Dee soni dee Lukasi sikifi

10 Baka di dë, hën Masa Jesosi tei 70 woto bakama fëën, hën a manda de go tu tu sëmbë a dee köndëköndë ka hënseei bi o go bakaten. 2 Hën a piki de taa: „Di njanjan lepi, nöö a hia, ma wookoma an dë tjika u koti ën. Fëën mbei un musu begi di Masa di abi di wooko, faa manda möön hia wookoma u de koti di njanjan fëën. 3 Un go, nöö fa i si mi ta manda unu go aki, mi ta manda unu go kuma sikapu mii a taku mbeti dendu. 4 Wan musu tja möni saku e, wan musu tja soni u njan, söseei wan musu tja susu. Wan musu fan* ku sëmbë te un dë a pasi. 5 Te woon denda a wan wosu, nöö un musu piki dee sëmbë taa: „Be soni waka bunu da unu.” 6 Nöö ee wan sëmbë sai dë di lobi bööböö libi, nöö di bunu di un wensi de o fika a di sëmbë dë. Ma ee sëmbë an sai dë di lobi bööböö libi, nöö di bunu o toona ko a unu baka. 7 Nöö fa de o tei unu a wosu dë, nöö naandë un musu tan e. Wan musu kumutu ku dee lai fuunu go libi a woto wosu. Nöö te de da unu soni u njan, nöö un njan e. Te de da unu soni u bebe, nöö un bebe. Biga de musu paka wan wookoma da di wooko di a du.

8 Söseei te un go a wan köndë ka dee sëmbë u di köndë wai ku unu, nöö di soni i si de seeka da unu fuun njan, hën un musu njan e. 9 Un kula dee suwakima u di köndë dë, nöö un piki dee sëmbë u di köndë taa: ’Abiti möön Gadu o tii.’ 10 Ma ee un go a wan köndë, nöö dee sëmbë an kë haika unu, nöö un musu go taanpu a dee gaan pasi u di köndë, nöö un taki da de taa: 11 ’Di doti u di köndë aki di bi dë a u futu, nöö u feki ën puu tuwë disa da unu e. Ma u kë un sabi taa Gadu o tii abiti möön.’ 12 Mi taki e, di sitaafu di di köndë dë o feni a di Gaan Kuutu Daka u Gadu o hebi möön di u Sodöm.

13 Mi bai helu da dee sëmbë u Kolazin ku dee sëmbë u Bëtisaida. Biga ee dee sëmbë u Tilusi ku Sidön bi si dee foombo soni aki, nöö de bi o bia de libi gaanduwe kaa. De bi o bisi djodjo u lei taa de ta tjali, söseei de bi o sindo a sindja liba. 14 Di sitaafu di woon feni a di Gaan Kuutu Daka u Gadu o hebi möön di u Tilusi ku di u Sidön. 15 Un dee sëmbë u Kapënaumi dë, un mëni taa woon go a liba ala u? Na seei. A geebi* woon go!

16 Ee wan sëmbë haika unu, hën da a haika mi tu. Ma ee wan sëmbë an haika unu, nöö hën da an haika mi tu, söseei an haika di sëmbë di manda mi ko.”

17 Hën dee 70 bakama toona ko, nöö de bi ta wai seei. De piki Jesosi taa: „Masa o, te kisi dee taku soni seei ta du andi u taki te u kai i në.” 18 Hën a piki de taa: „Mi ta si kaa fa Saatan ta kai kumutu a liba ala kuma te liba ala ta koti faja ko a goon. 19 Mi da unu di makiti fuun makisa sindeki ku kukutulabu ku futu. Mi da unu makiti a dee felantima fuunu liba, nöö na wan hojo soni seei o sa du hogi ku unu. 20 Ma tökuseei wan musu wai u di dee taku soni ta du andi un taki e. Ma un musu wai u di në fuunu dë sikifisikifi a liba ala.” 21 A di pisiten dë, hën di kaakiti u Gadu mbei Jesosi ko ta wai te na soni. Hën a taa: „Taata o, i wë da Masa u liba ala ku goonliba aki tuu. Nöö mi ta gafa i a hii sëmbë fesi, u di i tjubi dee soni aki da dee könima ku dee sabima, ma i mbei piki mii ko sabi de. Aai Taata, sö wë i si taa a fiti e. 22 Mi Tata buta hii soni a mi maun. Na wan sëmbë sabi di Mii bumbuu kumafa di Tata sabi ën, nöö na wan sëmbë sabi di Tata bumbuu kumafa di Mii sabi ën, boiti dee sëmbë di di Mii kë u de ko sabi ën.”

