Dee soni dee Mateosi sikifi
13 A di daka dë Jesosi kumutu a di wosu, hën a go sindo a di ze bandja. 2 Hën wanlö gaan hia sëmbë bi ko nëën, hën a go sindo a wan boto dendu, nöö dee hia sëmbë bi dë a tela liba ta haikëën. 3 Hën a konda sömëni woto da de u lei de soni. A bi piki de taa: „Wan goonma bi nango jaa wanlö sii fëën. 4 So u dee sii kai a bandja pasi, hën dee fou ko njan de. 5 So u dee sii kai a sitonu kamian ka hia doti an dë, nöö hën de nasi hesi seei. 6 Ma di di sonu ko hati taanga, hën de dëë kaba a sösö, u di lutu u de an bi go fundu a goonbasu. 7 So u dee sii kai a maka dendu, hën de nasi. Ma nöö hën di maka göö peeta de te de an ko soni möönsö. 8 Nöö so u dee sii kai a bunu doti, hën de ko soni seei. So u de pai 100 toon möön hia möön fa de bi paandi. Wotowan pai 60 toon möön hia, nöö wotowan pai 30 toon möön hia. 9 Be di sëmbë di jei dee soni aki, go kai pakisei a de.”
10 Hën dee bakama fëën ko nëën, hën de hakisi ën taa: „Faandi mbei i ta konda woto da de u lei de soni?” 11 Hën Jesosi piki de taa: „Unu Gadu heepi fuun ko fusutan dee tjubitjubi woto di nama ku di Tii fëën di dë a liba ala, ma de de an ta fusutan de e, u di Gadu an heepi de. 12 Wan sëmbë di ta fusutan soni, o ko möön fusutan soni. Nöö te wan pisi, a o ko ta fusutan soni seei gbelingbelin. Ma wan sëmbë di an ta fusutan soni, nöö di pikiwan di a ta fusutan seei, Gadu o puu ën nëën. 13 De ta luku, ma de an ta si soni. De ta jei, ma de an ta fusutan di soni di de ta jei. Fëën mbei mi ta konda woto da de u lei de soni. 14 Di tjabukama Jesaaja bi taki u de taa: ’Woon ta si soni ku unu wojo, ma wan o saandi un ta si. Woon ta jei soni ku unu jesi, ma wan o fusutan andi un ta jei. 15 Hati u dee sëmbë aki dë tapatapa. De ta jei soni, ma de an ta tei. De ta tapa de jesi u de an jei soni, söseei de ta tapa de wojo u de an si soni. Fëën mbei dee soni aki an ta dou de hati u de bia ko a mi u mi kula de.’
16 Ma un dë bunu e, biga wojo fuunu ta si soni, söseei jesi fuunu ta jei soni. 17 Biga sömëni u dee fesiten tjabukama u Gadu ku woto sëmbë dee bi ta libi bunu a Gadu wojo, bi hangi seei u si dee soni un ta si ku dee un ta jei aki, ma de an bi si de, söseei de an bi jei de tu.
18 Wë awaa mi o puu di woto da unu u di goonma di bi ta jaa dee sii. 19 Dee sii dee kai a bandja pasi, dë kuma te wan sëmbë jei di buka u di Tii u Gadu, ma an mbei möiti faa fusutëën, nöö te wan pisi Didibi* ko puu di buka di a bi jei dë nëën hati. 20 Dee sii dee kai a sitonu kamian ka hia doti an dë, dë kuma te wan sëmbë jei di buka, nöö wantewante dë a tei ën ku wai. 21 Ma tökuseei di buka an dou hën hati. Fëën mbei a ta piki di buka u wan pisiten, ma nöö te sëmbë ta du ku ën u di buka dë hedi, nasö te fuka miti ën u di buka dë hedi, nöö te fii mëni, an ta biibi di buka dë möön. 22 Dee sii dee kai a maka dendu, dë kuma te wan sëmbë jei di buka, ma dee bookohedi u di ten aki* ku di ganjan di gudu ta ganjan sëmbë, ta tapa di buka fu an göö ko soni dëën möönsö. 23 Dee sii dee kai a bunu doti, dë kuma te wan sëmbë jei di buka, hën a fusutëën. Nöö sö wan sëmbë ta ko dë kuma wan pau di ta pai njanjan. So u de ta pai 100 toon möön hia. Wotowan ta pai 60 toon möön hia, nöö wotowan ta pai 30 toon möön hia.”
24 Jesosi toona konda wan woto da de u lei de soni. A piki de taa: „Di Tii u Gadu di dë a liba ala, dë kuma wan womi di ta jaa bumbuu sii* a wan goon fëën. 25 Di sëmbë bi ta duumi, hën di felantima fëën tei wan taku sii,* hën a go jaa di sii a di goon u di womi te a kaba, hën a go fëën. 26 Di dee bumbuu sii nasi te de pai njanjan, hën dee taku uwii seei bigi göö. 27 Hën dee saafu kule go a di masa u de, hën de piki ën taa: ’Masa o, na bumbuu sii i bi jaa a di goon fii nö? Nöö unfa a du ko taa taku uwii ta nasi nëën?’ 28 Hën di Masa piki de taa: ’Wan felantima u mi hën wë du di soni aki ku mi e.’ Hën dee saafu hakisi ën taa: ’I kë fuu go hön dee taku uwii puu ö?’ 29 Hën a piki de taa: ’Nönö e, dee sëmbë. Biga ee un go hön de, nöö a kan taa un hön dee bumbuu wan tu. 30 Un disa de be de tuu göö makandi u te di juu dou fuu koti de. Te di juu dë dou, nöö mi o piki dee wookoma be de go hön dee taku uwii tai a bondji tja go tjuma a faja. Baka di dë, nöö de sa koti dee bumbuu wan tja go lai a suwa awaa.’”
