Dee soni dee Lukasi sikifi

24 Ma a di fosu daka u di wiki, hën dee mujëë go dou fuukufuuku a di geebi. De bi tja dee sumëësuti uwii ku dee sumëësuti fatu di de bi seeka. 2 Hën de si taa di sitonu di bi tapa di baaku buka logoda kumutu. 3 Hën de denda go a di baaku dendu, ma de an si di dëdë sinkii u Masa Jesosi naandë. 4 Di soni dë bi bigi da de. Hën te wan pisi, hën de si tu womi taanputaanpu leti a de bandja dë ku gaan limbo koosulai a de sinkii ta koti faja te na soni. 5 Nöö hën de panta tee, hën de bendi hedi go a goon. Hën dee womi taki da de taa: „Faandi mbei un ko ta suku di sëmbë di dë a libi a geebi dendu aki? 6 Wë an dë aki e. A weki ko a libi baka. Un fëëkëtë dee soni dee a bi taki da unu di a bi dë a Galilea ala u? 7 A bi taki taa de bi o leifi di sëmbë di ko dë Libisëmbë Miii da dee hogiduma, nöö de bi o pekëën a wan posu kii. Nöö a di u dii daka fëën a bi o weki ko a libi baka.” 8 Di de taki sö kaa, hën dee mujëë ko mëni dee soni dee Jesosi bi taki. 9 Baka di dë, hën de kumutu a di geebi, hën de go konda hii soni da dee ëlufu apösutu ku dee woto bakama u Jesosi. 10 Dee mujëë dee go si dee soni dë da Malia Magidala, Johana, ku Malia di mama u Jakobosi. Wanlö woto mujëë dee bi dë ku de seei bi konda dee soni aki da dee apösutu tu. 11 Ma dee apösutu an bi kë biibi dee mujëë. De bi ta si kuma sösö soni de bi ta taki.

12 Hën Petuisi hopo vu kule go a di geebi. Di a go dou, hën a bendi luku a di baaku dendu, hën a si dee koosu di de bi lolu a Jesosi sinkii leti dë. Hën a bia toona. Di a dë a pasi nango hën a ta hakisi hënseei ee andi pasa.

13 Ma nöö a di daka dë seei, hën tu u dee bakama u Jesosi bi dë a pasi nango a wan köndë de kai Emausu. Di köndë aki bi dë söwan ëlufu kilomëti longi ku Jelusalën. 14 Nöö di de dë a pasi nango, hën de ta da woto ta taki u hii dee soni dee bi pasa.

15 Di de ta da woto te wan pisi, hën Jesosi seei waka ko miti de, hën a waka makandi ku de. 16 Ma a bi dë kuma wojo u de bi ko dungu u de an si ën sabi. 17 Hën a hakisi de taa: „Wë, un woto un ta da taangataanga sö?” Hën de taanpu piii tjalitjali. 18 Hën wan u de di de ta kai Kelopasi taa: „Ja jei dee gaan soni dee pasa a Jelusalën dee daka aki nö? A sa kë taa a woto köndë i kumutu mbei ja jei ën nö?” 19 Hën a hakisi de taa: „Un soni?” Hën de taa: „Dee soni dee pasa ku Jesosi di womi u di köndë Nazalëti. A bi dë wan tjabukama, nöö a bi du sömëni foombo soni a Gadu ku libisëmbë fesi. Dee soni dee a bi ta taki, ku dee soni dee a bi ta du tuu bi ta lei taa a bi abi makiti. 20 Ma dee fesima u dee begima ku dee gaanwomi leifi ën da dee sëmbë u de pekëën a wan posu kii. 21 U bi mëni taa di womi aki hën bi o puu Isaëli a fuka. Ma disi da di u dii daka kaa di dee soni aki pasa. 22 Ma na di dë nöö, wanlö mujëë di dë bakama fëën ko taki wan foombo soni da u. De taa a di fuuku mamate, hën de go a di baaku ka de bi bei ën. 23 Ma de an bi si di dëdë sinkii fëën, ma de si wanlö basia u Gadu, nöö dee basia piki de taa a dë ku libi. 24 Hën so u dee wotowan dee bi dë ku u go a di geebi, hën de si taa soni bi dë leti kumafa dee mujëë bi taki. Ma de an bi si Jesosi.”

