Dee soni dee Lukasi sikifi
7 Di a bi piki dee sëmbë hii dee soni di a bi kë piki de te a kaba, hën a go a Kapënaumi. 2 Wan hedima u sodati u di köndë dë bi abi wan saafu fëën di a lobi te na soni, ma nöö di saafu bi dë ku suwaki tee a bi dë a maunmaun. 3 Di a jei soni u Jesosi, hën a manda so u dee gaanwomi u dee Dju sëmbë go begi Jesosi faa ko kula di saafu fëën dëën. 4 Hën de ko a Jesosi, hën de ta begi ën taa: „U begi i baa, heepi ën. A fiti fii du ën di bunu aki, 5 biga a lobi u dee Dju sëmbë, nöö a heepi u mbei di wosu ka u nango dini Gadu.” 6 Hën Jesosi hopo go ku de. Ma nöö di a dë zuntu ku di wosu, hën di hedima u sodati manda sëmbë u de go taki dëën taa: „Masa o, an dë fii ko te a mi pisi e, biga ma bumbuu tjika fii ko a mi pisi. 7 Fëën mbei miseei an ko a i tu. Ma i sa fan leti ka i sai dë, nöö di saafu u mi o ko bëtë. 8 Biga fa mi dë aki, sëmbë abi taki a mi liba, nöö miseei abi sodati di mi a’ taki a de liba tu. Ee mi piki wan u de taa: ’Go ala’, nöö a nango. Ee mi piki wan wotowan taa: ’Ko aki’, nöö a ta ko. Nöö ee mi piki wan saafu u mi taa: ’Du di soni aki’, nöö a ta du ën.” 9 Di Jesosi jei andi di womi taki, hën a bigi dëën tee. Hën a piki dee sëmbë dee bi ta waka nëën baka taa: „Mi ta piki unu gbelin taa, na wan daka seei mi si wan sëmbë a Isaëli di abi sö wan biibi e.” 10 Di dee sëmbë di di hedima u sodati bi manda go a Jesosi toona go a di wosu baka, hën de si taa di saafu bi ko bëtë.
11 Baka di dë, hën Jesosi go a wan köndë de kai Nain. Nöö dee bakama fëën ku wanlö hia sëmbë bi ta waka ku ën. 12 Di de go dou a di dööbuka u di peni di lontu di köndë, hën de si wanlö sëmbë ta waka ta ko ku wan dëdë u de tja go bei. Di sëmbë dë bi dë di wan kodo womi mii fëën mama, nöö di manu u di mama bi dëdë disëën kaa. Nöö di mama ku sömëni sëmbë u di köndë bi ta waka ta ko. 13 Di Masa Jesosi si di mama u di mii, nöö hën tjali fëën kisi ën. Hën a piki ën taa: „Mujëë o, na këë möön e.” 14 Nöö hën a waka go panjan di soni ka de buta di dëdë sinkii u di womi mii, nöö hën dee sëmbë dee ta tja di dëdë taanpu pii. Nöö hën a taa: „Womi o, mi taki e, hopo!” 15 Hën di dëdë sëmbë weki. Hën a hopo sindo, hën a bigi ta fan. Hën Jesosi da di mama di mii fëën baka. 16 Di soni di pasa dë bi bigi da dee sëmbë te na soni. Hën de bigi ta gafa Gadu. De taa: „Wan gaan tjabukama ko dë a u dendu aki. Gadu buta pakisei a dee sëmbë fëën.” 17 Nöö hën di woto dë paaja a hii Judea te dou hii dee woto köndë tuu dee dë a zuntu dë.
18 Dee bakama u Johanisi bi go konda hii dee soni dee bi ta pasa dëën. 19 Hën Johanisi manda tu u dee bakama fëën go a Masa Jesosi u de hakisi ën taa: „Ju da di Sëmbë di Gadu bi paamusi u taa a o manda ko u, naa wan woto sëmbë o ko jeti?” 20 Di de go dou a Jesosi, hën de piki ën taa: „Johanisi di Dopuma manda u fuu ko hakisi i ee ’ju da di Sëmbë di Gadu bi paamusi u taa a o manda ko, naa wan woto sëmbë o ko jeti?’” 21 Nöö a di ten dë seei, wanlö hia sëmbë bi ko nëën ku peipei siki, ku taku soni a de liba, nöö so u de bi dë bookowojoma. Hën a kula hii de tuu te a kaba. 22 Hën Jesosi piki dee bakama u Johanisi taa: „Un go nöö un go piki Johanisi dee soni dee un si ku dee un jei. Un piki ën taa dee bookowojoma ko ta si soni, nöö dee lanma ko ta waka. Dee kököbëma ko bëtë, nöö dee bookojesima ko ta jei soni. Dee dëdë sëmbë ta weki ko a libi baka, söseei dee pootima ta jei di bunu buka. 23 Di sëmbë di an ta mati disa di biibi u di ma ta du kumafa a bi mëni, nöö di sëmbë dë hën dë bunu e.”
