Dee soni dee Lukasi sikifi

4 Nöö hën Jesosi kumutu a di Joodan lio, hën di kaakiti u Gadu tjëën go a wan sabana, 2 hën a sai dë 40 daka longi, hën Didibi ko poobëën. A bi sai dë söndö njan, hën hangi ko kisi ën. 3 Hën Didibi ko nëën, hën a taki dëën taa: „Ee i da miii u Gadu, nöö i taki da di sitonu aki be a bia ko toon bëëë.” 4 Hën Jesosi piki ën taa: „A sikifi a di Wöutu u Gadu taa: ’Na bëëë wanwan nöö ta hoi sëmbë a libi.’”

5 Hën Didibi tjëën go a wan gaan hei kamian, hën a lei ën hii dee tii u goonliba kölö sö, 6 hën a piki ën taa: „Mi o da i taki a hii dee tii aki liba ku hii dee gudu u de. U di mi abi de, mbei mi sa da hiniwan sëmbë di mi kë da. 7 Ee i tjökö kini a goon begi* mi wan kodo pasi nöö, nöö mi o da i de.” 8 Hën Jesosi piki ën taa: „A sikifi a di Wöutu u Gadu taa: ’Jehoufa* di Gadu fii nöö i musu begi, nöö hën wanwan tö nöö i musu dini.’”

9 Bakaten hën Didibi tei ën tja go a Jelusalën, hën a tjëën go a di möön hei kamian u di Wosu u Gadu. Nöö hën a piki ën taa: „Ee i da miii u Gadu, nöö tuwë iseei go a goon. 10 Biga a sikifi a di Wöutu u Gadu taa: ’A o manda dee basia fëën u de ko heepi i, 11 nöö de o tjaai a maun be ja naki futu a sitonu.’” 12 Hën Jesosi piki ën taa: „A sikifi a di Wöutu u Gadu tu taa: ’Ja musu pooba Jehoufa* di Gadu fii.’” 13 Nöö sö Didibi pooba Jesosi te a wei. Nöö hën a disëën dë, hën a go ufö. A go faa toona ko a wan möön bunu ten.

14 Baka di dë, hën Jesosi toona go a di pisiwata u Galilea. Di kaakiti u Gadu bi dë ku ën. Nöö në fëën bi bai a hii di kamian. 15 A bi nango ta lei sëmbë soni a dee wosu ka dee Dju nango dini Gadu. Nöö hii sëmbë bi ta lesipeki ën.

16 Baka di dë, hën Jesosi go a Nazalëti, di köndë ka de kiijëën. A bi go a di wosu ka dee Dju nango dini Gadu a di Saba daka kumafa a bi naa. Di a hopo taanpu u lesi, 17 hën de dëën di pampia lolu u di tjabukama Jesaaja faa lesi. A jabi di pampia lolu, hën a suku di pisi ka a sikifi taa: 18 „Di kaakiti u Jehoufa* dë ku mi. A da mi di wooko u mi paaja di bunu buka da dee pootima. A manda mi u mi piki dee sëmbë dee dë saafu taa de o ko fii, söseei u mi piki dee bookowojoma taa de o si soni baka. A manda mi u mi tja bööböö libi ko da dee sëmbë dee ta tja sitaafu, 19 söseei u mi piki sëmbë taa di juu dou u Jehoufa* lei taa a abi bunuhati u sëmbë.” 20 Di a lesi te a kaba, hën a tapëën, hën a toona tëndëën da di sëmbë di ta seeka soni a di wosu, hën a toona go sindo. Hii dee sëmbë dee bi sai dë bi ta luku ën diiin. 21 Hën a piki de taa: „Tide, dee soni dee mi lesi aki, pasa tuutuu.”

