Dee soni dee Lukasi sikifi

1 Sömëni sëmbë bi mbei möiti u sikifi dee soni dee bi pasa ku Jesosi, nöö u ta biibi hii dee soni dë tu. 2 Woto sëmbë di bi si dee soni dë ku deseei wojo sensi a di bigi, bi fika ta konda de da sëmbë kumafa soni bi pasa, nöö de bi konda de da u tu. 3 Wë masa Teofilusi, miseei öndösuku hii dee soni dë te mi kaba, hën mi sikifi de finifini leti kumafa de bi pasa. 4 Mi du ën sö, u di mi kë fii dë seiki taa dee soni dee i bi lei, dë tuutuu soni.

5 A di ten di Helodi* bi dë könu u Judea, nöö wan begima bi dë di de bi ta kai Sakalia. A bi dë wan begima a di kulupu u Abia. Hën mujëë de bi ta kai Elisabëti, nöö a bi dë wan bakamii u Alön. 6 De tuu bi ta libi kumafa Gadu kë. Hii juu de bi ta hoi dee Wëti u Jehoufa.* 7 Ma de an bi a’ miii u di Elizabëti an bi sa pai. Boiti di dë, de tuu bi ko gaandi kaa.

8 Wan daka Sakalia bi ta du di begima wooko fëën a Gadu fesi, u di di juu bi dou u di kulupu fëën du di wooko u de. 9 A bi musu denda go a di Wosu u Gadu u tjuma sumëësuti soni da Jehoufa* kumafa dee begima bi guwenti du. 10 Di di juu dou faa tjuma sumëësuti soni da Gadu, hën hii dee sëmbë tuu bi dë a döö ta begi. 11 Hën wan basia u Jehoufa* ko naandë. A taanpu a letisë maun u di begitafa ka de ta tjuma sumëësuti soni. 12 Di Sakalia si ën, hën hati fëën latja wanw. A bi fëëë te na soni. 13 Ma di basia u Gadu piki ën taa: „Na fëëë e Sakalia, biga Gadu jei dee begi fii. Di mujëë fii Elizabëti o pai wan womi mii da i, nöö i musu kai ën Johanisi. 14 Joo wai te na soni, nöö sömëni sëmbë o wai te un pai di mii, 15 u di di mii aki o dë wan apaiti sëmbë a Jehoufa* wojo. Ma an musu bebe win nasö soni di dë ku daan. Nöö ufö un pai ën seei Gadu o dëën di kaakiti fëën. 16 A o heepi sömëni u dee Isaëli sëmbë u de toona ko a Jehoufa* baka. 17 Gadu mandëën go a fesi ku di seei kaakiti di a bi da Elia. A o mbei dee hati u dee tata ko dë kuma di u dee mii. Söseei a o mbei dee sëmbë dee an ta piki Gadu buka ko ta libi kuma dee sëmbë dee ta du soni kumafa Gadu kë. A o seeka de u de sa ko ta libi kumafa Jehoufa* kë.”

18 Sakalia hakisi di basia u Gadu taa: „Unfa di soni aki o sa pasa? Biga mi ko gaandi kaa, nöö di mujëë u mi seei ko gaandi tu.” 19 Hën di basia u Gadu piki ën taa: „Mi de kai Gabiëli, nöö hiniwan ten mi ta dë leti a Gadu fesi. Gadu manda mi u mi tja di bunu buka aki ko da i. 20 Ma u di ja biibi mi, mbei buka fii o tapa. Ja o fan möön u te di daka dou ka dee soni aki o pasa. Dee soni dee mi taki da i aki o pasa te di juu dou.” 21 Nöö di juu dë, dee hia sëmbë dee bi dë a döö bi ta wakiti Sakalia. A bi bigi da de taa a bi dë a di Wosu u Gadu sö longi. 22 Di Sakalia kumutu ko a döö, nöö an bi sa fan möön. Hën de fusutan taa a bi si wan foombo soni di a bi dë a di Wosu u Gadu. A bi ta mbei soni ku maun da de, ma buka fëën bi tapa. 23 A wooko a di Wosu u Gadu sömëni daka u te di juu fëën kisi faa go a wosu, hën a go.

