Dee soni dee Mateosi sikifi

12 A wan Saba daka, Jesosi ku dee bakama fëën bi ta waka pasa a wan goon ka sëmbë ta paandi wan soni kuma alisi sö. Hangi bi kisi dee bakama fëën, hën de bigi ta booko dee soni dee bi dë kuma alisi dë ta njan. 2 Di dee Faliseima si di soni dë, hën de taki taa: „Dee bakama fii an ta hoi di wëti u di Saba daka.” 3 Hën Jesosi piki de taa: „Wan bi lesi a Gadu Buku andi Dafiti ku dee womi dee bi ta waka ku ën bi du di hangi bi kisi de u? 4 De bi go a di Wosu u Gadu, hën de njan di bëëë di de bi buta apaiti da Gadu. Ma dee Wëti an bi ta da de pasi u de njan mën. Dee begima wanwan nöö bi sa njan mën. 5 Wan bi lesi a Gadu Buku taa dee begima bi ta wooko a Saba daka u? Ma tökuseei na poi de bi ta poi di wëti u di Saba daka. 6 Ma mi taki da unu e, wan sëmbë dë a unu mindi aki di hei möön di Wosu u Gadu. 7 Gadu Buku bi taki taa: ’Na mbeti mi kë fuun tjuma da mi e, ma mi kë fuun abi tjalihati u wotowan.’ Ee un bi fusutan andi di soni dë kë taki, nöö wan bi o kuutu dee sëmbë dee an du hogi. 8 Di sëmbë di ko dë Libisëmbë Miii abi taki a Saba daka liba.”

9 Di Jesosi kumutu dë, hën a go a di wosu ka dee Dju nango dini Gadu. 10 Hën a si wan womi di maun fëën bi lan. Hën wanlö sëmbë di bi sai dë bi kë suku föutu nëën, hën de hakisi ën taa: „A fiti u kula wan sëmbë a Saba daka u?” 11 Hën a piki de taa: „Ee i bi abi wan kodo sikapu fii ta kiija, hën a kai go a wan baaku dendu a Saba daka, ja bi o mbei möiti fii go puu ën a di baaku dë dendu hii fa di soni dë pasa a wan Saba daka u? 12 Wë wan libisëmbë bumbuu möön wan sikapu. Fëën mbei an föutu fii du wan bumbuu soni a Saba daka.” 13 Hën Jesosi bia piki di womi di maun fëën bi lan taa: „Tëndë di maun fii ko i si.” Hën di womi tëndë di maun fëën, hën di maun fëën ko dë bunu kuma di woto së maun. 14 Hën dee Faliseima go a döö, hën de go kuutu ku deseei luku unfa de o du feni Jesosi kii. 15 Di Jesosi ko fusutan andi de bi kë du ku ën, hën a kumutu ala. Di a bi nango, hën sömëni sëmbë bi ta waka nëën baka, hën a kula hii dee sëmbë dee bi dë ku suwaki. 16 Ma a bi piki de taa de an musu konda soni fëën da woto sëmbë. 17 Sö a ko pasa taa di soni di di tjabukama Jesaaja bi taki, bi ko pasa tuutuu. A bi taki taa:

18 „Un luku di wookoma u mi! Hën mi tei u du soni da mi. Mi lobi ën, söseei libi fëën ta kai ku mi. Mi o dëën di kaakiti u mi, nöö a o lei hii sëmbë a goonliba unfa de musu du soni di ta kai ku mi. 19 An o ta fia ku sëmbë ta kai wolo, söseei sëmbë an o jei bai fëën a sitaati. 20 An o makisa wan kambaluwa* di booko, söseei an o böö wan faja tapa, aluwasi ee di faja piki seei. Sö a o ta du soni te kuma a seeka hii soni ko bunu baka. 21 Hii pei sëmbë o ta wakiti ën u de feni bunu.”

22 Baka di dë, hën de tja wan womi di bi abi wan taku soni nëën liba ko a Jesosi. Di taku soni bi mbei taa di womi dë an bi sa si soni, söseei an bi sa fan. Hën Jesosi kula di womi dë, hën a bigi ta si soni baka, söseei a bigi ta fan baka. 23 Di dee gaan hia sëmbë dee bi sai naandë si di soni dë, hën de foondo seei, hën de taa: „A sa kan taa di Womi Mii* u Dafiti hën disi ö?” 24 Di dee Faliseima jei dee sëmbë taki sö, hën de taa: „Belisabo,* di tiima u dee taku soni ta da di womi aki kaakiti faa puu taku soni a sëmbë liba.” 25 U di Jesosi bi sabi andi de bi ta pakisei, mbei a piki de taa: „Ee dee sëmbë dee dë a wan tii basu ta feti ku de na de, nöö di tii dë o booko. Söseei ee sëmbë u wan köndë nasö sëmbë u wan wosudendu ta feti ku de na de, nöö di köndë dë nasö di wosudendu dë o booko tu. 26 Ee Saatan ta feti ku dee wotowan fëën, ta jaka de puu a sëmbë liba, nöö nëën da ku hënseei a ta feti nö? Wë ee sö, nöö hën da di tii fëën o booko. 27 Wë un taki taa mi ta puu taku soni a sëmbë liba ku di kaakiti u Didibi. Ma nöö ambë ta da dee bakama fuunu kaakiti u puu taku soni a sëmbë liba? Fëën mbei mi taki taa dee bakama fuunu seei o kuutu unu taa wan abi leti. 28 Ma ee hën a dë taa ku di kaakiti u Gadu mi ta puu taku soni a sëmbë liba, nöö hën da di Tii u Gadu dou a unu liba kaa e. 29 Biga ee wan sëmbë i kë go a wan taanga womi wosu u go fufuu dee gudu fëën, nöö i musu kisi ën tai te i kaba bifö, na sö nö? Te i du sö, nëën ufö i sa tei dee gudu dee dë a di wosu fëën. 30 Ee wan sëmbë ja dë ku mi a wan së, nöö hën da i dë felantima u mi. Ee ja ta wooko makandi ku mi fii hai sëmbë ko a mi, nöö hën da i ta jaka sëmbë puu a mi.

