Dee soni dee Lukasi sikifi
23 Nöö hën hii dee sëmbë tuu hopo taanpu, hën de tja Jesosi go a Gaama Pilati. 2 Hën de bigi kaagi ën. De ta taki taa: „Di womi aki ta ganjan dee sëmbë fuu. A ta piki de taa de an musu paka Gaan könu lantimöni, söseei taa hën da di Keesitu, di könu.” 3 Hën Gaama Pilati hakisi ën taa: „Ju da di Könu u dee Dju tuu ö?” Hën Jesosi piki ën taa: „A dë leti kumafa i si gaama taki dë.” 4 Hën Gaama Pilati taki da dee fesima u dee begima ku hii dee woto sëmbë dee ko naandë taa: „Ma feni föutu a di womi aki e.” 5 Ma de bi ta piki nöömö taa: „A ta tja gaan toobi ko a hii di köndë ku dee soni dee a ta lei sëmbë a hii di pisiwata u Judea. Kumutu a Galilea tee ko dou a u aki.” 6 Di Gaama Pilati jei di soni aki, hën a hakisi ee di womi aki da wan Galilea sëmbë. 7 Baka di a ko fusutan taa di womi kumutu a wan pisiwata di Helodi ta tii, hën a mandëën go a Helodi. Biga a di juu dë Helodi bi dë leti a Jelusalën dë tu.
8 Di Helodi si Jesosi, hën a wai te na soni. Biga wan pisiten kaa a bi ta wakiti faa si Jesosi, u di a bi jei sömëni soni fëën. Söseei a bi kë faa du wan foombo soni dëën be a si. 9 Hën a bigi ta hakisi ën sömëni soni, ma Jesosi an bi ta piki ën. 10 Ma dee fesima u dee begima ku dee sabima u Wëti bi ta djombo tei fesi ta konda sömëni soni fëën ku hatiboonu da Helodi. 11 Hën Helodi ku dee sodati fëën bigi ta wisiwasi ën ta mbei ën fa. De bisi wan gaan waiti koosu dëën, hën de toona mandëën go a Gaama Pilati baka. 12 Nöö a di daka dë seei Gaama Pilati ku Könu Helodi ko dë mati, ma a fesi de bi dë felantima.
13 Hën Gaama Pilati kai hii dee fesima u dee begima ku dee hedima u Isaëli, ku hii dee woto sëmbë u di köndë u de ko nëën. 14 Hën a piki de taa: „Wë un tja di sëmbë aki ko a mi taa a du hogi. Un taa a ta tja gaan toobi ko a di köndë. Ma fa mi fini ën soni aki, nöö ma si föutu nëën. 15 Könu Helodi seei an bi feni föutu nëën tu, biga a toona mandëën ko a u aki baka. An du soni faa musu dëdë. 16 Fëën mbei mi o sitaafu ën, nöö mi o toona lusu ën da unu.” 17* —— 18 Hën hii dee sëmbë tuu bai taa: „Kii di womi aki, nöö i lusu Balabasi da u!” 19 (De bi buta di womi aki a dunguwosu u di a bi feti ku di tii u di köndë, söseei u di a bi kii sëmbë.) 20 Hën Gaama Pilati toona hakisi de wan pasi möön, u di a bi kë disa Jesosi be a go. 21 Hën de bigi ta bai taa: „Pekëën a wan posu kii! Pekëën a wan posu kii!” 22 Hën a toona hakisi de di u dii pasi taa: „Wë faandi mbei? Un hogi di womi aki du? Ma feni taa a du soni faa musu dëdë. Fëën mbei mi o sitaafu ën, nöö mi o toona lusu ën.” 23 Di Gaama Pilati taki di soni dë, hën de bigi ta bai möön taanga taa de musu kii Jesosi. Hën de ta bai möön taanga. 24 Hën Pilati bia du soni kumafa de taki. 25 A puu di sëmbë di de bi kë. Di sëmbë dë de bi buta a dunguwosu u di a bi feti ku di tii u di köndë, söseei u di a bi kii sëmbë. Ma nöö hën a disa Jesosi da de be de du ku ën kumafa de kë.
26 Di de bi dë a pasi nango, hën de si wan womi u di köndë Sileni de kai Simön. A bi kumutu a wan boiti kamian ta ko a ganda, hën de butëën faa tja di posu* u Jesosi dëën. 27 Wanlö gaan hia sëmbë bi ta waka nango a Jesosi baka, nöö wanlö mujëë seei bi dë a dendu tu. Dee mujëë aki bi ta bai ta këë te a bigi. 28 Hën Jesosi bia luku de, hën a taki da de taa: „Un dee mujëë mii u Jelusalën aki, wan këë u mi hedi möön e. Ma un musu këë fuunu seei ku dee mii fuunu hedi. 29 Biga wan ten o ko ka sëmbë o ta taki taa: ’Di ten di u dë aki bunu da dee mujëë dee an sa pai miii, ku dee mujëë dee na a’ miii a bobi!’ 30 Sëmbë o ta bai da dee gaan kuun taa: ’Un kai ko a u liba ooo!’ Söseei de o ta bai da dee piki kuun taa: ’Un kai ko tapa u!’ 31 Wë biga ee ku di kuwakuwa pau de ta du sö, nöö di dëëdëë pau wë?”
