Dee soni dee Mateosi sikifi

5 Di a si dee hia sëmbë, hën a subi go a di kuun. Di a sindo, hën dee bakama fëën ko nëën. 2 Nöö hën a bigi lei de soni. A taa:

3 „Dee sëmbë dee sabi taa de abi Gadu fanöudu,* dë waiwai, u di di Tii u Gadu di dë a liba ala o dë u de.

4 Dee sëmbë dee dë ku tjali a hati dë waiwai, u di de o feni kötöhati.

5 Dee sëmbë dee abi saapifasi* dë waiwai, u di de o feni di goonliba.

6 Dee sëmbë dee kë u soni waka a wan leti fasi kumafa Gadu kë, dë waiwai, biga wan daka soni o pasa sö nöömö.*

7 Dee sëmbë dee a’ tjalihati u wotowan dë waiwai, u di sëmbë o a’ tjalihati u de.

8 Dee sëmbë dee a’ limbohati dë waiwai, u di de o si Gadu.

9 Dee sëmbë dee lobi fiifii libi dë waiwai, u di de o kai de miii* u Gadu.

10 Dee sëmbë dee wotowan bi du ku de u di de ta libi a wan leti fasi hedi, dë waiwai, u di di Tii u Gadu di dë a liba ala o dë u de.

11 Un dë waiwai e, te sëmbë ta kosi unu u mi në hedi, ta du ku unu, ta mindi hii sootu pei hogi ta buta a unu hedi. 12 Un musu ta wai e. Un musu ta piizii seei, u di woon feni wan gaan bunu a liba ala. Biga sö nöö de bi du ku dee tjabukama u Gadu dee bi dë ufö unu.

13 Un dë kuma di satu u di goonliba. Ma ee di satu lasi di tesi fëën, nöö ambë bi o sa toona buta tesi dëën? A sitaati nöö i bi o sa tuwëën go, u sëmbë waka nëën liba. Biga ja o sa du na wan hojo soni ku ën möön.

14 Un dë kuma di faja di ta tuwë limbo da di goonliba. Te wan köndë dë a wan kuun liba, nöö hii sëmbë sa si ën. 15 Sëmbë an o sëndë faja, nöö de tapëën ku wan manda.* Ma de ta hopo ën buta a liba be hii sëmbë a di wosu sa si soni ku di limbo di a ta tuwë. 16 Sö nöö un musu ta tuwë limbo da sëmbë, u de sa si dee bunu wooko dee un ta du, sö taa de sa gafa di Tata fuunu di dë a liba ala.

17 Ma ko u tooka dee Wëti ku dee soni di dee tjabukama u Gadu bi taki e. Ma ko u tooka de, ma mi ko u mbei hii soni pasa kumafa de sikifi. 18 Mi taki da unu e, aluwasi liba ala ku goonliba aki bi o booko kaba a sösö, tökuseei na wan u dee soni dee sikifi a dee Wëti aki o fika di an o pasa e. Dee pikipiki pisi fëën tuu seei o pasa. 19 Fëën mbei ee wan sëmbë ja ta du wan u dee möön piki soni di Gadu ta piki sëmbë u de du, söseei ee i ta piki sëmbë u deseei an du de, nöö ja o fiti u dë a di Tii u Gadu di dë a liba ala basu. Ma ee wan sëmbë i ta du de, söseei ee i ta lei wotowan u de du de tu, nöö joo fiti u dë a di Tii u Gadu di dë a liba ala basu. 20 Mi taki da unu e, ee wan ta libi möön bunu a Gadu wojo möön dee Faliseima ku dee sabima u Wëti, nöö wan o sa dë a di Tii u Gadu di dë a liba ala basu.

21 Un jei taa de bi piki dee gaansëmbë fuunu taa: ’Wan musu kii sëmbë. Ma ee wan sëmbë kii wan sëmbë, nöö de o tjëën go a kuutu.’ 22 Ma mi taki da unu e, hiniwan sëmbë di hati fëën ta dë boonuboonu ku hën baaa, de o tja go a kuutu. Nöö hiniwan sëmbë di ta kosi hën baaa, ta sösö ën, de o tja go a di Gaan kuutuwosu. Ma nöö hiniwan sëmbë di ta taki taa: ’Ju kaba a sösö wisiwasima ju’, de o tuwë go a di faja u Gehëna.*

23 Fëën mbei ee i ta tja wan soni go da Gadu a di begitafa, hën i ko mëni taa i baaa abi wan soni ku i, 24 nöö i musu disa di soni di i bi o da Gadu leti a di begitafa fesi dë, nöö i go a di baaa fii go seeka di taki ku ën te i kaba, nöö i toona ko da Gadu di soni di i bi o dëën awaa.

