dëshmi të pasurisë sonë: Ne zotërojmë mendjehollësi të pasur frymore dhe një kuptueshmëri për Fjalën e Perëndisë, Biblën. Nëpërmjet organizatës së tij tokësore, Jehovai na mëson vazhdimisht lidhur me veten dhe Birin e tij, për dobinë tonë të përhershme. Kuptueshmëria e saktë na jep mundësi që të afrohemi me Jehovain dhe të gëzojmë një marrëdhënie të ngushtë me të. (Jak. 4:8) Fakti që dallojmë të mirën nga e keqja dhe ndjekim ligjet e Perëndisë, na mbron nga disa sëmundje dhe rreziqe. Ne jemi të sigurt se Jehovai do të na sigurojë gjërat e nevojshme, duke na sjellë si rezultat kënaqësi hyjnore dhe paqe mendore.—Mat. 6:33.
3 Ne gëzojmë paqe dhe unitet brenda vëllazërisë sonë frymore, sepse kultivojmë frytet e frymës së Perëndisë. Të bashkuar nga një lidhje e fortë dashurie, s’kemi pse të ndihemi kurrë të braktisur nga Perëndia ose nga vëllezërit kur përballojmë katastrofa.—Gal. 6:10.
4 Jeta jonë ka një domethënie dhe qëllim të vërtetë. Ne e konsiderojmë një privilegj të mrekullueshëm faktin që marrim pjesë në predikimin global të lajmit të mirë. Kjo gjë sjell një gëzim të përhershëm, ndërsa i ndihmojmë të tjerët që të hyjnë në një marrëdhënie të mirë me Perëndinë dhe të shërbejnë në unitet me ne në adhurimin e pastër. Thesari ynë i paçmuar i shërbimit i sjell nderim Jehovait, ndërsa neve na jep kënaqësi për faktin se kontribuojmë për shenjtërimin e emrit të tij. Mbajmë një qëndrim mendor pozitiv, duke ditur se shpresa jonë për të ardhmen do të realizohet së shpejti.
5 Të tregojmë çmueshmërinë tonë: Le t’i çmojmë gjithmonë bekimet e Jehovait, të cilat na bëjnë me të vërtetë njerëzit më të pasur në tokë! (Prov. 22:4) Duke lënë mënjanë kohë çdo ditë për të medituar rreth asaj që kemi, nxitemi që ta falënderojmë Jehovain për dashurinë e tij bujare si edhe që të vazhdojmë t’i japim devocionin tonë ekskluziv.