Dee soni dee Mateosi sikifi

10 Jesosi kai dee tuwalufu bakama fëën ko nëën, hën a da de makiti u de puu taku soni a sëmbë liba. Söseei a da de makiti u kula hii pei siki ku hii pei suwaki.

2 Dee në u dee tuwalufu apösutu* da: Simön, hënseei de bi ta kai Petuisi tu, ku hën baaa Andiasi. I bi abi Jakobosi ku hën baaa Johanisi, dee womi mii u Zebedeosi. 3 Nöö i bi abi Filipi, ku Batolomisi, ku Tomasi, ku Mateosi di bi ta pii lanti möni, söseei i bi abi Jakobosi di womi mii u Alufasi. Boiti di dë, i bi abi Tadeosi, 4 Simön, di bi dë kabakaba u du soni, ku Judasi Isikaliötu, di bi sei Jesosi bakaten.

5 Di Jesosi bi manda dee tuwalufu apösutu fëën u de go konda di buka u Gadu da sëmbë, hën a piki de taa: „Wan musu go a dee pisiwata u dee woto köndë sëmbë e, nöö wan musu go a dee köndë u dee Samalia sëmbë tu. 6 Ma a dee Isaëli sëmbë dee dë kuma lasilasi sikapu wanwan nöö un musu go. 7 Te woon go a dee sëmbë, nöö un musu taki taa: ’Di Tii u Gadu di dë a liba ala ko zuntu.’ 8 Un kula dee suwakima. Ee wan sëmbë dëdë, nöö un weki ën ko a libi baka. Un kula dee sëmbë dee abi kököbë. Un jaka dee taku soni puu a sëmbë liba. De da unu soni u sösö, nöö unuseei musu da sëmbë soni u sösö tu. 9 Fa un nango aki, wan musu tja goutu, soofu, nasö köpö a di möni saku fuunu e. 10 Wan musu tja soni u njan tu. Wan musu tja wan woto koosu, nasö wan woto susu boiti di woon bisi dë, söseei wan musu tja wan woto kokoti tu. Biga di sëmbë di ta wooko, hën fiti u kisi soni u njan.

11 Ee woon go a wan piki köndë nasö ee woon go a wan gaan köndë, nöö un suku sëmbë di o tei unu ku wai. Nöö a di wosu dë un musu tuwë lai, u te woon toona go baka. 12 Te woon denda a di wosu, nöö un da dee sëmbë odi.* 13 Ee dee sëmbë u di wosu tei unu ku wai, nöö de o feni wini fëën. Ma ee de an tei unu ku wai, nöö de an o feni wini fëën. 14 Ee un go a wan köndë nasö ee un go a wan wosu ka sëmbë an tei unu ku wai, nöö un musu kumutu dë. Te un nango, nöö un musu feki di sandu di dë a unu basufutu puu tuwë disa naandë. 15 Mi taki da unu taa a di daka di Gadu o kuutu libisëmbë, nöö di köndë dë o kisi wan möön gaan hebi sitaafu möön fa di köndë Sodöm ku di köndë Gomola bi kisi.

16 Un haika e, fa i si mi ta manda unu go aki, mi ta manda unu go kuma sikapu a taku mbeti dendu. Nöö un musu ta dë köniköni kuma sindeki, söseei un musu dë kuma pomba di an ta du hogi. 17 Un musu dë ku wojo e, biga sëmbë o tja unu go a kuutu, söseei de o tja unu go wipi a dee wosu ka dee Dju nango dini Gadu. 18 De o tja unu go a dee könu ku dee hedima u köndë, u mi në hedi. Nöö naandë woon feni pasi konda soni u mi da de, söseei da dee woto köndë sëmbë. 19 Nöö te de o tja unu go a kuutu, nöö wan musu ta booko unu hedi ta hakisi unuseei ee andi woon taki e. Biga a di juu dë, Gadu o mbei un sabi andi un musu taki. 20 Nöö an o dë taa unu hën o fan di fan naandë e, ma di kaakiti u Gadu hën o heepi unu fuun sa fan. 21 Nöö mi taki e, taa wan baaa o tja hën baaa go sei u de tja go kii. Wan tata o tja hën mii go sei u de tja go kii. Söseei miii o hopo fia ku de mama ku de tata, nöö de o mbei sëmbë tja de go kii tu. 22 Hii sëmbë o buuse unu, u di un dë bakama u mi hedi. Ma di sëmbë di hoi dou te a di kaba pisi, nöö hën o feni libi. 23 Te de ta du ku unu a wan köndë, nöö un fusi go a wan woto köndë. Biga wan o sa kaba konda di buka u Gadu da hii dee köndë u dee Isaëli sëmbë tuu, ufö di sëmbë di ko dë Libisëmbë Miii toona ko.

