Dee soni dee Mateosi sikifi
27 Hën a di fuuku mamate, hën hii dee fesima u dee begima ku dee gaanwomi u di köndë ko makandi u taki fiti unfa de o du kii Jesosi. 2 Di de bui ën te de kaba, hën de tjëën go leifi da di gaama de kai Pilati.
3 Di Judasi, di bi sei Jesosi, si taa de o kii Jesosi, hën a hati ën seei. Hën a toona tja dee 30 soofu möni go da dee fesima u dee begima ku dee gaanwomi, 4 hën a taa: „Wan gaan hogi wë mi du di mi sei wan bumbuu sëmbë u de kii ën.” Hën de piki ën taa: „Wa a’ soni fëën u taki möön. A fika da i!” 5 Nöö hën Judasi hiti di möni tuwë a goon leti a di Wosu u Gadu dendu naandë, hën a kule go hanga hënseei kii. 6 Hën dee fesima u dee begima go pii dee soofu möni, hën de taa: „Wë di möni aki an bunu u buta a di möni këdë u di Wosu u Gadu. An o kai ku di wëti fuu, biga a dë di möni di de paka u de kii sëmbë.” 7 Nöö hën de kai pakisei te de kaba, hën de go bai wan pisi goon a wan sëmbë di ta mbei soni kuma agban.* A di goon dë de bi o ta bei woto köndë sëmbë. 8 Fëën mbei de ta kai di goon dë Buuu Goon te kisi di daka u tide. 9 Wë nöö fa di soni pasa dë, nöö a kai ku di soni di di tjabukama u Gadu de kai Jelemia bi taki a fesi. A taa: „De sei wan sëmbë da 30 soofu möni. Di möni aki dee womi u Isaëli bi taa de bi o paka da di sëmbë dë. 10 De tei di möni dë, hën de bai wan pisi goon a wan sëmbë di ta mbei soni kuma agban sö, kumafa Jehoufa* bi piki mi.”
11 Nöö di juu dë, Jesosi bi taanpu a Gaama Pilati fesi. Hën di gaama hakisi ën taa: „Ju da di Könu u dee Dju sëmbë tuu nö?” Hën Jesosi piki ën taa: „A dë leti kumafa i si gaama taki naandë.” 12 Di dee fesima u dee begima ku dee gaanwomi ta mindi soni da Jesosi, nöö an bi ta piki. A bi dë fëën piii. 13 Hën Gaama Pilati hakisi ën taa: „Wë ja ta jei dee hia hogi fii de ta konda dë nö?” 14 Ma Jesosi an taki na wan soni möönsö. Nöö di soni dë bigi da gaama seei u di an ta piki.
15 A bi dë sö taa te di Pasika piizii dou, nöö di gaama bi guwenti u puu wan sëmbë a dunguwosu. A bi ta puu di sëmbë di lanti bi kë faa puu da de. 16 Nöö di ten dë, wan gaan hogihatima de bi ta kai Balabasi bi dë a dunguwosu. 17 Nöö hën Gaama Pilati bia fan ku dee sëmbë dee bi sai dë taa: „Wë nöö undi u dee sëmbë aki un kë u mi lusu da unu: Balabasi, naa Jesosi di sëmbë ta kai di Keesitu?” 18 Gaama Pilati bi sabi taa de bi leifi Jesosi dëën, u di de bi ta haun ku ën. 19 Di a bi dë sindosindo a di kuutubangi fëën, hën di mujëë fëën manda piki ën taa: „Ja musu dë a dendu kuutu di gaan bumbuu sëmbë naandë e. Biga a di ndeti pasa aki mi sunjan wan sunjan, nöö a toobi mi gaanfa seei.” 20 Nöö hën dee fesima u dee begima ku dee gaanwomi ta piki dee sëmbë u de taki taa: „Lusu Balabasi da u, nöö kii Jesosi.” 21 Hën di gaama toona hakisi de taa: „Undi u dee tu womi aki un kë u mi lusu da unu?” Hën de taa: „Lusu Balabasi da u!” 22 Hën Gaama Pilati hakisi de taa: „Nöö andi un kë u mi du ku Jesosi, di sëmbë ta kai di Keesitu?” Hën hii de tuu taa: „Pekëën a wan posu kii!” 23 Hën a hakisi de taa: „Wë faandi mbei? Un hogi a du?” Ma de bi ta bai möön taanga taa: „Pekëën a wan posu kii!”
