Dee soni dee Lukasi sikifi

8 Kölö sö baka di dë, hën Jesosi go a hii dee köndëköndë go paaja di bunu buka u di Tii u Gadu. Dee tuwalufu apösutu fëën 2 ku wanlö mujëë bi dë makandi ku ën tu. Fosufosu, dee mujëë dë bi dë ku suwaki, hën a bi kula de. So u de bi dë ku taku soni a de liba, hën a jaka de puu. Wan u dee mujëë de ta kai Malia Magidala. A bi abi seibi taku soni nëën liba, hën Jesosi puu de tuu dëën. 3 Wan wotowan de kai Johana, nöö hën manu de kai Kusa, di bi dë wan hedima a di wosu u Könu Helodi. Wan wotowan möön de kai Susana. Söseei i bi abi sömëni woto mujëë dee bi ta tei dee soni di de bi abi u heepi Jesosi ku dee bakama fëën ku dee soni dee de bi abi fanöudu.

4 Di sömëni sëmbë kumutu a dee köndëköndë ko a Jesosi, hën a konda wan woto faa lei de soni. A taa: 5 „Wan sëmbë di ta paandi soni bi nango jaa wanlö sii fëën. So u dee sii kai a bandja pasi, hën sëmbë waka naandë makisa de, hën dee fou ko njan de. 6 So u de kai a sitonu goon, hën de nasi, ma de toona dëdë u di di kamian an bi abi wata tjika. 7 So u dee sii kai a maka dendu, hën de nasi. Ma di maka göö peeta de te de an ko soni möönsö. 8 Ma so u dee sii kai a bunu doti, hën de ko soni seei. Hën de pai njanjan 100 toon möön hia möön fa de bi paandi.” Di a taki dee soni aki te a kaba, hën a taa: „Be di sëmbë di jei dee soni aki, go kai pakisei a de.”

9 Ma dee bakama fëën bi hakisi ën andi di woto di a konda dë kë taki. 10 Hën Jesosi piki de taa: „Unu Gadu heepi fuun ko fusutan dee tjubitjubi woto di nama ku di Tii fëën, ma dee woto sëmbë an ta fusutan de. De ta si de kuma woto nöö. Hii fa de ta luku, tökuseei de an ta si soni. Hii fa de ta jei, tökuseei de an ta fusutan dee soni di de ta jei. 11 Di soni aki di woto kë taki: Di sii da di wöutu u Gadu. 12 Dee sii dee kai a bandja pasi, dë kuma dee sëmbë dee jei di wöutu, ma Didibi ko puu di wöutu a de hati, u de an biibi sö taa de sa feni libi. 13 Dee sii dee kai a sitonu goon, dë kuma dee sëmbë dee jei di wöutu, nöö wantewante dë de tei ën ku wai. Ma tökuseei di wöutu an mbei lutu a de hati. Fëën mbei de ta biibi di wöutu u wan pisiten, nöö te sëmbë ta du ku de, nasö te fuka miti de, nöö de an ta biibi di wöutu u Gadu möön. 14 Dee sii dee kai a maka dendu, dë kuma dee sëmbë dee jei di wöutu, ma dee bookohedi ku dee gudu ku dee soni dee sëmbë ta du u piizii, ta tapa di wöutu fu an göö ko soni da de möönsö. 15 Ma nöö dee sii dee kai a bunu doti, dë kuma dee sëmbë dee abi bunuhati. Di de jei di wöutu, hën de tei ën, nöö de ko dë kuma wan pau di ta pai njanjan aluwasi andi ta miti de.

16 Sëmbë an ta sëndë faja, nöö de tapëën ku wan manda, nasö butëën a wan bedi basu. Ma de ta hopo ën buta a liba be hii sëmbë di ta denda a di wosu, sa si soni ku di limbo di a ta tuwë. 17 Biga na wan soni sa dë tjubitjubi te nöö an o ko a döö. Nöö na wan soni sa pasa te nöö sëmbë an o ko sabi ën. 18 Fëën mbei un musu ta haika bunu e. Ee wan sëmbë abi, nöö Gadu o dëën möön hia. Ma ee wan sëmbë aanbi hia, nöö di pikiwan di a bi mëni taa a abi dë seei, Gadu o puu nëën maun.”

