Dee soni dee Mateosi sikifi

17 Baka sikisi daka, hën Jesosi tei Petuisi, Jakobosi ku hën baaa Johanisi, hën de subi go a wan hei kuun liba. 2 Hën de sai dë te wan pisi, hën Jesosi ko tooka a de wojo seei. Fesi fëën ko ta koti faja kuma sonu, nöö dee koosu nëën sinkii ko weti faan. 3 Hën de si Mosesi ku Elia ko ta fan ku Jesosi. 4 Hën Petuisi piki Jesosi taa: „Masa o, a bunu fa u ko aki e. Ee i kë, nöö mi sa mbei dii tjëkëliba buta aki. Wan u fii, wan u Mosesi ku wan u Elia.” 5 An bi kaba u fan seei, hën wan gaan limbo bundji saka ko tapa de buuu. Hën de jei wan töngö ta fan a di bundji dendu. A taa: „Di lobi Womi Mii u mi hën disi. Libi fëën ta kai ku mi. Nöö hën fuun ta haika e.” 6 Fa dee bakama u Jesosi jei di töngö dë, hën de fëëë tee de tjökö kini a goon bendi hedi. 7 Hën Jesosi waka go panjan de, hën a taa: „Un hopo, wan fëëë.” 8 Di de hopo hedi luku, hën Jesosi wanwan de si. 9 Di de ta bazia di kuun, hën Jesosi piki de taa: „Wan musu konda dee soni dee un si* a di kuun liba da na wan sëmbë e, u te kuma di sëmbë di ko dë Libisëmbë Miii dëdë toona weki baka.”

10 Hën dee bakama fëën hakisi ën taa: „Faandi mbei dee sabima u Wëti ta taki taa Elia hën musu ko ufö di Keesitu?” 11 Hën a piki de taa: „Elia o ko tuu, nöö a o seeka hii soni ko bunu baka. 12 Ma nöö mi taki da unu taa Elia ko kaa, ma de an si ën sabi. Hën de du ku ën kumafa de kë. Sö nöö de o du ku di sëmbë di ko dë Libisëmbë Miii.” 13 Hën dee bakama fëën ko fusutan taa soni u Johanisi di Dopuma a bi ta taki dë.

14 Di de dou ka wanlö gaan hia sëmbë bi dë, hën wan womi ko tjökö kini nëën fesi, hën a taa: 15 „Masa o, abi tjalihati u wan womi mii u mi aki baa. Piki mii siki dë ku ën, nöö a ta fukëën seei. So juu a ta naki ën tuwë a faja, nöö so juu a ta tuwëën a wata. 16 Mi tjëën ko da dee bakama fii, ma de an bi sa kulëën.” 17 Hën Jesosi piki ën taa: „Ee! Aai baa, un dee takulibima u di ten aki. Faandi mbei wan ta biibi möönsö? Un longi mi musu dë ku unu aki ta hoi pasensi da unu? Un tja di mii ko a mi aki.” 18 Hën Jesosi jaka di taku soni di bi dë a di mii liba, hën wantewante dë hën di mii ko bëtë. 19 Hën dee bakama u Jesosi kai ën ko a së, hën de hakisi ën taa: „Unfa a waka taa wa bi sa puu di taku soni a di mii liba?” 20 Hën a piki de taa: „U di wan ta biibi tjika. Mi taki da unu taa ee un abi wan piki biibi kuma di sii de kai mutaadi, nöö woon sa taki da di kuun aki taa be a hopo kumutu dë, nöö a o kumutu dë. Nöö soni an o dë di wan o sa du.” 21*⁠——

22 Di de bi dë makandi a Galilea, hën Jesosi piki de taa: „Wan daka de o buta di sëmbë di ko dë Libisëmbë Miii a dee felantima fëën maun, 23 nöö de o kii ën. Ma a di u dii daka fëën, a o toona weki baka.” Di a taki sö, hën de tjali te na soni.

24 Di de dou a Kapënaumi, hën dee womi dee bi ta pii möni da di Wosu u Gadu ko a Petuisi, hën de hakisi ën taa: „Di Mësitë fuunu an ta paka di möni* di sëmbë musu ta paka da di Wosu u Gadu nö?” 25 Hën a taa: „Aai o, a ta paka.” Ma di Petuisi go a wosu, hën wantewante Jesosi hakisi ën taa: „Simön,* unfa ii pakisei? Fa dee könu u di goonliba aki ta pii lantimöni, nöö na ambë de ta pii ën? A dee mii u de, naa a dee sëmbë dee an dë a di könu famii?” 26 Hën a taa: „Wë a dee sëmbë dee an dë a di könu famii.” Nöö hën Jesosi taa: „Wë hën da an dë u dee mii u di könu seei musu paka, na sö nö? 27 Ma u di wa kë u hati u de boonu, nöö boo paka de nöö. Tei di huku fii nöö i go a huku. Nöö di fosu fisi di joo kisi, nöö i jabi ën buka luku, nöö joo si wan soofu möni* nëën dendu, nöö i tei ën tja go paka u mi ku i.”