24 Di dee bakama u Johanisi go, hën Jesosi bigi konda soni u Johanisi da dee sëmbë dee bi sai dë. A hakisi de taa: „Ambë da di womi di un go si a di sabana? A bi dë wan sëmbë di dë kuma kambaluwa* di ventu ta tja nango ta ko u? 25 Ambë di womi dë bi dë? A bi dë wan sëmbë di bi ta bisi gaan waiti koosu ö? Wë nönö, biga dee sëmbë dee gudu ku dee sëmbë dee ta bisi gaan waiti koosu, ta libi a könu wosu. 26 Nöö ambë di womi dë bi dë? A bi dë wan tjabukama u? Aai, a dë wan tjabukama tuu, ma a hei möön wan tjabukama seei. 27 Gadu bi mbei dee tjabukama fëën sikifi soni u di womi dë. De bi sikifi taa: ’Haika e, mi o manda wan bosikopuma u mi go a i fesi faa seeka pasi da i!’ 28 Mi taki e, na wan libisëmbë di de pai a goonliba aki hei möön Johanisi. Ma di möön lagiwan di dë a di Tii u Gadu dendu seei hei möön hën.” 29 (Di dee sëmbë dee ta pii lantimöni ku dee woto sëmbë di Johanisi bi dopu, jei andi Jesosi taki, hën de taa Gadu ta du soni a wan leti fasi hii juu. 30 Ma dee Faliseima ku dee sabima u Wëti an bi kë piki Gadu buka, u di de an bi mbei Johanisi dopu de.)
31 „Ku ambë mi sa tei dee sëmbë u di ten aki maaka? 32 De dë kuma miii di ta pëë a wojowojo, nöö de ta kai dee woto mii ta piki de taa: ’U böö foloiti da unu, ma wan bi baja. U kanda tjali kanda da unu, ma wan bi këë.’ 33 Di Johanisi di Dopuma ko, nöö an bi ta njan bëëë, söseei an bi ta bebe win kuma dee woto sëmbë. Ma tökuseei un ta taki taa ’taku soni dë nëën liba’. 34 Di sëmbë di ko dë Libisëmbë Miii ko ta njan ta bebe kuma woto sëmbë nöö. Ma tökuseei un ta taki taa ’a ta njan pasa maaka, a ta bebe win pasa maaka, söseei a ta hulu dee sëmbë dee ta pii lantimöni ku dee sëmbë dee an ta libi bunu a Gadu wojo’. 35 A dee soni di wan sëmbë ta du i sa si ee a köni.”
36 Wan u dee Faliseima bi ta hakisi Jesosi nöömö faa ko nëën wosu ko njan ku ën. Hën a go a di wosu u di Faliseima hën a go sindo a tafa. 37 Hën wan mujëë di hii sëmbë a di köndë bi sabi taa bi ta libi fanafiti libi ko naandë. A bi jei taa Jesosi bi ko a di wosu u di Faliseima faa njan. Fëën mbei a go ala ku wan bata ku wan gaan dii sumëësuti fatu nëën dendu. 38 A tjökö kini a Jesosi fesi, hën a bigi këë. Dee wojowata fëën bi ta kai a Jesosi futu, nöö a bi ta dëë de ku hën hedi uwii. A bosi Jesosi futu, hën a tutu di sumëësuti fatu nëën futu. 39 Di Simön si di soni dë, hën a ta guunjëën nëën hati taa: „Wë ee di womi aki bi dë wan tjabukama u Gadu tuu, nöö a bi o sabi ambë da di mujëë di ta panjëën dë. A bi o sabi taa di mujëë aki ta libi fanafiti.” 40 Hën Jesosi piki ën taa: „Simön, mi kë taki wan soni da i.” Hën a taa: „A bunu Mësitë. Mi ta haika i.”
41 „Tu womi bi juu möni a wan sëmbë. Wan u de bi juu 500 soofu möni,* nöö di wotowan bi juu 50 soofu möni.* 42 Di dee tu womi an bi sa paka di sëmbë baka, hën a piki de taa an dë u de pakëën möön. Wë u dee tu womi dë, undi u de o lobi di sëmbë möön taanga?” 43 Hën Simön piki ën taa: „Wë mi si kuma di womi di bi juu möön hia möni.” Hën a taa: „Wë awa, sö a dë.” 44 Hën Jesosi bia luku di mujëë, hën a piki Simön taa: „I si di mujëë aki ö? Di mi ko a i wosu, ja da mi wata u mi wasi futu. Ma di mujëë aki wasi mi futu ku dee wojowata fëën, hën a dëë de ku ën hedi uwii. 45 Ja bosi mi, ma sensi di mi ko aki, hën di mujëë aki ta bosi mi futu nöömö. 46 Ja tutu fatu a mi hedi, ma di mujëë aki tutu sumëësuti fatu a mi futu. 47 Fëën mbei mi taki e, di mujëë i si aki sö, nöö Gadu dëën paadon u hii dee hogilibi fëën tuu. U di a lei taa na piki lobi a lobi mi. Te de da sëmbë paadon u wantu soni nöö, nöö hën da piki sö lobi nöö a lei taa a abi.” 48 Hën Jesosi piki di mujëë taa: „Mi da i paadon u dee hogilibi fii e.” 49 Dee woto sëmbë dee bi sindo a tafa ku ën bi ta taki da de na de taa: „Wë ambë seei da di sëmbë aki di ta da sëmbë paadon u dee hogilibi u de?” 50 Hën Jesosi piki di mujëë taa: „Mujëë, di biibi fii heepi i e. Go fii, nöö be soni waka bunu da i.”