24 Baka wan pisiten, hën di mujëë fëën, Elisabëti, ko dë ku bëë. Feifi liba longi an kumutu a wosu. A bi taa: 25 „Di gaan bunu aki Jehoufa* du da mi. A buta pakisei a mi, biga a puu sen a mi wojo a hii sëmbë fesi.”

26 Di Elisabëti bi dë ku sikisi liba bëë, hën Gadu manda di basia fëën de kai Gabiëli go a di pisiwata de kai Galilea, a di köndë de kai Nazalëti. 27 A mandëën go a wan mujëë di an duumi ku womi wan daka. Di mujëë aki de kai Malia, nöö hën ku wan womi de kai Josëfu bi mbei buka u de tööu. Josëfu bi dë wan bakamii u Dafiti. 28 Di di basia u Gadu ko dou a Malia, hën a taa: „Odi oo, mujëë. Jehoufa* ta wai ku i gaanfa seei, nöö a o mbei i feni gaan bunu.” 29 Di a jei di odi, hën a panta tee, biga a toobi ën. A bi ta hakisi hënseei faandi mbei a dëën odi sö. 30 Hën di basia u Gadu piki ën taa: „Malia, na fëëë e, Gadu ta wai ku i. 31 Joo ko dë ku bëë, nöö joo pai wan womi mii, nöö i musu kai ën Jesosi. 32 Di mii di joo pai dë o hei möön hii sëmbë, nöö de o kai ën di Womi Mii u di Möön Hei Gadu, nöö Jehoufa* Gadu o butëën ko Könu nëën gaan avo Dafiti kamian. 33 A o dë Könu u dee bakamii u Jaköpu u nöömö, nöö di Tii fëën an o kaba möönsö.”

34 Hën Malia piki di basia u Gadu taa: „Unfa mi sa du dë ku bëë? Biga ma duumi ku womi wan daka.” 35 Hën di basia u Gadu piki ën taa: „Di Möön Hei Gadu o da i di kaakiti fëën, nöö di makiti u Gadu o tjubi i. Fëën mbei de o kai di mii di joo pai, di Womi Mii u Gadu. 36 Wë di famii fii de kai Elisabëti dë ku sikisi liba bëë, hii fa a ko gaandi kaa, söseei hii fa sëmbë bi sabi taa an sa pai. 37 Ma soni an dë di Gadu an sa du.” 38 Hën Malia piki ën taa: „Mi da di mujëë saafu u Jehoufa!* Be soni pasa leti kumafa i taki dë.” Di a fan sö, hën di basia u Gadu go fëën.

39 Baka di dë, hën Malia biinga go hesihesi a wan köndë di bi dë a dee kuun kamian a di pisiwata u Juda. 40 Di a dou ka Sakalia ta libi, hën a denda go a di wosu, hën a da Elisabëti odi. 41 Di Elisabëti jei di odi u Malia, hën di mii di dë nëën bëë dendu dë buli seei, nöö hën di kaakiti u Gadu ko a Elisabëti liba. 42 Hën a bai taa: „I abi bunu hedi möön hii mujëë, nöö be Gadu mbei soni waka bunu da di mii di dë a i bëë dendu dë! 43 Unfa mi du abi bunu hedi sö tee taa di mama u di Masa u mi seei ko luku mi? 44 Di mi jei di odi fii, hën di mii di dë a mi bëë dendu aki wai te a buli. 45 Soni o waka bunu da di mujëë di biibi dee soni di a jei. Biga hii dee soni dee Jehoufa* piki ën o pasa tuutuu.”

46 Hën Malia taa: „Mi ta gafa Jehoufa.* 47 Mi ta wai seei a mi hati ku di Gadu u mi. Hën da di Heepima u mi. 48 Biga a buta pakisei a di pooti mujëë saafu fëën. Hii sëmbë o ta taki taa Gadu bi mbei mi feni gaan bunu. 49 Biga di Sëmbë di abi hii kaakiti, du gaan soni da mi. Di në fëën hei, 50 nöö hii juu a ta lei taa a abi tjalihati da dee sëmbë dee ta lesipeki ën. 51 A du sömëni gaan soni ku di makiti fëën. A jaka dee sëmbë dee a’ gaanfasi. 52 A puu makiti a dee heihei womi, hën a hei dee sakafasi sëmbë. 53 A da dee pootima dee soni di de abi fanöudu, nöö a manda dee guduma go ku maun hoo. 54 A ko heepi di futuboi fëën Isaëli. An bi fëëkëtë di soni di a bi paamusi taa a bi o abi tjalihati da 55 Abahamu ku dee bakamii* fëën u nöömö. Di soni aki a bi piki dee avo fuu.” 56 Malia fika ku Elisabëti söwan dii liba longi, hën a toona go fëën nëën pisi.

