Dee soni dee Mateosi sikifi
24 Di Jesosi bi ta kumutu a di Wosu u Gadu, hën dee bakama fëën ko nëën, hën de piki ën faa luku unfa di Wosu u Gadu waiti tjika. 2 Hën a piki de taa: „Un si hii dee soni aki ö? Mi taki da unu e, wan daka ta ko ka na wan u dee sitonu aki o fika woto a woto liba. De tuu de o booko tuwë a goon.”
3 Di Jesosi bi dë sindosindo a di Oleifi Kuun, hën dee bakama fëën ko nëën apaiti, hën de hakisi ën taa: „Na un ten dee soni aki o pasa? Un maaka joo lei u fuu sabi taa i toona ko?* Söseei un maaka joo lei u taa di ten u dë aki o kaba?”*
4 Hën Jesosi piki de taa: „Un köni be sëmbë an ganjan unu. 5 Biga sömëni sëmbë o ko, nöö de o taki taa: ’Mi da di Keesitu’, nöö de o feni sömëni sëmbë ganjan. 6 Woon ta jei taa feti ta feti a peipei kamian. Ma wan musu panta e, biga dee soni aki musu pasa, ma nëën da di kaba dou jeti.
7 Di juu dë, nöö wan köndë o hopo go feti ku wan woto köndë, söseei wan könu o hopo go feti ku wan woto könu. A sömëni kamian hangi pena o ko, goon o ta seki, söseei kamian o ta bai ta latja. 8 Hii dee soni aki dë kuma di pen di wan mujëë ta fii te a dë u pai.
9 Sëmbë o du hogi ku unu, söseei de o kii unu. Nöö sëmbë o ta buuse unu u mi në hedi. 10 Sömëni sëmbë o go disa di biibi, nöö de o ta tja de na de go sei, söseei de o ta buuse de na de. 11 Sömëni sëmbë o ta konda taa de dë tjabukama u Gadu, ma de an dë tjabukama u Gadu tuutuu, nöö de o ganjan sömëni sëmbë. 12 Nöö u di sëmbë o ko ta möön hogi daka fu daka, mbei gaansë u sëmbë an o ta lobi de na de möön. 13 Ma di sëmbë di hoi dou te a di kaba, hën o fika a libi. 14 Di bunu buka u di Tii u Gadu o paaja te dou hii di goonliba u hii föluku musu jei, nöö nëën ufö di kaba o dou.
15 Te un si di gaan hogi di ta poi soni di di tjabukama Daniëli bi taki soni fëën, ko dë taanputaanpu a di apaiti kamian a di Wosu u Gadu, (be di sëmbë di ta lesi di soni aki buta pakisei nëën faa musu fusutëën bunu) 16 nöö dee sëmbë dee ta libi a Judea musu kule go a dee kuun. 17 Di sëmbë di dë a daki liba an musu saka ko a wosu ko tei lai, 18 nöö di sëmbë di dë a goon dendu, an musu bia go a wosu go tei di djakiti fëën. 19 A o tjali möönsö da dee mujëë dee dë ku bëë ku dee dë ku miii a maun a di ten dë! 20 Un musu ta begi Gadu nöömö be waanfu fusi a di kötö pisiten u di jaa, nasö a Saba daka. 21 Biga wan gaan fuka o ko di sëmbë an bi si sensi di goonliba seti te kisi di ten fuu aki, nöö an o pasa möön tu. 22 Ee Gadu an sati di ten u di gaan fuka dë, nöö na wan sëmbë o fika a libi. Ma Gadu o sati ën u dee sëmbë dee a tei ko sëmbë fëën hedi.
23 Ee wan sëmbë ko piki unu taa: ’Un luku di Keesitu aki’, nasö ’un luku ën ala’, nöö wan musu biibi ën e. 24 Biga ganjanganjan Keesitu ku ganjanganjan tjabukama o ko dë di o du sömëni foombo soni u ganjan sëmbë. Ee a bi sa, nöö de bi o ganjan dee sëmbë dee Gadu tei tu. 25 Wan musu fëëkëtë dee soni dee mi ta piki unu aki e. 26 Fëën mbei ee sëmbë ko piki unu taa: ’Un ko luku, a dë a di sabana aki’, nöö wan musu go e. Ee de ko piki unu taa: ’Un ko luku, a dë a wan kamba aki’, nöö wan musu biibi de. 27 Biga te di sëmbë di ko dë Libisëmbë Miii aki o ko,* nöö a o dë leti kuma te faja ta koti a liba ala a di së u sonu kumutu, nöö sëmbë sa si ën te a di së u sonu go. 28 Ka soni dëdë pondi a wan kamian, nöö naandë dee tingifou ta hai ko zunta.