25 Ee wan sëmbë ta tja i go a kuutu, nöö i musu biinga koti di taki te un dë a pasi nango a di kuutuwosu. Biga ee ja du sö, nöö di sëmbë sa tja i go leifi da di kuutuma, nöö di kuutuma o leifi i da di sëmbë di ta wooko a di kuutuwosu, nöö a o buta i a dunguwosu. 26 Mi taki da i gbelin taa, solanga ja paka di möni de o kai da i fii paka te dou di lasiti köpösënsi,* ja o sa kumutu dë möönsö.

27 Un jei de bi taki taa: ’Ja musu waka da di manu fii nasö di mujëë fii.’ 28 Ma nöö mii taki da unu taa hiniwan sëmbë di ta luku wan mujëë kuma a kë duumi ku ën, nöö nëën hati a duumi ku ën kaa e. 29 Wë nöö ee letisë wojo fii ta mbei i du soni di an bunu,* nöö i diki ën puu tuwë. Biga a möön bunu da i fii lasi wan pisi fii sinkii, ka u de vinde i ku hii i sinkii tuwë go a Gehëna.* 30 Söseei ee letisë maun fii ta mbei i du soni di an bunu, nöö i koti ën puu tuwë. Biga a möön bunu da i fii lasi wan pisi fii sinkii, ka u de vinde i ku hii i sinkii tuwë go a Gehëna.*

31 De bi taki tu taa: ’Ee wan sëmbë booko tööu ku hën mujëë, nöö a musu dëën wan pampia di ta lei taa de booko tööu.’ 32 Ma mii taki da unu taa wan womi an musu booko tööu ku hën mujëë, ee na waka hën mujëë waka dëën. Ee a du di soni dë, a sa mbei di mujëë libi fanafiti a di së u manu ku mujëë soni.* Ee wan woto womi go tööu ku di mujëë dë, nöö hënseei libi fanafiti a di së u manu ku mujëë soni tu.

33 Un jei tu taa de bi piki dee gaansëmbë fuunu taa: ’Ja musu soi taa joo du wan soni, nöö ja du ën. Ma i musu du di soni di i soi a Jehoufa* fesi taa joo du.’ 34 Ma mii taki da unu taa wan musu pena soi seei. Wan musu soi kai liba ala, biga ala di könubangi u Gadu dë. 35 Nöö wan musu soi kai goonliba, biga a dë di bangi fëën ka a ta buta futu. Söseei wan musu soi kai Jelusalën, biga a dë di köndë u di gaan Könu. 36 Ja musu tei i hedi soi ku ën tu, biga ja sa mbei na wan niën u di uwii fii bia ko weti ee nasö baaka. 37 Te i taki ’aai’, nöö be a tan aai e. Nöö te i taki ’nönö’, nöö be a tan nönö. Biga hiniwan soni di joo taki ko a liba möön, ta kumutu a di hogiwan.

38 Un jei de bi taki taa: ’Ee wan sëmbë booko wan sëmbë wojo, nöö de musu booko hën wojo tu. Nöö ee wan sëmbë booko wan sëmbë tanda, nöö de musu booko hën tanda tu.’ 39 Ma mii taki da unu taa wan musu feti ku wan sëmbë di ta du hogi e. Ma ee wan sëmbë kalapu i a bandja jesi, nöö i bia di woto së dëën be a kalapu tu. 40 Nöö ee wan sëmbë kë tja i go a kuutu faa sa feni di koosulai fii, nöö i dëën di djakiti fii tu. 41 Ee wan sëmbë ta duwengi i fii tja wan soni dëën wan juu longi, nöö i tjëën dëën tu juu longi. 42 Ee wan sëmbë hakisi i wan soni, nöö i dëën e. Nöö ee a hakisi i fii leni ën wan soni, nöö i leni ën. Na niingëën.

43 Un jei de bi taki taa: ’I musu lobi di wotowan fii, nöö i buuse di felantima fii.’ 44 Ma mii taki da unu taa un musu ta lobi dee felantima fuunu, söseei un musu ta begi da dee sëmbë dee ta du ku unu. 45 Te un ta du sö, nöö woon lei taa un dë miii* u di Tata fuunu di dë a liba ala. Biga a ta mbei di sonu fëën ta jabi da dee bunuhati sëmbë ku dee hogihati wan tuu. Söseei a ta mbei tjuba ta kai da dee sëmbë dee ta libi bunu nëën wojo, ku dee an ta libi bunu nëën wojo tuu. 46 Wë biga ee dee sëmbë dee ta lobi unu nöö un ta lobi, nöö un wini fëën seei woon feni? Na di soni dë nöö dee pii-lantimönima ta du nö? 47 Nöö ee dee köndë sëmbë fuunu nöö un ta da odi, nöö un apaiti soni seei un ta du? Na di soni dë nöö dee woto köndë sëmbë ta du nö? 48 Fëën mbei un musu dë söndö föutu, leti kumafa di Tata fuunu di dë a liba ala dë söndö föutu.”