19 Jesosi mama ku dee baaa fëën bi ko u ko luku ën, ma sëmbë bi hia a di kamian te de an bi sa feni pasi go dou nëën. 20 Hën wan sëmbë piki ën taa: „Ju mma ku dee baaa fii dë a dööbuka dë e, nöö de kë si i.” 21 Ma a piki de taa: „Mi mma ku dee baaa u mi da dee sëmbë dee ta jei di wöutu u Gadu, nöö de ta du andi a taki.”

22 Wan daka, hën Jesosi ku dee bakama fëën subi a wan boto, hën a piki de taa: „Boo haba go a woto banda.” Hën de go. 23 Di de nango te wan pisi, hën Jesosi kandi duumi. Hën wan gaan ventu ko ta seki di wata tee wata bi bigi ko a di boto ta fuu ën te kuma a bi sa singi. 24 Hën de kai ën weki. De ta bai taa: „Mësitë oo, hopo! Woo dëdë!” Hën a hopo, hën a gandji da di ventu ku di wata. Hën di wata ku di ventu tuu ko kötö piii. 25 Hën Jesosi hakisi de taa: „Faandi mbei wan ta biibi taa Gadu sa heepi unu?” Ma nöö fa a du dë, nöö a foondo de te de ko fëëë, hën de ta taki da de na de taa: „Ambë seei da di womi aki? Te kisi di ventu ku di ze seei ta du andi a taki!”

26 Hën de go dou a woto banda u di ze, a di pisiwata u dee Galasëni sëmbë, di dë a woto së banda u Galilea. 27 Di Jesosi go a tela, hën wan womi u di köndë di bi abi taku soni nëën liba waka ko miti ën. Wan pisiten kaa di womi aki an ta bisi soni a sinkii, nöö an bi ta libi a wosu, ma a ta libi a dee geebi mindi. 28 Di a si Jesosi, hën a tjökö kini nëën fesi, hën a bai taa: „Andi mi ku i abi, Jesosi, ju di Womi Mii u di Möön Hei Gadu u mundu dë? Mi begi i, na sitaafu mi e.” 29 (A taki di soni aki, u di Jesosi bi piki dee taku soni u de kumutu a di womi liba. Sömëni pasi kaa dee taku soni bi ta du ku di womi aki. Sëmbë bi bui ën ku këti, söseei de bi buta sëmbë ta luku ën. Ma a bi ta koti dee këti, nöö dee taku soni bi ta tjëën go a kamian ka sëmbë an bi ta libi.) 30 Hën Jesosi hakisi ën taa: „Unfa de ta kai i?” Hën a taa: „Mi de ta kai Te-A-Hia.” A bi taki di soni aki u di sömëni taku soni bi dë nëën liba. 31 Nöö hën dee taku soni begi Jesosi fu an musu tuwë de go a di fundu baaku. 32 A di pisiten dë, wanlö hia hagu bi dë a di kuun liba dë ta njan, hën dee taku soni begi Jesosi faa da de pasi u de go a dee hagu ala, hën a da de pasi u de go. 33 Hën dee taku soni kumutu a di womi liba go a dee hagu. Hën dee hagu kule ku baai gbulululu go kai a ze dëdë tuu fiaa. 34 Di dee sëmbë dee bi ta luku dee hagu si andi bi pasa, hën de kule go konda hii soni di de bi si da dee sëmbë u di köndë, ku dee sëmbë dee bi ta libi zuntu ku di köndë.