24 Hën gaama si taa an sa tapa dee sëmbë u de an mbei toobi booko di köndë. Nöö hën a tei wata, hën a wasi maun a hii dee sëmbë fesi dë, hën a taa: „Di buuu u di bumbuu sëmbë aki an fika a mi hedi e. A fika da unu.” 25 Hën hii dee sëmbë piki taa: „Aai, be a fika a u ku dee mii fuu tuu hedi.” 26 Hën a lusu Balabasi da de, hën a piki dee sodati fëën be de wipi Jesosi, söseei u de tjëën go peka a wan posu kii.
27 Hën dee sodati u di gaama tei Jesosi tja go nëën wosu, hën de kai hii dee sodati u de lomboto ën. 28 Hën de puu dee koosu nëën sinkii, hën de bisi wan bë djapona* dëën. 29 Hën de tei wan tatai di dë ku maka, hën de lolu ën mbei wan könu kaapusa, hën de tuusi ën nëën hedi. Hën de mbei a hoi wan pau nëën letisë maun. De tjökö kini a goon nëën fesi, hën de ta mbei ën fa ta taki taa: „Odi oo, Könu u dee Dju!” 30 Hën de tunta nëën, hën de tei di pau di bi dë nëën maun dë, hën de ta naki ën a hedi ku ën. 31 Di de mbei ën fa te de kaba, hën de puu di djapona nëën sinkii, hën de toona bisi dee koosu fëën dëën baka, hën de tjëën go ka de o pekëën a di posu awaa.
32 Di de dë a pasi nango, hën de si wan womi u di köndë Sileni de kai Simön. De duwengi di womi aki faa tja di posu* u Jesosi dëën. 33 Di de dou a di kamian de kai Golugota, di kë taki Hedibonu Kamian, 34 hën de tei win mökisi ku bita, hën de dëën faa bebe. Ma di a tesi ën, nöö an bi kë bebe ën. 35 Di de pekëën a di posu te de kaba, hën de tuwë lötu luku ambë o feni dee koosu fëën. 36 Hën de sindo dë ta hoi wakiti. 37 De bi peka wan paanga a di posu hedi u lei faandi mbei de bi kii ën. Hën de sikifi a di paanga taa: „Disi da Jesosi, di Könu u dee Dju sëmbë.”
38 De bi peka tu hogiduma a Jesosi bandja. Wan u de bi dë a letisë maun fëën, nöö di wotowan bi dë a töötösë maun fëën. 39 Dee sëmbë dee bi ta waka pasa dë bi ta kosi ën ta seki hedi ta mbei ën fa. 40 De bi ta taki taa: „Na ju bi taki taa joo booko di Wosu u Gadu, nöö joo toona mbei ën a dii daka dendu ö? Nöö i puu iseei a di posu* nö! Ee i da miii u Gadu tuutuu, nöö saka kumutu a di posu boo si!” 41 Dee fesima u dee begima, dee sabima u Wëti, ku dee gaanwomi seei bi ta mbei ën fa. De bi ta taki taa: 42 „Wë a bi ta heepi woto sëmbë, nöö andi mbei an sa heepi hënseei! Ee hën da di Könu u Isaëli, nöö be a saka kumutu a di posu,* nöö woo biibi ën. 43 A ta futööu Gadu, nöö be Gadu ko heepi ën ee a kë. Biga a taa Gadu dëën Tata.” 44 Dee tu hogiduma dee de bi peka nëën bandja seei bi ta mbei ën fa.
