Dee soni dee Lukasi sikifi

6 A wan Saba daka, Jesosi ku dee bakama fëën bi ta waka pasa a wan goon ka sëmbë ta paandi wan soni kuma alisi sö. Di de ta pasa, hën dee bakama fëën bigi ta booko dee soni dee bi dë kuma alisi ta buuka ta njan. 2 Di so u dee Faliseima si di soni dë, hën de taki taa: „Faandi mbei wan ta hoi di Wëti u di Saba daka?” 3 Hën Jesosi piki de taa: „Wan bi lesi a Gadu Buku andi Dafiti ku dee womi dee bi ta waka ku ën bi du di hangi bi kisi de u? 4 Di a go a di Wosu u Gadu, hën de dëën dee bëëë di de bi buta apaiti da Gadu. A njan dee bëëë, söseei a da dee womi dee bi dë makandi ku ën u de njan tu. Ma dee Wëti an bi ta da de pasi u de njan mën. Dee begima wanwan nöö bi sa njan mën. Na sö nö?” 5 Hën a piki de taa: „Di sëmbë di ko dë Libisëmbë Miii abi taki a Saba daka liba.”

6 Wan woto Saba daka, hën Jesosi go a di wosu ka dee Dju nango dini Gadu. Nöö wan womi di letisë maun fëën bi lan, bi sai dë. 7 Dee sabima u Wëti ku dee Faliseima bi dë leti naandë ta luku ee Jesosi a o kula di womi a di Saba daka dë, biga de bi kë feni föutu nëën nömönömö. 8 Jesosi bi sabi andi de bi ta pakisei. Fëën mbei a piki di womi di maun fëën bi lan taa: „Hopo, nöö i ko taanpu a mindi aki.” Hën di womi hopo go taanpu dë. 9 Hën Jesosi hakisi de taa: „Wë unfa di Wëti ta taki? Undi möön bunu? Fii du bunu a Saba daka, naa fii du hogi? Fii musu puu sëmbë a dëdë buka, naa fii disëën faa dëdë?” 10 Nöö hën a luku hii dee sëmbë dee bi sai dë, hën a piki di womi taa: „Tëndë di maun fii ko i si.” Hën di womi tëndë di maun fëën, hën di maun fëën ko bëtë. 11 Nöö hën dee sabima u Wëti ku dee Faliseima hati ko boonu ku Jesosi te na soni. Hën de bigi kuutu ku deseei luku andi de o du ku ën.

12 Wan daka, hën Jesosi go a wan kuun liba go begi Gadu, nöö hën a fika ala ta begi wan hii ndeti. 13 Di mamate fëën, hën a kai dee bakama fëën u de ko nëën. Nöö hën a tei tuwalufu u de, hën a kai de apösutu. 14 I bi abi Simön, di a bi ta kai Petuisi tu, ku hën baaa Andiasi. I bi abi Jakobosi, Johanisi, Filipi, Batolomisi, 15 Mateosi, Tomasi, söseei i bi abi Jakobosi di womi mii u Alufasi. Boiti di dë, i bi abi Simön, di bi dë wan gaagaa womi, 16 Judasi, di womi mii u Jakobosi, ku Judasi Isikaliötu, di bi sei Jesosi bakaten.

17 Nöö hën de ku Jesosi bazia di kuun dou a wan palala kamian. Nöö sömëni u dee bakama fëën bi sai dë. Söseei sömëni sëmbë u Judea ku Jelusalën ku sëmbë u dee tu köndë dee ta dë a di ze bandja de kai Tilusi ku Sidön bi sai dë tu. De ko haika dee soni dee a ta lei sëmbë, söseei faa kula de. 18 So sëmbë bi abi taku soni a de liba ta toobi de, nöö hën Jesosi puu de da de. 19 Hii sëmbë bi ta mbei möiti u de nama nëën, biga di kaakiti di bi ta kumutu nëën bi ta kula hii de tuu.

20 Nöö hën Jesosi hopo wojo luku dee bakama fëën, hën a taa:

„Un dee möfina sëmbë aki, un dë bunu e, u di unu abi di Tii u Gadu.

21 Un dee sëmbë dee hangi kisi, un dë bunu e, u di bëë fuunu o fuu.

Un dee sëmbë dee ta këë, un dë bunu e, u di di këë fuunu o bia ko lafu.

22 Un dë bunu e, te sëmbë ta buuse unu, ta puu unu a de mindi ta sösö unu ta poi unu në u di sëmbë di ko dë Libisëmbë Miii hedi. 23 Un musu ta wai e. Un musu ta piizii seei, u di woon feni wan gaan bunu a Gadu a liba ala. Biga sö nöö de bi du ku dee tjabukama u Gadu dee bi dë ufö unu.

24 Ma helu u dee guduma, u di de feni hii soni di de bi musu feni kaa.

25 Helu u dee sëmbë dee bëë u de dë fuufuu, u di hangi o kisi de.

Helu u dee sëmbë dee ta lafu, u di bakaten këë nöö de o ta këë.