29 Wantewante baka di gaan fuka u di ten dë, nöö di sonu o ko dungu kankan, nöö di liba wojo an o tuwë limbo möön tu. Dee teeja o ta kai kumutu a liba ala, söseei hii soni u mundu ala o ta seki. 30 De o si di maaka u di sëmbë di ko dë Libisëmbë Miii a liba ala, nöö hii sëmbë u goonliba aki tuu o ta bai ta këë te na soni. Nöö de o si di sëmbë di ko dë Libisëmbë Miii ta saka ta ko a dee bundji liba ku gaan makiti ku hei. 31 A o manda dee basia fëën go böö wanlö gaan tutu, nöö de o go a dee fö huku u goonliba u de go pii hii dee sëmbë dee Gadu kai tja ko buta a wan kamian. De o bigi a wan së u liba ala te go dou a di woto së.
32 Un buta pakisei a di fuuta pau de kai figa. Te un si di pau dë ta buta njunjun uwii, nöö un ta sabi taa a deewei buka u dë. 33 Wë leti sö nöö, te un ta si dee soni dee mi bi taki da unu aki ta pasa, nöö un musu sabi taa di sëmbë di ko dë Libisëmbë Miii dë leti a dööbuka dë. 34 Mi taki da unu e, dee sëmbë u di ten aki an o dëdë ufö hii dee soni aki pasa. 35 Di goonliba ku di mundu o kaba a sösö, ma dee soni dee mi ta taki da unu aki an o lasi kaba a sösö möönsö.
36 Na wan sëmbë sabi di daka ku di juu di dee soni aki o pasa. Dee basia u Gadu a liba ala ku di Womi Mii seei an sabi ën. Ma di Tata wanwan sabi ën. 37 Leti kumafa soni bi waka a di ten u Noa, sö nöö soni o dë a di ten di di sëmbë di ko dë Libisëmbë Miii o toona ko.* 38 Ufö di Gaan Wata ko, nöö sëmbë u di ten naandë bi dë ta njan ta bebe, ta tööu, u tee dou di daka Noa go a di gaan sipi. 39 Dee sëmbë an bi ta buta pakisei a dee soni dee bi ta pasa, u tefa tjuba kai djulululu sawa de tuu fia tja go kii. Sö nöö soni o dë te di sëmbë di ko dë Libisëmbë Miii toona ko. 40 A di ten dë, tu womi o dë a goon dendu ta wooko, nöö Gadu o tei wan tja go, nöö a o disa di wotowan. 41 Tu mujëë o dë ta fon alisi, nöö Gadu o tei wan tja go, nöö a o disa di wotowan. 42 Fëën mbei un musu ta dë setiseti hii juu, biga wan sabi un daka di Masa fuunu o toona ko.
43 Ma un kai pakisei a di soni aki: Ee di sëmbë di abi di wosu bi sabi na un juu di fufuuma bi o ko, nöö a bi o dë ku wojo setiseti ta wakiti ën. An bi o dëën pasi faa ko booko di wosu fëën. 44 Fëën mbei un musu dë setiseti e. Biga di sëmbë di ko dë Libisëmbë Miii o ko a wan juu di wan bi mëni.
45 Ambë da di köni saafu di dë u futööu, di hën masa buta u da dee woto saafu njanjan a di juu di de abi ën fanöudu? 46 A o bunu seei da di saafu dë te hën masa dou, nöö a si taa a ta du di wooko! 47 Mi taki da unu e, di masa fëën o butëën faa luku hii dee gudu dee a abi.
48 Ma ee di saafu aki abi hogihati, nöö a sa ko pakisei taa: ’Mi masa an o ko jeti.’ 49 Nöö a o bigi ta fon dee woto saafu, söseei a o ta njan ta bebe ku dee daanma. 50 Di masa u di saafu dë o ko a wan daka, söseei a wan juu di an bi mëni, 51 nöö a o sitaafu ën wan gaan hogi sitaafu. A o butëën ka dee bödjëëma ta dë, nöö naandë a o dë ta këë, ta njan tanda.