Dee soni dee Mateosi sikifi
26 Di Jesosi bi taki hii dee soni aki te a kaba, hën a piki dee bakama fëën taa: 2 „Kumafa un sabi, nöö baka tu daka woo hoi di Pasika piizii, nöö a di ten dë sëmbë o tja di sëmbë di ko dë Libisëmbë Miii go leifi da dee felantima fëën u de tjëën go kii a wan posu.”
3 Di juu dë, nöö dee fesima u dee begima ku dee gaanwomi u di köndë bi ko makandi a di djai u di gaan begima de kai Kajafasi. 4 Hën de sai dë ta kuutu luku unfa de sa du feni Jesosi tja go kii. 5 Ma de bi ta taki da deseei taa: „Wa musu du ën a di Pasika piizii, ee nasö dee sëmbë u di köndë o bigi ligei.”
6 Di Jesosi bi dë a di köndë de kai Betania, nöö a bi go a di wosu u Simön. Di womi aki bi abi kököbë. 7 Hën wan mujëë ko ala ku wan bata* ku wan gaan dii sumëësuti fatu nëën dendu, hën a tutu di fatu a Jesosi hedi di a bi dë ta njan. 8 Di soni di di mujëë bi du an bi kai ku dee bakama u Jesosi, hën de taa: „Di gaan dii fatu dë hën a tei ta poi sö u? 9 Biga u bi sa sei ën puu gaan hia möni, nöö u tei di möni dë paati da dee pootima.” 10 Di Jesosi ko sabi andi de bi ta taki, hën a piki de taa: „Faandi mbei un ta guunjan di mujëë? Wan bumbuu soni a du da mi. 11 Biga dee pootima o dë aki nöömö fuun ta sölugu, ma mi ma o dë ku unu aki hii juu. 12 Fa a tutu di sumëësuti fatu a mi sinkii aki, nöö mi sinkii wë a ta seeka a fesi da di bei di de o bei mi. 13 Mi taki da unu e, a hii kamian u goonliba ka de o ta konda di bunu buka kaa, de o ta konda di bunu di di mujëë aki du da mi tu.”
14 Hën wan u dee tuwalufu apösutu fëën di de ta kai Judasi Isikaliötu go a dee fesima u dee begima, 15 hën a taa: „Wë ee mi mbei möiti fuun sa feni Jesosi kisi, nöö andi woon paka mi?” Hën de piki ën taa de o dëën 30 soofu möni. 16 Sensi di ten dë, hën a ta suku fasi nöömö faa sei Jesosi.
17 A di fosu daka u di piizii u bëëë söndö sooda, hën dee bakama u Jesosi ko hakisi ën taa: „Masa o, naasë i kë fuu seeka kamian fuu hoi di Pasika piizii?” 18 Hën a piki de taa: „Un go a Jelusalën, nöö woon si wan womi, nöö un musu piki ën taa: ’Di Mësitë taki e, taa di juu Gadu buta dëën ko zuntu kaa. Nöö a taa a kë ko njan di Pasika aki makandi ku dee bakama fëën a i wosu.’” 19 Hën dee bakama u Jesosi du kumafa a bi piki de, hën de seeka soni u de hoi di Pasika piizii.
20 A di ndeti buka, hën a go sindo a tafa ta njan ku dee tuwalufu bakama fëën. 21 Di de bi sai dë ta njan, hën a piki de taa: „Mi taki da unu e, wan fuunu aki o tjaam’ go sei.” 22 Di a fan sö te a kaba, hën a hati de te na soni. Nöö hën hiniwan u de ta hakisi ën taa: „Masa o, fa i fan dë, nöö a sa kë mi ö?” 23 Hën a piki de taa: „Di sëmbë di mi ku ën ta munjan bëëë a di wan kodo paabi aki, hën wë o sei mi sö e. 24 A dë sö tuu taa di sëmbë di ko dë Libisëmbë Miii o go disa unu leti kumafa de bi sikifi soni fëën a fesi kaa. Ma helu u di sëmbë di o sei di sëmbë di ko dë Libisëmbë Miii! A bi o möön bëtë de an bi pai ën ko a goonliba aki.” 25 A di juu ten dë Judasi bi dë setiseti faa go sei Jesosi kaa. Ku ën sö seei a hakisi Jesosi taa: „Mësitë,* a sa kë mi ö?” Hën Jesosi piki ën taa: „A dë leti kumafa i si i taki ën dë.”
