Dee soni dee Mateosi sikifi

18 Nöö di juu dë, hën dee bakama u Jesosi ko nëën, hën de hakisi ën taa: „Ambë o dë di möön heiwan a di Tii u Gadu di dë a liba ala?” 2 Hën Jesosi kai wan piki mii ko, hën a butëën faa taanpu a de mindi, 3 hën taa: „Mi taki e, ee wan sëmbë ja bia ko abi dee fasi dee wan piki mii abi, nöö ja o sa go a di Tii u Gadu di dë a liba ala. 4 Fëën mbei ee i abi sakafasi kuma di piki mii aki, nöö joo dë di möön heiwan a di Tii u Gadu di dë a liba ala. 5 Nöö di sëmbë di du bunu da sö wan mii u mi në hedi, nöö miseei wë a du bunu da. 6 Ma ee wan sëmbë mbei wan u dee pikiwan di ta biibi mi aki kumutu go disa di biibi, nöö a bi o möön bunu u de tei wan gaan gindi sitonu* tai nëën gangaa, nöö de tjëën go tuwë a di möön fundu kamian u di ze.

7 Helu u dee sëmbë u di goonliba aki di ta du soni u mbei sëmbë kumutu go disa di biibi.* A dë sö tuu taa sëmbë o dë di o mbei wotowan kumutu go disa di biibi, ma tökuseei mi ta bai helu da dee lö sëmbë dë! 8 Fëën mbei ee maun fii nasö futu fii ta mbei i du soni di sa puu i a Gadu pasi, nöö i musu koti ën puu tuwë. Biga a möön bëtë i lasi wan së maun, nasö wan së futu fii ma i feni libi, ka u de vinde i go ku dee tu së maun nasö ku dee tu së futu fii tuu go a di teego faja.* 9 Söseei ee wojo fii ta mbei i du soni di sa puu i a Gadu pasi, nöö i musu diki ën puu tuwë. Biga a möön bëtë i lasi wan së wojo fii ma i feni libi, ka u de vinde i go ku dee tu së wojo fii tuu a di faja u Gehëna.* 10 Fëën mbei un musu ta köni be wan wisiwasi dee pikiwan aki e. Biga mi taki da unu taa dee basia u Gadu dee ta luku de, ta dë a mi Tata a liba ala fesi hii juu. 11*⁠——

12 Ee wan sëmbë abi 100 sikapu fëën ta kiija, hën wan u dee sikapu aki lasi, nöö andi i si kuma a bi o du? An bi o go disa dee 99 sikapu a di kuun liba, nöö a go suku di wan di lasi nö? 13 Ee a feni ën, nöö an dë u taki taa a o wai ku ën gaanfa seei möön leki dee 99 sikapu dee an bi lasi. 14 Wë sö nöö di Tata u mi* a liba ala an kë na wan kodo u dee pikiwan aki musu lasi.

15 Ee wan wotowan* fii du wan soni ku i, nöö i musu go nëën i wanwan go fan ku ën fuun seeka di taki be un ko dë bunu baka. Nöö ee a tei di fan fii, nöö hën da i wini ën tja ko buta a pasi. 16 Ma ee an kë haika i möönsö, nöö i musu tja wan nasö tu sëmbë go makandi ku i fuun fan ku ën. Biga i musu abi tu nasö dii kotoigima ufö i sa taki ee wan soni dë sö tuu. 17 Ee an haika unu tu, nöö kondëën da di kemeente. Nöö ee an kë haika di kemeente tu, nöö un musu si ën kuma wan sëmbë di an sa’ soni u Gadu, söseei kuma wan pii-lantimönima.

18 Mi taki da unu taa hiniwan soni di un tai a goonliba aki, o dë taitai a liba ala. Söseei hiniwan soni di un lusu a goonliba aki, o dë lusulusu a liba ala. 19 Mi taki da unu möön taa ee tu fuunu a goonliba aki taki taa woon begi u wan fanöudu soni, nöö mi Tata di dë a liba ala o du di soni di un hakisi. 20 Biga ka tu nasö dii sëmbë ko makandi u di de nama ku mi, nöö miseei o dë leti a de mindi dë.”

21 Hën Petuisi ko a Jesosi, hën a hakisi ën taa: „Masa o, un mëni pasi mi musu da di wotowan u mi paadon te a du wan soni ku mi? Te dou seibi pasi ö?” 22 Hën Jesosi piki ën taa: „Na seibi pasi nöö i musu dëën paadon e, ma te dou 77 pasi.

23 U sa tei di Tii u Gadu di dë a liba ala maaka ku wan könu di bi kë u dee saafu fëën toona pakëën dee paima di de bi abi nëën. 24 Di a bigi pii möni a de, hën de tja wan womi ko nëën di bi abi 60 miliön soofu möni* u pakëën. 25 Ma u di di womi aki an bi abi di möni u pakëën, mbei di könu piki sëmbë u de sei hën ku hën mujëë ku dee mii fëën, ku hii dee soni dee a bi abi tuu, faa bi sa paka di paima dë. 26 Di di saafu jei sö, hën a tjökö kini a goon nëën fesi, hën a begi ën taa: ’Hoi pasensi da mi o, nöö mi o toona paka i hii di möni fii.’ 27 Hën tjali u di saafu aki kisi di könu, hën a piki ën taa aanfu pakëën möön. 28 Di di saafu aki kumutu dë, hën a miti wan woto saafu kuma hënseei, di bi musu pakëën 100 soofu möni.* Hën a kisi ën peeta a gangaa, hën a taki dëën taa: ’Paka mi di möni u mi.’ 29 Hën di woto saafu tjökö kini a goon nëën fesi, hën a begi ën taa: ’Hoi pasensi da mi o, nöö mi o toona paka i.’ 30 Ma di womi an bi pena dë a di taki dë seei. A mbei sëmbë butëën a dunguwosu te kuma a bi sa paka di paima. 31 Di dee woto saafu si andi pasa, hën a toobi de gaanfa seei. Hën de kule go piki di könu andi de si. 32 Hën di könu manda kai di womi ko nëën, hën a piki ën taa: ’Ju hogihatima ju, hii di gaan hia möni di i bi abi u paka mi, nöö hën wë mi disa i fu di i bi begi mi. 33 Nöö an bi bunu da i fii abi tjalihati da di wotowan fii nö?’ 34 Hën hati u di könu boonu ku ën te na soni, hën a mbei sëmbë tjëën go söötö a dunguwosu u te kuma a bi paka hii di möni di a bi musu paka. 35 Wë sö nöö mi Tata di dë a liba ala o du ku unu ee wan ta da di wotowan fuunu paadon ku hii unu hati.”