32 De bi ta tja tu woto womi go kii makandi ku Jesosi tu. Dee womi aki bi dë gaan hogiduma. 33 Di de dou a di kamian de ta kai Hedibonu Kamian, hën de peka Jesosi a di posu, hën de peka dee tu hogiduma nëën bandja. Wan u de bi dë a letisë maun fëën, nöö di wotowan bi dë a töötösë maun fëën. 34 Nöö hën Jesosi taa: „Taata o, na hoi dee sëmbë aki a bëë e, biga de an saandi de ta du.” Nöö hën dee sodati tuwë lötu luku ambë o feni dee koosulai fëën. 35 Wanlö sëmbë bi dë taanputaanpu ta luku dee soni dee ta pasa. Ma dee gaanwomi u di köndë bi ta mbei ën fa. De bi ta taki taa: „A bi ta heepi woto sëmbë, nöö be a heepi ën seei tu, ee hën da di Keesitu, di Sëmbë di Gadu tei.” 36 Dee sodati seei bi ta mbei ën fa. De bi tja gandjigandji win ko dëën faa bebe. 37 Hën de piki ën taa: „Ee i da di Könu u dee Dju, nöö i heepi iseei.” 38 De bi peka wan paanga a di posu hedi ka de bi sikifi taa: „Di Könu u dee Dju hën disi.”
39 Hën wan u dee hogiduma di bi dë nëën bandja seei bigi ta mbei ën fa. A bi taki taa: „Na i da di Keesitu nö? Wë nöö heepi iseei, nöö i heepi u tu!” 40 Hën di woto hogiduma bai ën. A piki ën taa: „Womi, ja ta fëëë Gadu nö? Ju ku di womi aki kisi di wan seei sitaafu. 41 Ma a fiti fuu kisi di lö sitaafu aki, biga uu bi du hogi. Ma di womi aki an du na wan hogi.” 42 Hën di womi taki möön taa: „Jesosi o, mëni mi te i toon Könu e.” 43 Hën Jesosi piki ën taa: „Mi ta paamusi i tide taa, joo dë ku mi a Paladëisi.”
44 Di juu dë, a bi dë tuwalufu juu sonuhati. Nöö hii di köndë ko dungu kankan u te dii juu sapate. 45 Di sonu an bi jabi möönsö. Hën di gaan degi koosu di bi dë a di Wosu u Gadu tënë zalalaa leti mindi. 46 Hën Jesosi bai taa: „Taata, mi buta mi libi a i maun e.” Di a taki di soni dë, hën böö fëën koti. 47 Di di hedima u sodati si andi pasa, hën a bigi gafa Gadu. A taa: „Di womi aki bi dë wan bumbuu sëmbë a Gadu wojo tuu.” 48 Di dee hia sëmbë dee bi ko naandë si andi pasa, hën de ta naki deseei a hatimindi u lei fa de ta tjali tjika, hën de paaja go a wosu. 49 Hii dee sëmbë dee bi sabi Jesosi bi dë taanputaanpu te a wan së ala ta luku. Söseei dee mujëë dee bi kumutu a Galilea ko ku ën bi sai dë tu, nöö deseei bi si hii dee soni dee bi pasa.
50 Wan womi bi dë di de bi ta kai Josëfu. Di womi aki bi dë wan womi u di Gaan kuutuwosu u dee Dju. A bi dë wan bumbuu sëmbë di bi ta libi bunu a Gadu wojo. 51 (Di womi aki an bi dë ku de a wan së di de bi ta suku fasi u kii Jesosi.) A bi kumutu a di köndë Alimatea. Di köndë aki bi dë wan köndë u Judea. Di womi aki bi ta wakiti di Tii u Gadu. 52 A bi go a Gaama Pilati go hakisi ën faa dëën di dëdë sinkii u Jesosi. 53 Hën a puu di dëdë sinkii u Jesosi a di posu, hën a lolu ën a gaan dii koosu te a kaba, hën a tjëën go buta a wan sitonu baaku ka de an bi bei sëmbë wan daka. 54 A di daka dë de bi ta seeka soni u de hoi di Saba, biga a di sapate dë di Saba daka bi o bigi. 55 Dee mujëë u Galilea dee bi ko ku Jesosi naandë, go ku Josëfu go luku di kamian ka de buta di dëdë sinkii u Jesosi. 56 Baka di dë, hën de bia toona go seeka sumëësuti uwii ku sumëësuti fatu. Ma di de si taa di Saba daka dou kaa, hën de böö kumafa di Wëti ta taki.