Dee soni dee Maikusi sikifi

14 A bi fika tu daka, nöö de bi o hoi di Pasika piizii, ku di piizii u di bëëë söndö sooda. Hën dee fesima u dee begima ku dee sabima u Wëti bi ta suku wan fasi u de kii Jesosi. 2 Biga de bi ta taki da de na de taa: „Wa musu du ën a di Pasika piizii, ee nasö dee sëmbë u di köndë sa bigi ligei.”

3 Di Jesosi bi dë a di köndë de kai Betania, nöö a bi go njan a di wosu u Simön. Di womi aki bi abi kököbë. Hën wan mujëë ko dë ku wan bata ku wan gaan dii sumëësuti fatu nëën dendu, hën a jabi di bata, hën a tutu di fatu a Jesosi hedi. 4 Di so u dee bakama u Jesosi si andi di mujëë du, hën hati u de boonu, hën de taa: „Faandi mbei a poi di sumëësuti fatu dë? 5 U bi sa sei ën möön leki 300 soofu möni,* nöö u tei di möni dë paati da dee pootima!” Hati u de bi boonu ku* di mujëë seei. 6 Ma Jesosi piki de taa: „Un disa di mujëë e. Faandi mbei un ta kuutu di mujëë u du? Wan bumbuu soni a du da mi. 7 Biga dee pootima o dë aki nöömö fuun ta sölugu, nöö un sa du bunu da de hiniwan ten, ma mi ma o dë ku unu aki hii juu. 8 Di mujëë aki du hii soni di a bi sa du da mi. A tutu sumëësuti fatu a mi sinkii u seeka mi a fesi da di bei di de o bei mi. 9 Mi taki da unu e, a hii kamian u goonliba ka de o ta konda di bunu buka kaa, de o ta konda di bunu di di mujëë aki du da mi tu. Sëmbë an o fëëkëtëën möönsö.”

10 Hën wan u dee tuwalufu apösutu fëën di de ta kai Judasi Isikaliötu go a dee fesima u dee begima. Hën a go piki de taa a sa heepi de u de kisi Jesosi. 11 Di de jei a taki sö, nöö hën de wai, hën de paamusi ën taa de o dëën soofu möni. Hën a bigi ta suku wan fasi nöömö faa sei Jesosi.

12 A di fosu daka u di piizii u bëëë söndö sooda, de bi abi di guwenti u de ta kii wan mbeti u de njan a di Pasika piizii. Hën dee bakama u Jesosi piki ën taa: „Naasë i kë fuu go seeka kamian fuu hoi di Pasika piizii?” 13 Hën a piki tu u dee bakama fëën taa: „Un go a Jelusalën, nöö wan womi di ta tja wata a wan djogu o ko miti unu. Un faakëën, 14 nöö te un si taa a denda a wan wosu, nöö un fan ku di sëmbë di abi di wosu, nöö un piki ën taa: „Di Mësitë taki e: ’Na un kamba mi ku dee bakama u mi sa hoi di Pasika piizii?’” 15 Nöö a o lei unu wan gaan kamba a di wosu a liba, ka hii soni dë di u abi fanöudu. Nöö un seeka soni fuu hoi di Pasika naandë.” 16 Hën dee bakama fëën go, hën de go dou a Jelusalën, hën hii soni pasa leti kumafa Jesosi bi piki de, hën de seeka soni u de hoi di Pasika piizii.

17 A di ndeti buka, hën Jesosi ku dee tuwalufu apösutu fëën go dou a di kamba. 18 Di de bi sai dë ta njan a tafa, hën a piki de taa: „Mi taki da unu e, wan fuunu aki o tjaam’ go sei.” 19 Hën a hati de te na soni. Nöö hën hiniwan u de ta hakisi ën taa: „A sa kë mi ö?” 20 Hën a piki de taa: „Wan fuunu di mi ku ën ta munjan bëëë a di wan kodo paabi aki, hën wë o sei mi sö e. 21 Di sëmbë di ko dë Libisëmbë Miii o go disa unu, leti kumafa de bi sikifi soni fëën a fesi kaa. Ma helu da di sëmbë di o sei di sëmbë di ko dë Libisëmbë Miii! A bi o möön bëtë de an bi pai ën ko a goonliba aki.”

