Dee soni dee Mateosi sikifi
20 „Di Tii u Gadu di dë a liba ala dë kuma wan womi di abi wan goon fëën, hën a kumutu nëën pisi fuukufuuku u go suku sëmbë u wooko di goon fëën. 2 Di a feni dee wookoma, hën de taki fiti taa a o paka de wan soofu möni* wan daka, hën a manda de go a di goon fëën. 3 Di a go a sitaati dee pisiten u nëigi juu mamate, hën a si sëmbë a wojowojo di an bi abi wooko. 4 Hën a piki de taa: ’Un go wooko a di goon u mi tu, nöö mi o paka unu kumafa a fiti.’ 5 Hën de go wooko a di goon. Di a go a sitaati dee ten u tuwalufu juu, hën a feni sëmbë möön u de heepi ën wooko di goon. Nöö a di dii juu, hën a toona go, hën a feni sëmbë möön. 6 Hën a dë te sapate feifi juu, hën a go a sitaati möön. Hën a go si wanlö sëmbë dë taanputaanpu a wan kamian, ma na soni seei de ta du. Hën a hakisi de taa: ’Faandi mbei un dë taanputaanpu aki wan hii daka wan go a wooko?’ 7 Hën de taa: ’Wë sëmbë an kai u a wooko möönsö.’ Hën di womi piki de taa: ’Un go wooko a di goon u mi.’
8 Di kamian bi bigi ta dungu, hën di womi piki di sëmbë di a buta u luku di wooko taa: ’Go kai dee wookoma, nöö i paka de. Bigi paka dee sëmbë dee bi ko a di feifi juu, nöö i paka dee sëmbë dee bi ko a di fuukufuuku mamate kuma lasiti. 9 Di dee wookoma dee bi bigi wooko a di feifi juu sapate ko dou, hën a da hiniwan u de wan soofu möni.* 10 Ma nöö di dee wookoma dee bi ko fuukufuuku mamate ko dou, nöö de bi mëni taa de o kisi möön hia möni möön dee bi ko a baka. Ma nöö de ko si taa di wan seei soofu möni* nöö de tuu feni. 11 Di a paka de, hën de bigi ta guunjan di sëmbë di abi di goon. 12 De taki taa: ’Di mamate hën u ko dë ta pena a di sonu mindi tefa ndeti aki, ma nöö dee sëmbë dee wooko di wan kodo juu langa dë, u ku de tuu kisi di wan seei möni!’ 13 Hën di sëmbë di abi di goon piki wan u de taa: ’Mati, ma du hogi ku unu e. Biga na mi ku unu bi mbei buka taa mi o paka unu wan soofu möni* nö? 14 Tei di möni fii, nöö i go fii. Mi kë da dee sëmbë dee ko lasiti dë, di seei möni kuma i. 15 Di soni di mi abi, ma sa du ku ën kumafa mi kë nö? Naa u di mi abi bunuhati u de mbei un ta haun sö?’ 16 Sö a o pasa taa dee sëmbë dee bi dë fosuwan, o ko dë lasiti wan, nöö dee lasiti wan o ko dë dee fosuwan.”
17 Di de bi dë a pasi nango a Jelusalën, hën Jesosi kai dee tuwalufu bakama fëën a së, hën a piki de taa: 18 „Un haika e, woo go a Jelusalën, nöö de o tja di sëmbë di ko dë Libisëmbë Miii go leifi da dee fesima u dee begima, ku dee sabima u Wëti. Nöö de o kuutu ën taa a musu dëdë. 19 Nöö de o toona leifi ën da dee woto köndë sëmbë u de mbei ën fa, u de fon mën, söseei u de pekëën a wan posu kii. Ma nöö a di u dii daka, Gadu o toona weki ën ko a libi baka.”
20 Hën di mujëë u Zebedeosi ko a Jesosi makandi ku dee tu womi mii fëën, hën a tjökö kini a Jesosi fesi, u di a bi kë hakisi ën wan soni. 21 Hën Jesosi hakisi ën taa: „Andi i kë, mujëë?” Hën di mujëë piki ën taa: „Mi kë begi i taa te joo sindo a di könu bangi fii, nöö mi kë i mbei dee womi mii u mi sindo a i bandja, wan u de a i letisë maun, di wotowan a i töötösë maun.” 22 Hën Jesosi taa: „Un saandi un ta begi mi nö?” Di soni di de lai da mi u mi bebe aki, woon sa bebe ën tu ö?” Nöö hën de taa: „Aai, woo sa bebe ën.” 23 Hën a piki de taa: „A dë sö tuu taa woon bebe ën. Ma na mi ta taki ambë ta sindo a mi letisë maun, nasö a mi töötösë maun. Biga dee sëmbë dee o sindo a dee lö kamian naandë, da dee sëmbë dee mi Tata seei o buta.”
24 Di dee teni wotowan ko jei andi dee tu womi bi hakisi Jesosi, hën hati u de boonu ku de te na soni. 25 Ma Jesosi kai de ko nëën, hën a piki de taa: „Un sabi taa dee tiima u dee woto köndë sëmbë ta masa dee sëmbë u di köndë, söseei taa dee heihei sëmbë ta masa dee sëmbë dee dë a de basu. 26 Ma wan musu dë sö e. Di sëmbë di kë dë di möön heiwan musu ko dë kuma wan wookoma da unu. 27 Ee wan sëmbë kë ko dë di fosuwan a unu mindi, nöö a musu dë kabakaba u du soni da wotowan. 28 Fa i si di sëmbë di ko dë Libisëmbë Miii ko a goonliba aki, nöö an ko u sëmbë musu du soni dëën e, ma a ko fu hënseei musu du soni da sëmbë. A ko faa lasi hën libi paka paima da sömëni sëmbë.”
29 Di de bi ta kumutu a Jelikou, hën wanlö gaan hia sëmbë bigi ta waka a Jesosi baka. 30 Hën tu bookowojoma dee bi dë sindosindo a bandja pasi jei taa Jesosi ta pasa, hën de bigi ta bai taa: „Masa, Womi Mii* u Dafiti, abi tjalihati fuu baa!” 31 Ma nöö dee hia sëmbë dee bi sai dë gandji da dee bookowojoma be de kabuka naandë. Ma awaa de ta bai taa: „Masa, Womi Mii* u Dafiti, abi tjalihati fuu baa!” 32 Nöö hën Jesosi taanpu piii, hën a kai de, hën a hakisi de taa: „Andi un kë u mi du da unu?” 33 Hën de piki ën taa: „Masa, u kë fii heepi u be u ko ta si soni.” 34 Tjali u de bi kisi Jesosi, hën a tëndë maun nama a de wojo, hën wantewante dë de ko ta si soni, hën de bigi ta waka nëën baka.