26 Di de bi dë ta njan, hën Jesosi tei wan bëëë, hën a da Gadu tangi, hën a booko ën a pisipisi, hën a da dee bakama fëën, hën a taa: „Un tei di bëëë aki, nöö un njan e. A kë taki di sinkii u mi.” 27 Baka di dë, hën a tei wan kan ku win a dendu, hën a da Gadu tangi, hën a tëndëën da dee bakama fëën. A piki de taa: „Un tei, nöö hii unu tuu bebe. 28 Biga a kë taki di ’buuu’ u mi di mi o tuwë a goon fu Gadu sa mbei wan ’njunjun buka’ ku libisëmbë faa sa da hia sëmbë paadon u dee hogilibi u de. 29 Ma mi taki e, ma o bebe di win aki möön u te di daka o dou ka mi o bebe di njunjun win makandi ku unu a di Tii u mi Tata.” 30 Baka di de kanda gafa Gadu, hën de go a di Olëifi Kuun.
31 Hën Jesosi piki de taa: „Di ndeti aki hii unu tuu o kule go disa mi te woon si andi o pasa ku mi. Biga a bi sikifi a Gadu Buku taa: ’De o fon di sëmbë di ta luku dee sikapu, nöö hii dee sikapu o kule paaja fanjanfanjan.’ 32 Ma te mi o weki ko a libi baka, nöö mi o go a Galilea go ta wakiti unu.” 33 Hën Petuisi piki ën wante taa: „Aluwasi hii dee wotowan aki tuu go disa i, aan juu seei di mi mi o go disa i möönsö.” 34 Hën Jesosi piki ën taa: „Mi taki da i e, taa a di ndeti aki seei ganian an o kanda ufö joo fia dii pasi taa ja sabi mi.” 35 Hën Petuisi piki ën taa: „Aluwasi ee mi ku i musu dëdë makandi seei, tökuseei ma o fia möönsö taa ma sabi i.” Nöö sö nöö hii dee woto bakama tuu taki tu.
36 Hën Jesosi go makandi ku dee bakama fëën a di djai de kai Gëtiseimani, hën a piki de taa: „Un sindo aki ufö, nöö mi o go a di së ala go begi.” 37 Di Jesosi nango, hën a tja Petuisi ku dee tu womi mii u Zebedeosi go makandi ku ën. A bigi ta fii tjali gaanfa seei. 38 Hën a piki de taa: „Fuka ku tjali fuu mi hati tee kuma a sa tja dëdë kii mi. Wan duumi e, un dë ku wojo ku mi aki.” 39 Di a waka go a fesi pikisö möön, hën a tjökö kini a goon bendi hedi, hën a begi taa: „Ke Taata o, ee i sa puu di soni di i lai a di kan da mi u mi bebe aki, nöö mi begi i i puu ën da mi baa. Ma nöö fa mi fan aki seei, na du di soni di mi kë e, ma be a pasa kumafa i kë.”
40 Hën Jesosi toona go a dee dii bakama fëën dee a bi disa dë, nöö hën a si taa de ta duumi. Hën a piki Petuisi taa: „Womi, wan sa dë ku wojo ku mi di wan kodo juu langa aki seei nö? 41 Un musu ta dë ku wojo ta begi nöömö fu soni an ganjan unu fuun go du soni di an bunu. Ma mi sabi taa hati fuunu kë du kumafa a fiti, ma sinkii fuunu an taanga sö.” 42 A toona go begi di u tu pasi, hën a taa: „Taata o, ee a musu dë sö taa mi musu u bebe di soni di i lai da mi a di kan aki, nöö be a pasa kumafa i kë.” 43 Di a toona go a dee dii bakama fëën, hën a si taa de ta duumi. Duumi nöö bi hebi a de wojo sö. 44 Hën a go disa de dë faa go begi di u dii pasi. A bi begi taki dee seei soni. 45 A toona go a dee dii bakama fëën, hën a piki de taa: „Faandi mbei un ta duumi sö a di lö ten aki? Di juu dou u de sei di sëmbë di ko dë Libisëmbë Miii da dee hogiduma. 46 Un hopo boo go. Di sëmbë di o sei mi dou kaa.” 47 Jesosi an bi kaba fan seei, hën Judasi, di bi dë wan u dee tuwalufu apösutu bi waka ko dou naandë ku wanlö gaan hia sëmbë. De ko ku ufangi, söseei de ko ku kodjo a maun. Dee fesima u dee begima ku dee gaanwomi u köndë bi manda de.