26 Helu u dee sëmbë di hii sëmbë lo’ u gafa, u di sö nöö dee avo u de bi ta gafa dee poipoi tjabukama.

27 Ma mii ta taki da unu taa un musu ta lobi dee felantima fuunu, ta du bunu da dee sëmbë dee ta buuse unu, 28 ta wensi bunu da dee sëmbë dee ta kosi unu, söseei un musu ta begi da dee sëmbë dee ta wisiwasi unu. 29 Ee wan sëmbë naki i baaimaun a bandjajesi, nöö i bia di woto së dëën be a toona naki i. Nöö ee wan sëmbë tei di djakiti fii, nöö ja musu tapëën fu an tei di soni di i bisi a di djakiti fii basu tu. 30 Ee wan sëmbë hakisi i wan soni, nöö i musu dëën. Ee wan sëmbë tei soni fii, nöö ja musu hakisi ën faa toona da i ën baka.

31 Hii soni di un kë u sëmbë du da unu, un musu du da de.

32 Ee dee sëmbë dee lobi unu nöö un ta lobi, nöö un wini fëën seei woon feni? Biga dee sëmbë dee na ta libi bunu a Gadu wojo seei ta lobi dee sëmbë dee lobi de. 33 Ee dee sëmbë dee ta du bunu da unu wanwan nöö un ta du bunu da, nöö un wini fëën seei woon feni? Biga dee sëmbë dee na ta libi bunu a Gadu wojo seei ta libi sö. 34 Ee un leni wan sëmbë wan soni u di un sabi taa a o toona da unu ën baka, nöö un wini fëën seei woon feni? Biga dee sëmbë dee na ta libi bunu a Gadu wojo ta juu de na de soni sö taa de sa toona feni dee soni u de baka. 35 Ma un musu ta lobi dee felantima fuunu, söseei un musu ta du bunu da sëmbë. Te un ta leni wan sëmbë wan soni, nöö wan musu dë ku di mëni taa woon feni soni nëën baka. Te un du dee soni aki, nöö woon feni gaan bunu, söseei woon dë miii* u di Möön Heiwan. Biga a ta du bunu da dee sëmbë dee an ta dëën tangi, te kisi dee hogihati sëmbë tuu. 36 Un musu ta abi tjalihati u wotowan, leti kumafa unu Tata abi tjalihati u wotowan.

37 Wan musu kuutu sëmbë möön e, nöö Gadu an o kuutu unu tu. Wan musu suku föutu a wotowan möön, nöö Gadu an o suku föutu a unu tu. Un musu ta da wotowan paadon,* nöö Gadu seei o da unu paadon. 38 Un musu lo’ u da wotowan soni, nöö sëmbë o ta da unu soni tu. De o fuu wan manda ta zin ta fugu tee di manda an sa tei möön, nöö de o lai ën go a di saku u di koosu fuunu. Biga di fasi fa un ta libi ku wotowan, sö de o libi ku unu tu.”

39 Hën a konda wan woto da de. A taa: „Wan bookowojoma an sa tja wan woto bookowojoma, na so nö? De tuu o kai go a ngötö. 40 Di sëmbë di ta tei lei an sa hei möön di mësitë fëën, ma hiniwan sëmbë di de lei soni bumbuu sa ko dë kuma di mësitë fëën. 41 Wë nöö faandi mbei i ta luku di pau pisi di dë a i baaa wojo, ma ja ta si di posu di dë a di u fii seei wojo? 42 Nasö unfa i sa piki i baaa taa: ’Womi o, be mi puu di pau pisi di dë a i wojo da i’, hii fa ja ta si di posu di dë a di u fii seei wojo? I bödjëëma ju! Puu di posu di dë a i wojo fosu, nöö joo si soni bumbuu fii sa puu di pau pisi di dë a i baaa wojo.

43 Wan bumbuu pau an sa pai poipoi njanjan, nöö wan poipoi pau an sa pai bumbuu njanjan tu. 44 A di pau njanjan nëën i ta sabi un pei pau a dë. Sëmbë an ta booko di fuuta de kai figa a wan maka pau, söseei de an ta booko doloifi a wan maka pau tu. 45 Wan bunuhati sëmbë ta taki bumbuu soni, u di bumbuu soni nöö dë nëën hati. Ma wan hogihati sëmbë ta taki hogihati soni u di hogi wanwan nöö dë nëën hati. Biga di soni di fuu hën hati, hën buka fëën ta taki.

46 Faandi mbei un ta kai mi ’Masa’, ma wan ta du dee soni dee mi ta taki da unu fuun du? 47 Hiniwan sëmbë di ko a mi, nöö a jei dee soni dee mi taki, hën a ta du de, 48 dë kuma wan womi di mbei di wosu fëën. Nöö a seti di goonsei a wan sitonu liba. Nöö bakaten wan gaan tjuba kai singi di kamian, nöö di wata bi ta naki di wosu, ma töku di wosu an booko kai möönsö. A fika taanputaanpu a pë u di de seti ën bunu. 49 Ma hiniwan sëmbë di jei dee soni dee mi taki, nöö an ta du de, dë kuma wan womi di mbei di wosu fëën a sandu liba söndö goonsei. Di di wata naki di wosu, hën wantewante dë di wosu booko kai kaba a sösö fiaa.”