57 Nöö hën di ten u Elisabëti dou faa pai, hën a pai wan womi mii. 58 Di dee famii fëën ku dee sëmbë a di pisiwata fëën jei taa sö Jehoufa* du ën wan gaan bunu, hën de tuu wai ku ën seei. 59 Di di mii abi aiti daka, hën de ko koti di maaka u dee Dju* dëën, nöö de bi kë tei hën tata në kai ën Sakalia. 60 Ma di mama u di mii taa: „Nönö, u musu kai ën Johanisi.” 61 Hën de piki ën taa: „Na wan sëmbë dë a di famii fuunu de ta kai Johanisi.” 62 Hën de go fan ku di tata ku maun hakisi ën ee un në de musu da di mii. 63 Hën a hakisi de wan pisi paanga, hën a sikifi nëën liba taa: „Di në u di mii da Johanisi.” Di soni aki bi foombo de. 64 Wantewante dë, hën Sakalia buka jabi, töngö fëën lusu, hën a bigi ta fan ta gafa Gadu. 65 Nöö hii dee sëmbë u di pisiwata naandë foondo te na soni. Hën di woto dë ko paaja a hii dee kuun kamian a di pisiwata u Judea. 66 Nöö hii dee sëmbë dee jei di woto dë, bigi ta pakisei a de hati taa: „Unfa di mii aki o dë te a ko bigi?” Biga a bi dë gbelingbelin u si taa Jehoufa* bi dë ku di mii.

67 Nöö hën di kaakiti u Gadu ko a Sakalia di tata u di mii liba, hën a konda wan buka u Gadu taa: 68 „Un gafa Jehoufa,* di Gadu u Isaëli, u di a buta pakisei a dee sëmbë fëën, söseei u di a mbei de ko fii. 69 Gadu da u wan taanga womi a di lö u di futuboi fëën de kai Dafiti, u heepi u 70 leti kumafa a bi mbei dee fesiten tjabukama fëën bi paamusi dee gaan sëmbë fuu gaanduwe kaa. 71 A bi paamusi u taa a bi o puu u a dee felantima fuu basu. Nöö dee sëmbë dee an lobi u an o feni u ta sitaafu möön. 72 A o a’ tjalihati fuu u di sö a bi paamusi dee avo fuu. An o fëëkëtë di buka di a bi mbei ku de. 73 Di soni aki a bi paamusi Abahamu, di avo fuu. 74 Baka te a puu u a dee felantima fuu maun, nöö a o da u di gaandi fuu ta dini ën fiifii söndö fëëë. 75 Woo sa ta dini ën hii u libi longi, söseei woo sa ta libi kumafa a kë. 76 Ma nöö ju di mii u mi aki, de o kai i wan tjabukama u di Möön Hei Gadu. Biga joo waka a Jehoufa* fesi u seeka pasi dëën. 77 Joo konda da dee sëmbë fëën taa a o mbei de ko fii, biga a o da de paadon u dee hogi di de bi du, 78 u di a a’ tjalihati u de. Di tjalihati fëën di ta kumutu a liba ala o dë kuma te sonu ta jabi ta ko. 79 A o tuwë limbo da dee sëmbë dee dë a dungu, ku dee sëmbë dee dë a dëdë buka. Nöö a o lei u andi u musu du fuu sa ta dë bööböö.”

80 Nöö hën di mii ta göö ta ko bigi, nöö di kaakiti u Gadu bi dë nëën liba. A bi ta libi a wan sabana u te di juu bi dou faa go paaja di buka u Gadu da dee Isaëli sëmbë.