24 Di sëmbë di ta tei lei an sa hei möön di sëmbë di ta lei ën. Nöö wan saafu an sa hei möön di masa fëën. 25 Ma wan sëmbë di ta lei musu wai kaa te a ko dë kuma di sëmbë di ta lei ën. Nöö wan saafu musu wai te a ko dë kuma di masa fëën. Wë ee sëmbë kai di hedima u di wosudendu Didibi,* nöö an dë u taki taa de o kai dee sëmbë fëën wosudendu sö tu! 26 Fëën mbei wan musu fëëë de. Biga na wan soni sa dë a tjubi te nöö an o ko a döö. Nöö na wan soni sa pasa te nöö sëmbë an o ko sabi ën. 27 Dee soni dee mi ta konda da unu a së, nöö de un musu konda da lanti. Nöö dee soni dee mi ta piki unu sapisapi, de un musu konda da hii sëmbë. 28 Wan musu fëëë dee sëmbë dee sa kii unu, ma di an sa mbei un feni libi a di ten di ta ko. Ma un musu fëëë di sëmbë di sa kii unu a Gehëna.* 29 Sëmbë ta sei tu piki fou u wan köpösënsi,* na sö nö? Ma tökuseei na wan u dee fou aki ta puu kai a goon, nöö di Tata fuu a liba ala an sabi. 30 Te kisi di un mëni uwii di dë a unu hedi seei a sabi. 31 Fëën mbei wan musu booko unu hedi, biga un bumbuu gaanfa möön hii dee piki fou aki.

32 Ee wan sëmbë an ta fëëë u piki a lanti fesi taa mi ku ën nama, nöö miseei an o fëëë u piki mi Tata di dë a liba ala taa mi ku ën nama. 33 Ma ee wan sëmbë ja kë piki a lanti fesi taa mi ku i nama, nöö miseei ma o piki mi Tata di dë a liba ala taa mi ku i nama. 34 Ma ko u tja bööböö libi ko a goonliba aki e. Ma mi ko u paati sëmbë ku sëmbë.* 35 Mi ko u ko paati wan womi mii ku hën tata. Mi ko u ko paati wan mujëë mii ku hën mama. Söseei mi ko u ko paati wan mujëë ku hën mai. 36 Dee möön gaan felantima di wan sëmbë o abi, o dë dee famii fëën seei. 37 Di sëmbë di lobi hën tata nasö hën mama möön mi, an bunu tjika u waka a mi baka. Söseei di sëmbë di lobi dee mii fëën möön mi, an bunu tjika u waka a mi baka. 38 Nöö di sëmbë di an kë tja di posu* fëën, an bunu tjika u waka a mi baka tu. 39 Di sëmbë di kë tjubi di libi fëën, o lasi ën. Ma di sëmbë di lasi hën libi u di a dë bakama u mi hedi, o feni libi.

40 Ee wan sëmbë du bunu da unu, nöö miseei wë a du bunu da kaa e. Nöö ee wan sëmbë du bunu da mi, nöö di Sëmbë di manda mi ko a goonliba aki seei wë a du bunu da tu. 41 Gadu o mbei dee tjabukama ku dee sëmbë dee ta libi a wan leti fasi, feni gaan bunu. Ee wan sëmbë tei de a wosu, nöö a o feni dee gaan bunu dë tu. 42 Mi taki da unu e, hiniwan sëmbë di da wan u dee bakama* u mi wan kan wata seei faa bebe u di a dë wan bakama u mi hedi, sa dë seiki taa a o feni di paka fëën nöömö.”