35 Hën dee sëmbë ko luku andi bi pasa. Fa de ko dou a Jesosi dë, hën de si di womi di bi dë ku dee hia taku soni nëën liba ku lai a sinkii, ku bumbuu fusutan seei, nöö a bi dë sindosindo a Jesosi bandja. Hën de ko ta fëëë te na soni. 36 Dee sëmbë dee bi si dee soni dee bi pasa, bi konda da dee sëmbë dee bi ko dë, unfa di womi di bi abi dee taku soni nëën liba bi ko kisi hënseei baka. 37 Nöö hën wanlö gaan hia sëmbë u di pisiwata u dee Galasëni sëmbë ko begi Jesosi faa kumutu a di pisiwata u de, u di de bi fëëë seei. Nöö hën Jesosi subi a di boto faa go. 38 Ma di womi di a bi jaka dee taku soni puu nëën liba ko begi ën faa go makandi ku ën, ma Jesosi manda di womi go. A piki ën taa: 39 „Go a wosu, nöö i go konda un bunu Gadu du da i.” Hën di womi aki go, hën a bigi ta konda di soni di Jesosi bi du dëën a hii di köndë.

40 Di Jesosi toona go a di pisiwata u Galilea, nöö dee sëmbë bi wai ku ën, u di de bi dë ku ën mëni. 41 Hën wan womi de kai Jailusi ko dou. Di womi aki bi dë wan u dee hedima u di wosu ka dee Dju nango dini Gadu. Di a si Jesosi, hën a tjökö kini nëën fesi. Hën a ta begi ën nöömö faa ko nëën pisi, 42 u di di wan kodo mujëë mii fëën di bi abi tuwalufu jaa bi dë a maunmaun.

Di Jesosi tei pasi nango nëën pisi, hën wanlö hia sëmbë ta pusa ko zuntu ku ën. 43 Wan mujëë di bi ta lasi buuu tuwalufu jaa longi bi sai dë tu. Na wan sëmbë bi sa kulëën. 44 A go waka a Jesosi baka, hën a panjan dee jëkëjëkë u di koosu buka fëën. Hën wantewante dë an bi ta lasi buuu möön. 45 Hën Jesosi bia hakisi taa: „Ambë panjan mi?” Nöö hën hii de tuu piki taa na de. Hën Petuisi taa: „Wë Mësitë o, gaan hia sëmbë ta pusa ko a i.” 46 Hën Jesosi taa: „Mi sabi taa wan sëmbë panjan mi. Biga mi fii taa kaakiti kumutu a mi sinkii.” 47 Di di mujëë bi ko fusutan taa Jesosi bi sabi andi bi pasa, nöö a bi ko ta fëëë te sinkii fëën ta tëëmë tjatjatjatja. Hën a ko tjökö kini a goon a Jesosi fesi, hën a konda a hii sëmbë fesi faandi mbei a panjan Jesosi, söseei a konda taa a bi ko bëtë wantewante. 48 Hën Jesosi piki ën taa: „Mujëë oo, di biibi fii hën mbei i ko bëtë. Go fii e.”

49 An bi kaba fan ku di mujëë seei, nöö hën wan u dee sëmbë u di hedima u di wosu ka dee Dju nango dini Gadu ko dou dë. Nöö hën a taa: „Mati o, an dë fii toobi di Mësitë möön e, biga di mujëë mii fii lasi libi kaa.” 50 Di Jesosi jei fa a fan dë, hën a piki Jailusi taa: „Na fëëë e, biibi nöö i musu biibi, nöö di mujëë mii fii o libi.” 51 Di Jesosi go dou a di wosu, nöö an bi kë u woto sëmbë go ku ën a di wosu, boiti Petuisi, Johanisi, Jakobosi, ku di mii tata ku hën mama. 52 Ma dee sëmbë bi ta bai ta këë u di mujëë mii hedi. Hën Jesosi taki taa: „Dee sëmbë, wan këë möön e. Biga na dëdë di mujëë mii dëdë e, ma a ta duumi.” 53 Di de jei di soni dë, hën de bigi ta lafu ën ta mbei ën fa. Biga de bi sabi taa dëdë di mii dëdë. 54 Hën Jesosi panjan di mii a maun, hën a kai ën taa: „Mujëë mii, hopo!” 55 Hën di mujëë mii ko a libi, hën wantewante dë a hopo. Hën Jesosi piki de be de dëën soni u njan. 56 Na piki wai dee gaansëmbë u di mii wai. Ma Jesosi piki de u de an konda da na wan sëmbë andi bi pasa.