Dee soni dee Lukasi sikifi
5 Wan daka, hën Jesosi bi dë zuntu ku di ze u Ganesalëti.* Dee sëmbë dee bi sai dë ta haika di Wöutu u Gadu, bi ta pusa ko nëën u de jei möön bunu. 2 Hën a si tu boto a lampeesi dë. Wanlö womi dee bi go kisi fisi bi kumutu a dee boto ta wasi dee nëti u de. 3 A subi a di boto u Simön, hën a hakisi ën faa tuusi di boto go a mindi wata pikisö. Hën a sindo a di boto ta lei dee sëmbë dee bi dë a tela soni. 4 Di a fan ku de te a kaba, hën a piki Simön taa: „Puu di boto go a mindi wata, nöö un tuwë dee nëti fuunu be un kisi fisi.” 5 Ma Simön piki ën taa: „Mësitë o, hii di ndeti u tuwë nëti. Wa kisi na wan hojo soni. Ma di i taki sö, nöö u sa tuwë luku.” 6 Hën de tuwë nëti a wata, hën de kisi fisi teee dee nëti u de bigi ta tënë. 7 Nöö hën de bai kai dee woto womi dee bi dë a di woto boto, u de ko heepi de. Di de ko a de, hën de ta puu dee hia fisi ta buta a de tu boto teee a fika piki, nöö de tu boto tuu bi singi. 8 Nöö di Simön Petuisi si sö, hën a tjökö kini a goon a Jesosi fesi. Hën a taa: „Masa, na ko a mi bandja e! Biga mi da wan hogiduma.” 9 A bi taki sö, u di hën ku dee woto womi dee bi sai dë bi foondo seei taa de bi kisi sö hia fisi. 10 Jakobosi ku Johanisi, dee womi mii u Zebedeosi seei bi foondo tu. De bi ta wooko makandi ku Simön. Ma Jesosi piki Simön taa: „Na fëëë e womi. Tide seei mi o mbei i ko ta kisi libisëmbë kumafa de ta kisi fisi.” 11 Hën de tja dee boto u de go a lampeesi, hën de disa hii soni u de dë, hën de go ta waka a Jesosi baka.
12 Wan woto pasi di Jesosi bi dë a wan u dee köndë, hën wan womi bi sai dë di kököbë bi kisi a hii hën sinkii. Di di womi si Jesosi, hën a tjökö kini a goon nëën fesi, hën a begi ën taa: „Ee i kë, nöö i kula mi baa.” 13 Hën Jesosi tëndë maun panjëën, hën a taa: „Aai, mi kë! Ko bëtë.” Nöö hën wantewante dë a ko bëtë. 14 Hën Jesosi piki di womi taa an musu piki na wan sëmbë. Ma a piki ën taa: „Go a di begima be a luku i, nöö i tja di soni di di Wëti u Mosesi bi taki taa wan sëmbë di ko limbo musu tja go tjuma da Gadu, be de si taa i bëtë tuutuu.” 15 Ma tökuseei soni u Jesosi paaja a hii di kamian. Nöö gaan hia sëmbë bi ta ko haika dee soni dee a bi ta lei sëmbë, söseei de bi ta ko nëën faa kula de. 16 Ma hii fa a bi dë sö, tökuseei Jesosi bi lo’ u go a dee sabana go begi hën wanwan.