31 Hën Jesosi toona konda wan woto da de u lei de soni. A taa: „Di Tii u Gadu di dë a liba ala dë kuma wan pau sii de kai mutaadi* di wan womi paandi a di goon fëën. 32 A dë di möön piki sii di sëmbë ta paandi, ma a ta göö ko bigi möön hii dee woto soni tuu di sëmbë ta paandi a goon dendu te fou seei ta ko mbei wosu nëën.”
33 Nöö hën a toona da de wan woto möön. A taa: „Di Tii u Gadu di dë a liba ala, dë kuma sooda di wan mujëë tei dian ku wan gaan hia boon, hën a soopu ko gindii.”
34 Dee lö woto aki Jesosi bi ta konda te a bi ta fan ku dee sëmbë. Hii juu Jesosi bi ta konda woto da sëmbë u lei de soni. 35 A bi ta fan sö u mbei dee soni di wan tjabukama u Gadu bi taki, pasa tuutuu. Di tjabukama bi taa: „Mi o konda woto da de. Mi o konda soni da de di bi dë tjubitjubi sensi di goonliba mbei.”
36 Hën Jesosi manda dee sëmbë go, hën a go a wosu. Hën dee bakama fëën ko nëën, hën de piki ën taa: „Puu di woto di i bi konda u di taku sii da u baa.” 37 Hën a piki de taa: „Antoobi. Un haika e. Di sëmbë di jaa di bumbuu sii, da di sëmbë di ko dë Libisëmbë Miii. 38 Di goon, hën da di goonliba. Di bumbuu sii da dee sëmbë dee o dë a di Tii u Gadu* di dë a liba ala. Nöö dee taku sii da dee mii u Didibi.* 39 Di felantima di ko jaa dee taku sii da Didibi. Nöö di koti ten, hën da di kaba u di ten ka u dë aki.* Nöö dee sëmbë di ta koti di njanjan da dee basia u Gadu. 40 Wë nöö leti kumafa dee wookoma bi hön dee taku uwii tai a bondji tja go tjuma, sö nöö soni o waka te di ten ka u dë aki o kaba.* 41 Di sëmbë di ko dë Libisëmbë Miii o manda dee basia fëën u de puu sëmbë a di Tii fëën. De o puu dee sëmbë dee ta mbei wotowan du hogi ku dee sëmbë dee an ta libi ku dee wëti u Gadu, 42 nöö de o tja de go tuwë a wan gaan faja. Ala de o dë ta këë, ta njan tanda. 43 Nöö a di ten dë dee sëmbë dee ta du soni kumafa Gadu kë o ta sëndë leti kuma sonu, a di Tii u de Tata. Be di sëmbë di jei dee soni aki, go kai pakisei a de.
44 Di Tii u Gadu dë leti kuma wan gaan gudu di dë tjubitjubi a wan pisi goon. Hën wan womi feni ën, hën a toona tjubi ën. Hën ku gaan wai nëën hati a go sei hii dee soni fëën dee a bi abi tuu faa bi sa bai di goon naandë.
45 Söseei di Tii u Gadu di dë a liba ala dë kuma wan wënkëma di ta suku diidii sitonu* faa bai. 46 Di a feni wan u dee diidii sitonu aki, hën wantewante dë a go sei hii dee soni fëën dee a bi abi tuu faa sa bai di sitonu.
47 Di Tii u Gadu di dë a liba ala dë kuma wan gaan nëti di sëmbë tuwë a wata, hën de kisi hii pei fisi. 48 Di di nëti fuu pöö, hën de hai ën tja ko a tela. Hën de ta pii dee bunu wan ta lai a manda, nöö de ta tuwë dee na bunu. 49 Sö nöö soni o waka te di ten ka u dë aki o kaba.* Dee basia u Gadu o puu dee hogihati sëmbë a dee bunuhati sëmbë dendu, 50 nöö de o tja de go tuwë a wan gaan faja. Ala de o dë ta këë, ta njan tanda.”
51 Hën Jesosi hakisi de taa: „Un fusutan hii dee soni dee mi konda da unu aki ö?” Hën de piki ën taa: „Aai o Masa, u fusutan de.” 52 Hën a piki de taa: „Wë a bunu. Biga hiniwan leima di ko sabi soni u di Tii u Gadu di dë a liba ala, dë kuma wan masa u wan wosu di ta puu awoo soni ku njunjun soni tuu a di kamba ka a ta tjubi dee gudu fëën.”
53 Di Jesosi konda hii dee woto aki te a kaba, hën a kumutu dë. 54 Di a toona go a di pisiwata ka de bi kiijëën, hën a bigi ta lei sëmbë soni a dee wosu ka dee Dju nango dini Gadu. Dee sëmbë bi foondo seei, hën de taa: „Naasë di womi aki feni di köni ku di kaakiti ta du dee foombo wooko aki? 55 Na di mii u di tëmbëma hën disi nö? Na Malia da hën mama nö? Nöö na dee baaa fëën da Jakobosi, Judasi, Josëfu, ku Simon u? 56 Na u ku dee sisa fëën ta dë aki nö? Nöö naasë a feni di köni ku di kaakiti u du dee foombo wooko aki?” 57 Hën de tei ën u hogi seei. Hën Jesosi piki de taa: „Wan tjabukama u Gadu sa feni gafa a hii woto köndë boiti nëën köndë, ku hën wosudendu ka de kiijëën.” 58 Di soni dë mbei an bi du hia foombo wooko ala u di dee sëmbë an bi kë biibi ën.