22 Di de bi dë ta njan, hën a tei wan bëëë. A da Gadu tangi te a kaba, hën a booko ën tëndë da dee bakama fëën, hën a taa: „Un tei di bëëë aki. A kë taki di sinkii u mi.” 23 Baka di dë, hën a tei wan kan ku win a dendu, hën a da Gadu tangi, hën a tëndëën da dee bakama fëën, hën hii de tuu bebe. 24 Hën a taa: „Di win aki kë taki di ’buuu’ u mi di mi o tuwë a goon u Gadu sa mbei wan ’njunjun buka’ ku libisëmbë, nöö sömëni sëmbë o feni wini fëën. 25 Ma mi taki e, ma o bebe di win aki möön u te di daka o dou ka mi o bebe di njunjun win a di Tii u Gadu.” 26 Baka di de kanda gafa Gadu, hën de go a di Olëifi Kuun.

27 Hën Jesosi piki de taa: „Hii unu tuu o kule go disa mi te woon si andi o pasa ku mi. Biga a bi sikifi a Gadu Buku taa: ’De o fon di sëmbë di ta luku dee sikapu, nöö hii dee sikapu o kule paaja fanjanfanjan.’ 28 Ma te mi o weki ko a libi baka, nöö mi o go a Galilea go dë ta wakiti unu.” 29 Hën Petuisi piki ën taa: „Aluwasi hii dee wotowan aki tuu go disa i, ma o go disa i möönsö.” 30 Hën Jesosi piki ën taa: „Mi taki e, a di ndeti aki seei ufö ganian kanda dou tu pasi, joo fia dii pasi taa ja sabi mi.” 31 Ma Petuisi bi ta taki nöömö taa: „Aluwasi ee mi ku i musu dëdë makandi seei, tökuseei ma o fia möönsö taa ma sabi i.” Nöö sö nöö hii dee woto bakama seei taki tu.

32 Di de go dou a di djai de kai Gëtiseimani, hën Jesosi piki dee bakama fëën taa: „Un sindo aki ufö, nöö mi o go begi.” 33 Di a nango, hën a tja Petuisi, Jakobosi ku Johanisi go ku ën. A bigi ta tjali gaanfa seei. Na piki hebi a bi hebi dëën. 34 Hën a piki de taa: „Fuka ku tjali fuu mi hati tee kuma a sa tja dëdë kii mi. Un fika aki, nöö un dë ku wojo.” 35 Di a waka go a fesi pikisö möön, hën a tjökö kini a goon bendi hedi, hën a begi Gadu hakisi ën taa ee a sa, nöö be an tja di sitaafu möön. 36 A taa: „Abba,* Taata o, mi sabi taa i sa du hii soni. Di soni di i lai a di kan da mi u mi bebe aki, nöö mi begi i i puu ën dam’ baa. Ma nöö fa mi fan aki seei, na du di soni di mi kë e, ma be a pasa kumafa i kë.” 37 Hën Jesosi toona go a dee dii bakama fëën, nöö hën a si taa de ta duumi. Hën a taki da Petuisi taa: „Simön, i ta duumi nö? Wan bi sa dë ku wojo wan kodo juu langa seei nö? 38 Un musu ta dë ku wojo ta begi nöömö fu soni an ganjan unu fuun go du soni di an bunu. Ma mi sabi taa hati fuunu kë du kumafa a fiti, ma sinkii fuunu an taanga sö.” 39 Hën a toona go begi baka. Nöö a toona taki di wan seei soni. 40 Di a toona go a dee dii bakama fëën, hën a si taa de ta duumi. Duumi nöö bi ta kii de sö. De an bi saandi de musu piki ën. 41 Hën a toona ko di u dii pasi, hën a piki de taa: „Faandi mbei un ta duumi sö a di lö ten aki? A tjika! Di juu dou u de sei di sëmbë di ko dë Libisëmbë Miii da dee hogiduma. 42 Un hopo boo go. Di sëmbë di o sei mi dou kaa.”

43 Jesosi an bi kaba u fan seei, hën Judasi, di bi dë wan u dee tuwalufu apösutu bi waka ko dou naandë ku wanlö gaan hia sëmbë. De ko ku ufangi ku kodjo a maun. Dee fesima u dee begima ku dee sabima u Wëti ku dee gaanwomi u köndë bi manda de. 44 Di sëmbë di bi o sei Jesosi bi da de wan maaka. A bi piki de taa: „Di sëmbë di mi o bosi,* hën da di sëmbë di un musu kisi tja go. Un musu panjëën taanga, fu an sa kule go.” 45 Hën a waka go a Jesosi wante, hën a taa: „Mësitë!” Hën a bosi ën. 46 Hën dee sëmbë ko kisi Jesosi panjan gingin u de tja go. 47 Nöö hën wan u dee sëmbë dee bi sai dë hai di ufangi fëën valau, hën a koti di jesi u di saafu u di gaan begima belim puu. 48 Hën Jesosi piki dee sëmbë dee bi sai dë taa: „Faandi mbei un ko a mi aki ku kodjo ku ufangi fuun ko kisi mi kuma mi da fufuuma? 49 Hiniwan juu mi bi ta dë a di Wosu u Gadu ta lei sëmbë soni, ma tökuseei wan bi kisi mi. Ma hii dee soni aki ta pasa sö taa dee soni di dee tjabukama bi sikifi sa pasa tuutuu.”