17 Wan woto daka di Jesosi bi ta lei sëmbë soni a wan wosu dendu, hën wanlö Faliseima ku wanlö sabima u Wëti bi sai dë tu. De bi kumutu a hii dee köndëköndë u Galilea ku Judea, söseei de bi kumutu a Jelusalën tu. Jehoufa* bi da Jesosi di kaakiti fëën faa kula dee suwakima. 18 Hën wanlö womi tja wan lanma di bi dë kandikandi a wan bedi* ko naandë. De bi ta mbei möiti u de tjëën go dou a Jesosi. 19 Ma u di sëmbë bi hia a di kamian, mbei de an bi sa feni pasi u go dou a Jesosi. Fëën mbei de subi go a di wosu liba, hën de mbei wan baaku, hën de saka di lanma a wan bedi ko buta leti a Jesosi fesi a goon dë. 20 Di a si fa di biibi u dee sëmbë bi taanga tjika, hën a taa: „Womi o, mi da i paadon u dee hogilibi fii e.” 21 Hën dee sabima u Wëti ku dee Faliseima ta hakisi de na de taa: „Ambë da di sëmbë di ta wisiwasi Gadu dë? Ambë tjika u da sëmbë paadon u dee hogilibi u de boiti Gadu?” 22 Ma u di Jesosi bi sabi andi de bi ta taki, mbei a hakisi de taa: „Faandi mbei un ta pakisei sö? 23 Undi u dee soni aki möön fukë u taki a buka? Fii taa: ’Mi da i paadon u dee hogilibi fii’, naa fii taa: ’Hopo, nöö i waka go?’ 24 Ma mi kë lei unu taa di sëmbë di ko dë Libisëmbë Miii abi makiti a goonliba aki u da sëmbë paadon u dee hogilibi u de.” Hën a bia piki di lanma taa: „Mi taki e, hopo taanpu, nöö i tei di bedi fii, nöö i go a wosu.” 25 Hën a hopo, hën a tei di bedi fëën, hën a ta waka ta gafa Gadu nango nëën wosu. 26 Hii dee sëmbë dee bi sai dë foondo seei, hën de bigi ta gafa Gadu. De bi taa: „Aai dee sëmbë, u si foombo soni tide!”
27 Baka di dë, hën a si wan womi de kai Leifi dë sindosindo a wan kantoo ka de ta paka lantimöni. Hën a piki ën taa: „Ko dë bakama u mi.” 28 Hën di womi hopo disa hii soni fëën dë, hën a bigi waka nëën baka. 29 Baka di dë, hën Leifi hoi wan gaan piizii da Jesosi nëën wosu, nöö wanlö gaan hia pii-lantimönima ku wanlö woto sëmbë, ko njan makandi ku de. 30 Hën dee Faliseima ku dee sabima u Wëti bigi ta guunjan dee bakama u Jesosi, ta taki taa: „Faandi mbei un ta njan makandi ku dee pii-lantimönima ku dee sëmbë dee an ta libi bunu a Gadu wojo?” 31 Hën Jesosi piki de taa: „Sëmbë di dë bumbuu aanbi data fanöudu, ma dee sëmbë dee dë ku suwaki de abi data fanöudu. 32 Ma ko u mi ko kai sëmbë di dë bumbuu sëmbë kaa e, ma mi ko u mi ko kai dee sëmbë dee an ta libi bunu a Gadu wojo, u de sa bia libi.”
33 Hën de piki ën taa: „Dee bakama u Johanisi ku dee bakama u dee Faliseima ta begi ta dë söndö njan u wan pisiten, ma dee bakama fii ta njan ta bebe.” 34 Hën Jesosi piki de taa: „Te wan womi ta tööu, nöö ja sa mbei dee mati fëën dë söndö njan u wan pisiten, hii fa hën ku de dë makandi, na sö nö? 35 Ma wan ten o ko ka di womi di ta tööu an o dë ku de möön, nöö nëën ufö de o dë söndö njan u wan pisiten.”
36 A bi konda wan woto da de. A bi taa: „De an ta tei wan njunjun koosu pisi lapu wan awoo koosu e. Biga di njunjun koosu o hai di awoowan tënë. Söseei di njunjun koosu pisi an o kai ku di gaandiwan. 37 Leti sö nöö sëmbë an ta tei njunjun win lai a wan awoo mbeti kakisa saku e. Biga ee de du sö, nöö di njunjun win o soopu, nöö di saku o tënë, nöö di win ku di saku tuu o kaba a sösö. 38 Ma sëmbë musu lai njunjun win a wan njunjun mbeti kakisa saku. 39 Na wan sëmbë di ta bebe awoo win ta kë bebe njunjun wan, biga a o taki taa: ’Di awoo win suti möön di njunjun wan.’”