48 Di sëmbë di bi o sei Jesosi bi da de wan maaka. A bi piki de taa: „Di sëmbë di mi o bosi,* hën da di sëmbë di un musu kisi tja go.” 49 Hën a waka go a Jesosi wante, hën a taa: „Mësitë, odi oo!” Hën a bosi ën. 50 Hën Jesosi piki ën taa: „Womi o, faandi mbei i ko aki?” Hën dee sëmbë ko kisi ën panjan gingin u de tja go. 51 Nöö hën wan u dee bakama u Jesosi hai di ufangi fëën valau, hën a koti di jesi u di saafu u di gaan begima belim puu. 52 Hën Jesosi piki ën taa: „Buta di ufangi fii nëën kamian baka. Biga di sëmbë di ta hopo ufangi a liba, nöö hën ufangi o kii. 53 Wan sabi taa ee mi kë, nöö mi sa hakisi mi Tata faa manda dusudusu* basia fëën u de ko heepi mi nö? 54 Ma ee mi du sö, nöö unfa dee soni di dee fesiten tjabukama bi sikifi buta a Gadu Buku o pasa?” 55 Hën Jesosi piki dee sëmbë dee bi sai dë taa: „Faandi mbei un ko a mi aki ku kodjo ku ufangi fuun ko kisi mi kuma mi da fufuuma? Biga hiniwan ten mi bi dë a di Wosu u Gadu ta lei sëmbë soni, ma tökuseei wan bi kisi mi. 56 Ma hii dee soni aki ta pasa sö taa dee soni di dee tjabukama bi sikifi sa pasa tuutuu.” Di a taki sö, hën hii dee bakama fëën tuu fiaa kule go disëën.
57 Hën dee sëmbë dee bi ko kisi Jesosi tjëën go a di gaan begima de kai Kajafasi. Dee sabima u Wëti ku dee gaanwomi u köndë bi sai dë tu. 58 Ma Petuisi bi dë te a baka ta waka a Jesosi baka te go dou a di djai dendu u di gaan begima. Di a go a dendu, hën a go sindo ku dee sëmbë dee bi ta wooko a di wosu faa si andi de o du ku Jesosi.
59 A di juu dë, hën dee fesima u dee begima ku hii dee kuutuma u di Gaan kuutuwosu u dee Dju bi ta suku sëmbë u de ko mindi soni da Jesosi u de sa feni ën kii. 60 Ma nöö hii fa de ta pii soni ta mindi dëën seei, tökuseei na wan soni de si bigi tjika faa musu dëdë. Bakaten, hën tu sëmbë ko a fesi, 61 hën de taa: „Di womi i si aki sö, hën bi taki taa a sa booko di Wosu u Gadu tuwë a goon, nöö a dii daka dendu a sa toona mbei ën baka.” 62 Di di gaan begima jei di soni dë, hën a hopo taanpu, hën a taa: „Ja ta jei andi dee womi aki ta taki fii ö? Ja ta piki nö?” 63 Ma Jesosi an piki de möönsö. Hën di gaan begima piki ën taa: „Soi da mi a di libilibi Gadu fesi aki, taa di soni joo piki mi dë tuutuu soni. Ju da di Keesitu ö? Ju da di Mii u Gadu nö?” 64 Hën Jesosi piki ën taa: „A dë leti kumafa i si i taki ën dë. Ma mi taki da unu e, di juu o dou ka woon si di sëmbë di ko dë Libisëmbë Miii dë sindosindo a di letisë maun u di makiti Gadu, nöö a o kumutu a liba ala ta saka ta ko a dee bundji dendu.” 65 Hën di gaan begima tënë di koosu fëën, hën a taa: „A wisiwasi Gadu! An dë fuu go suku kotoigi möön. Unuseei jei fa a wisiwasi Gadu. 66 Andi un si kuma u musu du ku ën?” Hën dee sëmbë piki taa: „Wë aan soni u du möönsö, dëdë nöö a musu dëdë!” 67 Hën de tunta nëën fesi, hën de naki ën ku böö. Wotowan naki ën baaimaun a bandjajesi, nöö de ta bai taa: 68 „Di i taa i da di Keesitu, nöö konda da u ambë naki i.”
69 Ma nöö di juu dë, hën Petuisi dë piii sindosindo a di djai dendu. Te wan pisi hën wan mujëë mii di bi dë wan saafu a di wosu ko nëën, hën a taa: „Wë womi, na i bi dë ku di Jesosi u Galilea dë nö?” 70 Ma a fia a hii dee sëmbë dë fesi taa: „Ma saandi i ta taki dë e.” 71 Di a waka go a di dööbuka u di djai, hën wan woto mujëë mii si ën sabi, hën a piki dee sëmbë dee bi sai dë taa: „Di womi aki bi ta dë makandi ku Jesosi u Nazalëti tu.” 72 Hën Petuisi toona fia möön. A soi seei taa: „Ma sabi di womi un ta taki dë e!” 73 Te wan pisi, hën dee sëmbë dee bi dë taanputaanpu dë ko a Petuisi, hën de taa: „An dë fii pena fia taa ja dë sëmbë u di womi dë e. Biga u ta jei a di fanfan fii taa i da wan Galilea sëmbë.” 74 Hën Petuisi taa: „Mi ta soi a Gadu fesi taa ma sabi di womi dë wan daka, kwetikweti!” Nöö fa a fan dë, hën wantewante dë wan ganian bai kanda. 75 Nöö hën a ko mëni di fan di Masa Jesosi bi fan ku ën taa: „A di ndeti aki seei, ganian an o kanda bifö joo fia dii pasi taa ja sabi mi.” Hën a kule go a döö go këë te a bigi.