50 Di a taki sö, hën hii dee bakama fëën tuu kule go disëën fiaa. 51 Ma nöö wan kijoo bi dë ta waka nëën baka. A bi dë ku wan gaan dii koosu nëën sinkii. Nöö di dee felantima tuwë maun u kisi ën, 52 hën a disa di koosu fëën a de maun, hën a kule go söndö lai a sinkii.*

53 Hën de tja Jesosi go a di gaan begima, hën hii dee fesima u dee begima ku dee gaanwomi ku dee sabima u Wëti tuu hai ko makandi naandë. 54 Ma Petuisi bi dë te a baka ta waka a Jesosi baka nöömö, te go dou a di djai dendu u di gaan begima. Hën a go sindo ku dee sëmbë dee bi ta wooko a di wosu, nöö a bi dë ta këndë faja. 55 A di juu dë, hën dee fesima u dee begima ku hii dee kuutuma u di Gaan kuutuwosu u dee Dju bi ta suku sëmbë u tja kaagi u Jesosi ko a fesi, u de sa feni ën kii. 56 Sömëni sëmbë bi ta mindi soni dëën, ma hii dee sëmbë bi ta taki tookatooka soni. 57 Wantu u dee sëmbë bi hopo taanpu, hën de taki taa: 58 „Ku useei jesi u jei a ta taki taa: ’Mi o booko di Wosu u Gadu di libisëmbë bi mbei tuwë a goon, nöö a dii daka dendu mi o mbei wan wotowan, ma na ku libisëmbë maun.’” 59 Ma na wan u dee soni di dee sëmbë bi ta taki aki bi ta kai a wan möönsö.

60 Di di gaan begima jei di soni dë, hën a hopo taanpu, hën a hakisi Jesosi taa: „Ja ta jei andi dee womi aki ta taki fii ö? Ja ta piki nö?” 61 Ma Jesosi an jabi buka piki möönsö. Hën di gaan begima hakisi ën taa: „Ju da di Keesitu ö? Ju da di Mii u di Möön Hei Gadu ö?” 62 Hën Jesosi taa: „Aai, sö a dë. Joo si di sëmbë di ko dë Libisëmbë Miii dë sindosindo a di letisë maun u di makiti Gadu, nöö a o kumutu a liba ala ta saka ta ko ku dee bundji.” 63 Hën di gaan begima hai di koosu fëën tënë, hën a taa: „An dë fuu go suku kotoigi möön. 64 Unuseei jei fa a wisiwasi Gadu. Andi u musu du ku ën?” Hën hii dee sëmbë piki taa a musu dëdë.” 65 Hën so u de bigi tunta nëën, hën de tapëën fesi ku wan koosu, hën de naki ën böö njanjan. De bi ta taki taa: „Ee i da wan tjabukama u Gadu tuutuu, nöö piki u ambë naki i dë!” Hën dee sodati naki ën baaimaun a bandjajesi, hën de tjëën go.

66 Di Petuisi bi dë a di djai dendu a goon ala, hën wan u dee mujëë mii di bi dë wan saafu a di wosu u di gaan begima ko nëën. 67 Di a si Petuisi dë ta këndë faja, hën a luku ën diiin, hën a taa: „Di womi dë, iseei bi ta dë makandi ku Jesosi, di womi u Nazalëti.” 68 Ma a fia taa: „Ma sabi di womi dë e, ma saandi i ta taki dë seei.” Hën a kumutu go taanpu zuntu ku di djai dööbuka. 69 Hën di mujëë mii toona si ën möön, hën a piki dee sëmbë dee bi sai dë taa: „Di womi aki da wan u dee bakama fëën e.” 70 Hën a toona fia möön. Hën te wan pisi, hën dee sëmbë dee bi dë taanputaanpu dë piki Petuisi taa: „An dë fii pena fia taa ja dë sëmbë u di womi dë e. Biga i da wan Galilea sëmbë.” 71 Hën Petuisi taa: „Mi ta soi a Gadu fesi taa ma sabi di womi dë wan daka, kwetikweti!” 72 Hën wantewante dë wan ganian bai kanda di u tu pasi. Nöö hën Petuisi ko mëni di fan di Jesosi bi fan ku ën taa: „Ufö ganian kanda dou tu pasi, joo fia dii pasi taa ja sabi mi.” Hën a bai këë te a bigi.