45 Bigi a tuwalufu juu sonuhati te kisi dii juu sapate, hën hii di köndë ko dungu kankan. 46 A di pisiten u dii juu sapate, hën Jesosi bai taanga taa: „Eli, Eli, lama sabaktani?” Di soni aki kë taki: „Gadu e, di Gadu u mi, andi mbei i bia baka disa mi sö?” 47 Di wanlö sëmbë dee bi sai taanputaanpu naandë jei ën, hën de taki taa: „Di womi aki ta kai Elia.” 48 Hën wantewante wan u dee sëmbë dë kule go tei wan sipönsu, hën a munjëën ku wan gandjigandji win, hën a butëën a wan pau buka tëndë da Jesosi faa bebe. 49 Hën dee wotowan taki taa: „Nönö, un disëën. Boo luku ee Elia o ko heepi ën.” 50 Hën Jesosi toona bai wan pasi möön, nöö hën böö fëën koti.
51 Hën di gaan degi koosu di bi dë a di Wosu u Gadu tënë zalalaa kumutu a liba te kisi goon. Hën goon seki, hën dee gaan sitonu bai latja. 52 Hën dee geebi u di köndë booko jabi, hën dee dëdë sinkii u sömëni u dee sëmbë dee bi ta dini Gadu ko a döö. 53 Sömëni sëmbë bi si de. (Baka di Jesosi weki ko a libi baka, hën wanlö sëmbë dee bi dë a di kamian ka dee geebi bi dë, bi denda go a di foto u Gadu.) 54 Di di hedima u dee sodati ku dee woto sëmbë dee bi ta watji Jesosi naandë si fa di goon seki, söseei fa dee woto soni bi ta pasa, hën de ko fëëë te na soni. Hën de taa: „Di sëmbë aki bi musu u dë di Mii u Gadu tuutuu.”
55 Nöö wanlö mujëë bi dë taanputaanpu te a longi ta luku. Dee mujëë aki bi ta dë makandi ku Jesosi ta heepi ën a soni sensi di ten di a bi kumutu a Galilea. 56 Wantu u dee mujëë aki bi dë Malia Magidala, Malia di mama u Jakobosi ku Josesi, ku di mama u dee womi mii u Zebedeosi.
57 A di sapate buka, hën wan guduma de kai Josëfu u di köndë Alimatea ko dou. Di womi aki bi ko dë wan bakama u Jesosi tu. 58 A go a Gaama Pilati go hakisi ën pasi faa tei di dëdë sinkii u Jesosi. Hën Gaama Pilati piki dee sodati fëën be de dëën di dëdë sinkii. 59 Josëfu tei di dëdë sinkii, hën a lolu ën a gaan dii koosu di bi dë limbolimbo, 60 hën a butëën a wan sitonu baaku fëën di a seeka njunjun u bei sëmbë. Hën a logoda wan gaan gindi sitonu ko tapa di baaku buka, hën a go. 61 Ma Malia Magidala ku di woto Malia bi fika naandë sindosindo a di geebi buka.
62 Dee soni aki pasa a di daka di sëmbë bi nango seeka soni da di Saba daka. A di debooko fëën, hën dee fesima u dee begima ku dee Faliseima ko makandi a Gaama Pilati fesi, 63 hën de taa: „Gaama o, di di bödjëëma naandë bi dë ku libi, nöö a bi taki taa te a dëdë, nöö a di u dii daka fëën a o toona weki ko a libi baka. 64 Fëën mbei u kë begi i fii buta sëmbë u hoi wakiti a di geebi fëën dii daka longi, sö taa dee bakama fëën an sa go fufuu di dëdë sinkii fëën, nöö de piki sëmbë taa a toona weki ko a libi baka. Di soni aki o hogi möön di mindi di a bi mindi soni a fesi.” 65 Hën Gaama Pilati piki de taa: „Un sa tei wantu sodati tja go hoi wakiti a di geebi.” 66 Hën de go tapa di geebi naki sitampu nëën u sëmbë an sa jabi ën, hën de buta dee sodati u hoi wakiti a di geebi.