31 Fëën mbei mi taki da unu e, Gadu sa da wan sëmbë paadon da hiniwan hogi di a du, aluwasi ee a wisiwasi dee soni u Gadu seei. Ma ee wan sëmbë wisiwasi di kaakiti u Gadu, nöö Gadu an o dëën paadon. 32 Gadu o da wan sëmbë paadon ee a taki hogi u di sëmbë di ko dë Libisëmbë Miii. Ma ee wan sëmbë wisiwasi di kaakiti u Gadu, nöö Gadu an o dëën paadon. Na a di ten aki,* söseei na a di ten di ta ko.

33 A di pau njanjan nëën i ta sabi un pei pau a dë. Ee di njanjan bunu, nöö hën da di pau seei bunu, ma ee di njanjan an bunu, nöö di pau seei an bunu tu. 34 Unu sindeki mii unu. Unu a’ hogihati. Fëën mbei bumbuu fan an sa kumutu a unu buka. Biga di soni di fuu i hati, hën buka fii ta taki. 35 Ee bumbuu soni dë a i hati, nöö bumbuu fan joo ta fan. Ma ee hogi wanwan nöö dë a i hati, nöö hogi soni nöö joo ta taki. 36 Mi taki da unu e, te Gadu o kuutu sëmbë, a o kuutu hiniwan sëmbë da dee sösö fan de bi fan. 37 Ee i ta taki bumbuu soni, nöö Gadu o si i kuma wan sëmbë di ta libi a wan leti fasi. Ma ee i ta taki soni di an bunu, nöö Gadu o sitaafu i.”

38 Hën dee Faliseima ku dee sabima u Wëti piki Jesosi taa: „Mësitë, du wan foombo soni boo si.” 39 Hën a piki de taa: „Un dee takulibima aki, un dë leti kuma wan womi nasö wan mujëë di ta waka da di wotowan fëën.* Fëën mbei un kë si wan foombo soni ufö un sa biibi. Wë mi taki da unu taa wan o si wan woto foombo soni möönsö möön leki di soni di bi pasa ku di tjabukama u Gadu de kai Jona. 40 Biga leti kumafa Jona bi dë a di gaan fisi bëë dendu dii daka longi, ndeti ku didia, sö nöö di sëmbë di ko dë Libisëmbë Miii o dë a geebi dii daka longi, ndeti ku didia. 41 Dee sëmbë u Ninifei o weki ko a libi baka makandi ku dee sëmbë u di ten aki a di daka di Gadu o kuutu sëmbë. De o lei taa dee sëmbë u di ten aki an ta libi bunu, u di de de bi bia de libi di de bi jei di bosikopu u Jona. Ma wan sëmbë di hei möön Jona dë ku unu aki e. 42 Di mujëë könu u Seiba o weki ko a libi baka makandi ku dee sëmbë u di ten aki a di daka di Gadu o kuutu sëmbë. A o lei taa dee sëmbë u di ten aki an ta libi bunu, u di hën a bi kumutu te a longi ko haika fa Salumön köni tjika. Ma wan sëmbë di hei möön Salumön dë ku unu aki e.

43 Te wan taku soni kumutu a wan sëmbë liba, nöö a ta waka ta lontu a dee sabana ta suku kamian faa libi. Ma te an feni möönsö, 44 nöö a ta taki taa: ’Mi o toona go baka a di wosu ka mi bi kumutu.’ Te a bia go baka, nöö a ta si taa sëmbë an dë a di wosu, nöö di wosu bai seeka ko dë limbolimbo gbegedee. 45 Nöö a nango kai seibi woto taku soni di hogi möön hënseei, nöö hii de tuu ta denda a di wosu, nöö de go libi dë. Nöö di sëmbë dë ta ko möön hogi möön fa a bi dë a fesi. Sö nöö soni o pasa ku unu dee takulibima u di ten aki.”

46 Di Jesosi dë ta fan ku dee sëmbë, hën hën mma ku dee baaa fëën ko dë a döö dë ta wakiti ën u de fan ku ën. 47 Hën wan sëmbë piki ën taa: „Ju mma ku dee baaa fii dë a dööbuka dë e, nöö de kë fan ku i.” 48 Hën a piki di sëmbë taa: „Ambë da mi mma? Nöö ambë da dee baaa u mi?” 49 Hën a lei maun go a dee bakama fëën, hën a taa: „Un luku mi mma ku dee baaa u mi aki! 50 Biga hiniwan sëmbë di ta du andi mi Tata di dë a liba ala kë, hën da mi baaa ku mi sisa ku mi mama.”