22 Hën hii de tuu bigi ta gafëën, nöö di fan fëën suti da dee sëmbë tee a foombo de. So u de bi ta taki taa: „Na di womi mii u Josëfu disi nö?” 23 Hën a piki de taa: „Mi sabi taa woon kë piki mi taa: ’Data o, heepi iseei. Biga u bi jei dee soni dee i bi ta du a Kapënaumi. Wë di i ko a di köndë fii aki, nöö heepi dee sëmbë fii tu.’” 24 Hën a taa: „Wan tjabukama u Gadu an ta feni gafa nëën köndë e. 25 Pakisei di woto aki. A di ten u Elia, sömëni mujëë bi dë a Isaëli di manu u de bi dëdë. A di ten dë tjuba an bi kai dii jaa ku sikisi liba longi, nöö wan gaan hangi bi ko a hii di köndë. 26 Ma tökuseei Gadu an manda Elia go a na wan u dee mujëë dë, ma a bi mandëën go a wan mujëë di ta libi a di köndë Safati, di dë a di pisiwata u Sidön. Di mujëë aki manu bi dëdë kaa. 27 Boiti di dë, a di ten u di tjabukama de kai Elisa, nöö sömëni kököbëma bi dë a Isaëli. Ma tökuseei an kula na wan u de, ma a bi kula di womi u Silia de kai Naaman.” 28 Di hii dee sëmbë dee bi dë a di wosu ka dee Dju nango dini Gadu jei dee soni dee a taki, hën hati u de boonu te na sipootu. 29 Hën de hopo, hën de kisi ën hai tja go a döösë u di köndë. Hën de tjëën go a di kuun buka u de tötö ën tuwë go a goon. Biga di köndë bi dë a wan kuun liba. 30 Ma te u de kë mëni, hën a pasa a de mindi dë go fëën.

31 Hën a go a Kapënaumi, di dë a di pisiwata u Galilea. Di di Saba daka dou, nöö a bi ta lei sëmbë soni. 32 Hii sëmbë foondo gaanfa seei u di fasi fa a bi ta lei de soni. Biga a bi ta lei sëmbë soni kuma Gadu seei hën bi mandëën. 33 Wan womi di bi dë ku wan taku soni nëën liba bi dë a di wosu ka dee Dju nango dini Gadu tu. Nöö hën a bi bai taa: 34 „Disa u oo, disa u! Jesosi u Nazalëti, andi seei u ku i abi? I ko aki fii kaba u a sösö nö? Wë mi sabi ambë da i. I wë da di Apaiti Sëmbë u Gadu di a manda ko!” 35 Nöö hën Jesosi gandji dëën taa: „Kabuka dë! Kumutu a di sëmbë liba wantewante!” Nöö hën di taku soni tuwë di sëmbë a goon a dee woto sëmbë fesi dë, ma an du soni ku ën. Nöö hën a kumutu nëën liba go. 36 Di soni bi bigi da dee sëmbë te na soni, hën de taki da de na de taa: „Un ta jei andi a ta taki ö? A abi makiti u piki dee taku soni andi de musu du, nöö de ta piki ën buka tu.” 37 Nöö hën woto fëën paaja a hii dee köndë naandë.

38 Di a kumutu a di wosu ka dee Dju nango dini Gadu, hën a go a Simön pisi. Wan taanga fëbë bi kisi di mai u Simön, hën de begi Jesosi faa kulëën. 39 Hën a waka go ka di mujëë bi kandi, hën a kulëën. Hën wantewante dë di mujëë hopo, hën a bigi seeka soni u njan da de.

40 A di pisiten u sonu go, hën dee sëmbë bigi tja hii pei sëmbë dee bi dë ku peipei suwaki ko a Jesosi. A buta maun a de liba, hën de ko bëtë. 41 A bi ta jaka taku soni puu a sömëni sëmbë liba tu. Dee taku soni bi ta bai taa: „Ju da di Womi Mii u Gadu.” Ma a gandji da de. An da dee taku soni pasi u de fan, biga de bi sabi taa hën da di Keesitu.

42 Hën di debooko fëën, fuuku mamate, hën Jesosi hopo go a wan kamian hën wanwan. Nöö hën dee hia sëmbë go ta suku ën tefa de go si ën dë. Hën de begi ën faa fika ku de naandë. 43 Hën a piki de taa: „Mi musu go a dee woto köndë go konda di bunu buka u di Tii u Gadu da de tu. Biga di soni dë mbei a manda mi ko a goonliba aki.” 44 Hën a go ta paaja di buka a Judea a dee wosu ka dee Dju nango dini Gadu.