23 Di Jesosi ku dee bakama fëën bi dë de wanwan, hën a piki de taa: „Dee sëmbë dee ta si dee soni dee un ta si aki musu wai e. 24 Biga sömëni u dee fesiten tjabukama u Gadu ku dee könu bi hangi seei u si dee soni un ta si ku dee un ta jei aki, ma de an bi si de, söseei de an bi jei de tu.”

25 Hën wan womi di sabi dee Wëti bumbuu hopo go pooba Jesosi luku. A hakisi ën taa: „Mësitë o, andi mi musu du u mi sa feni di teego libi?” 26 Hën Jesosi piki ën taa: „Andi sikifi a dee Wëti? Andi i fusutan di i lesi de?” 27 Hën di womi piki ën taa: „’I musu lobi Jehoufa* di Gadu fii ku hii i hati, ku hii i libi, ku hii i kaakiti, ku hii i fusutan’, söseei ’i musu lobi wotowan kumafa i lobi iseei.’” 28 Hën Jesosi piki ën taa: „Sö a dë. Du dee soni aki go dou, nöö joo feni teego libi.”

29 Ma u di di womi bi kë lei taa a ta libi bunu a Gadu wojo, mbei a hakisi Jesosi taa: „Ambë da di wotowan u mi di mi musu lobi kuma miseei?” 30 Di di womi hakisi ën di soni aki, hën Jesosi konda wan woto dëën. A taa: „Wan womi bi ta bazia kumutu a Jelusalën nango a Jelikou, hën wanlö hogiduma kisi ën fon te a fon. De tei hii dee soni fëën dee a bi ta tja tuu, te kisi dee koosulai dee bi dë nëën sinkii. Hën de go disëën naandë a dëdë ku libi maun. 31 Nöö hën a sai dë te wan pisi, hën wan begima di bi kumutu a Jelusalën ta waka pasa. Di a si di womi, hën a lontu a woto së pasa go fëën. 32 Bakaten, hën wan Leifi sëmbë waka ko dou. Di a si di womi, hën a du di seei soni. A lontu a woto së pasa go fëën. 33 Ma baka di dë, hën wan Samalia womi waka ko dou dë. Di a si di womi, hën tjali fëën kisi ën. 34 Hën a waka go nëën, hën a lobi fatu ku win a dee kamian fëën dee koti, hën a tai de. Baka di dë, hën a hopo di womi buta a di buliki fëën liba, hën a tjëën go a wan kamian ka sëmbë ta juu kamba. Naandë a tjëën go sölugu. 35 Di debooko fëën hën a tei tu denali,* hën a da di sëmbë di ta juu dee kamba da sëmbë, hën a taa: ’Luku di womi aki da mi baa. Ee di möni di mi da i aki an tjika, nöö te mi toona, nöö mi o paka i dou.’ 36 Undi u dee dii womi aki lei taa de lobi di womi di dee hogiduma fon?” 37 Hën di womi taa: „Wë di sëmbë di bi lei taa a abi tjalihati fëën.” Nöö hën Jesosi piki ën taa: „Go, nöö i du di wan seei soni tu.”

38 Di Jesosi ku dee bakama fëën bi dë a pasi nango, hën a go a wan köndë. Hën wan mujëë de kai Maita kai Jesosi ko nëën pisi. 39 Maita bi abi wan sisa de kai Malia. Nöö Malia bi sindo leti a Jesosi fesi a goon dë ta haika dee soni dee a bi ta taki. 40 Ma Maita bi dë ta seeka sömëni soni. Fëën mbei a go a Jesosi, hën a piki ën taa: „Masa o, ja si fa mi sisa disa mi wanwan ta seeka hii soni nö? Piki ën be a ko heepi mi baa.” 41 Hën Jesosi piki ën taa: „Maita o, i ta booko i hedi ta du sömëni soni. 42 Ma wa abi hia soni fanöudu, wan kodo soni tjika kaa. Malia hën a du di möön bunu soni, nöö na wan sëmbë seei o sa puu ën nëën.”