Dee soni dee Lukasi sikifi

3 Wë nöö a di u 15 jaa di di Gaan könu de kai Tibelia bi ta tii, nöö Gaama Pontuisi Pilati bi ta tii di köndë de kai Judea. Könu Helodi* bi ta tii di köndë de kai Galilea. Nöö di baaa fëën de kai Filipi bi ta tii dee tu köndë de kai Ituleja ku Takonitisi. Nöö Gaama Lisani bi ta tii di köndë de kai Abileini. 2 Ananiasi bi dë fesima u dee begima, nöö Kajafasi bi dë gaan begima. A di ten dë, Gadu bi da Johanisi, di womi mii u Sakalia wan bosikopu a di sabana.

3 Hën a go a hii dee köndë a di pisiwata u di lio de kai Joodan u go konda da sëmbë taa de musu dopu u lei taa a hati de taa de an bi libi bunu a Gadu wojo, sö taa Gadu sa da de paadon u dee hogilibi u de. 4 A bi du ën leti kumafa di tjabukama u Gadu de kai Jesaaja bi taki. A bi taki taa: „Wan sëmbë ta bai a di sabana taa: ’Un seeka di pasi da Jehoufa* ooo, be a dë tololoo dëën. 5 Hii dee heihei kamian ku dee kuun, te dou ku dee basubasu kamian tuu musu ko dë palalaa. Nöö dee bendibendi pasi musu ko dë tololoo. Söseei dee baaku dee dë a dee pasi tuu musu tapa ko dë palalaa. 6 Nöö te a dë sö kaa, nöö hii sëmbë o si fa Gadu o heepi u.’”

7 Hën Johanisi piki dee gaan hia sëmbë dee bi ta ko nëën faa dopu de, taa: „Un sindeki mii unu, andi un ko du aki? Un mëni taa woon sa go tjubi te Gadu o kii dee hogihati sëmbë u? 8 Un bigi du soni u lei taa un kë bia ko ta libi kumafa Gadu kë. Wan sai dë ta mëni taa Gadu an o sitaafu unu u di un dë bakamii u Abahamu e. Biga mi taki da unu taa ee Gadu kë, nöö a sa mbei dee sitonu un si aki ko a libi, nöö de bia ko dë bakamii u Abahamu a unu kamian. 9 Di matjau dë setiseti a dee pau gogo kaa. Nöö hiniwan pau di an ta pai bumbuu njanjan, de o faa koti pisipisi tuwë a faja.”

10 Hën dee sëmbë ta hakisi ën taa: „Wë nöö, andi u musu du?” 11 Hën Johanisi piki de taa: „Wë ee wan sëmbë i abi tu djakiti, nöö i musu tei wan, nöö i da di sëmbë di naabi. Söseei ee wan sëmbë i abi soni u njan, nöö i musu da di sëmbë di naabi.” 12 Dee pii-lantimönima seei bi ta ko nëën faa musu dopu de. Hën de hakisi ën taa: „Mësitë o, andi u musu du?” 13 Hën a piki de taa: „Te un ta pii möni, nöö wan musu hakisi* möön hia möön leki fa lanti buta.” 14 Dee sodati seei ko nëën tu, hën de hakisi ën taa: „Nöö andi uu musu du?” Hën a piki de taa: „Wan musu puu soni a sëmbë maun ku taanga, söseei wan musu mindi soni. Ma un musu dë tifeedi ku dee soni dee un ta feni.”

15 Dee sëmbë bi ta wakiti u Keesitu ko. Fëën mbei de bi ta hakisi deseei ee Johanisi da di Keesitu. 16 Hën Johanisi piki de taa: „Mim ta dopu unu ku wata. Ma di sëmbë di o ko a mi baka abi makiti möön mi. Ma fiti seei u mi lusu di susu fëën puu nëën futu. Di sëmbë dë o dopu unu ku di kaakiti u Gadu, söseei ku faja.* 17 A abi wan soni* nëën maun u puu alisi kakisa. A o seeka di kamian ka a ta fon di alisi, nöö a o tja di alisi go lai a suwa. Ma a o tjuma di alisi kakisa ku faja di an sa tapa a mundu möönsö.”

18 Nöö sö Johanisi ta fan ku dee sëmbë nöömö ta da de taanga. A bi ta konda di bunu buka u Gadu da de tu. 19 Ma u di Könu Helodi bi tei hën baaa mujëë, söseei u di a bi du sömëni woto hogi tu, mbei Johanisi bi gandji dëën. 20 Nöö hën di könu hopo hën a go du wan möön gaan hogi. A kisi Johanisi söötö a dunguwosu.

21 Johanisi dopu sömëni sëmbë, nöö a bi dopu Jesosi tu. Di Jesosi bi ta begi, hën mundu jabi wajaa, 22 hën di kaakiti u Gadu saka ko nëën liba kuma wan pomba. Hën wan töngö piki a liba ala taa: „I da di lobi Womi Mii u mi. Libi fii ta kai ku mi.”