25 Hën Jesosi piki de taa: „Ma dee sëmbë aki, wan ta fusutan soni möönsö. Andi mbei a taanga da unu sö fuun biibi dee soni di dee tjabukama u Gadu bi taki? 26 Wan bi sabi taa di Keesitu bi musu tja dee sitaafu aki ufö a feni makiti a liba ala u?” 27 Hën a bigi taki soni u dee soni di Mosesi ku dee woto tjabukama u Gadu bi sikifi di ta lei gbelingbelin andi di Wöutu u Gadu bi taki fëën a fesi.

28 Nöö hën de ko zuntu ku di köndë ka de bi nango, hën Jesosi mbei kuma a kë waka pasa. 29 Hën de begi ën faa fika ku de. De taa: „Gaantangi, fika ku u aki. Biga a ko lati kaa. Abiti möön kamian o dungu.” Nöö hën Jesosi fika ku de naandë. 30 Nöö hën di de go sindo ta njan, hën Jesosi tei di bëëë, hën a da Gadu tangi te a kaba, hën a booko ën paati da de. 31 Nöö di juu dë, hën wojo u de ko limbo gbegedee. De ko fusutan taa Jesosi hën di dë. Ma te u de kë mëni, hën de an si ën möön. 32 Nöö hën de ta fan ku de na de taa: „Fëën mbei u bi ta fii piizii a u hati sö di a bi ta fan ku u a pasi ta puu di Wöutu u Gadu da u.” 33 Nöö hën de hopo, hën wantewante dë de toona go a Jelusalën, hën de si dee ëlufu apösutu u Jesosi ku wanlö woto bakama fëën makandi. 34 Hën dee apösutu ku dee woto bakama u Jesosi piki de taa: „Jesosi weki ko a libi baka tuu, biga Simön seei si ën!” 35 Hën dee tu bakama u Jesosi seei konda andi bi pasa di de bi dë a pasi. Söseei de konda taa di Jesosi booko di bëëë paati da de, nëën ufö de ko fusutan taa hën di dë.

36 Di de bi dë ta taki dee soni dë, hën Jesosi ko dë taanputaanpu a de dendu dë, hën a taa: „Be Gadu limbo pasi da unu.” 37 Ma di de si ën, hën de panta seei u di de mëni taa de si wan taku soni. 38 Hën Jesosi piki de taa: „Faandi mbei un panta gaanfa sö, nöö faandi mbei wan kë biibi? 39 Un luku mi maun ku mi futu aki, mi seei hën disi. Biga taku soni an ta abi mbeti ku bonu kumafa un si mi abi aki.” 40 Wë nöö di a taki sö da de kaa, hën a lei de hën maun ku hën futu. 41 Ma di soni bigi da de te na soni. De wai te a dë sö kuma de an sa biibi ën. Hën a hakisi de taa: „Un abi soni u njan aki ö?” 42 Nöö hën de tei wan pisi fisi jasajasa tëndë dëën. 43 Hën a tei ën njan leti a de fesi dë be de si.

44 Hën a piki de taa: „Wë hii dee soni aki tuu mi bi taki da unu di mi bi dë ku unu. Mi bi taki da unu taa hii dee soni dee nama ku mi dee dë sikifisikifi a dee Wëti dee Gadu bi da Mosesi ku dee buku u dee tjabukama, ku dee kanda buku, musu pasa tuutuu.” 45 Hën a mbei wojo u de ko limbo u de sa fusutan andi di Wöutu u Gadu kë taki. 46 Hën a piki de taa: „A sikifi a di Wöutu u Gadu taa di Keesitu bi o tja sitaafu, ma a di u dii daka fëën, nöö a o weki ko a libi baka. 47 De o ta paaja di buka a di në fëën taa sëmbë sa bia de libi ko a Gadu, söseei taa de sa feni paadon u dee hogilibi u de. De o paaja di buka aki da hii pei nasiön sëmbë, nöö a Jelusalën fosu de o bigi. 48 Un musu konda hii dee soni dee pasa aki da wotowan. 49 Wë mi o manda di soni di mi Tata bi paamusi ko da unu. Ma un musu fika a Jelusalën u te kuma kaakiti kumutu a liba ala ko a unu.”

50 Baka di dë, hën Jesosi tja de go te a Betania, hën a hopo maun a de liba hën a begi Gadu be soni waka bunu da de. 51 Nöö an kaba seei, hën Gadu tei ën tja go a liba ala. 52 Hën de tjökö kini a goon gafëën, hën de bia toona go a Jelusalën ku gaan piizii. 53 Nöö hii daka de bi ta dë a di Wosu u Gadu ta gafa Gadu.