Dee soni dee Mateosi sikifi
25 Di Tii u Gadu di dë a liba ala dë kuma teni wëndjë* mujëë mii di tei di lampu faja u de u de go miti wan womi di bi o tööu. 2 Feifi u de bi du soni a wan don fasi, nöö feifi u de bi du soni a wan köni fasi. 3 Dee wan dee bi du soni a wan don fasi bi tja di lampu faja u de, ma de an bi tja oli, boiti di bi dë a di lampu u de kaa. 4 Ma dee wan dee bi du soni a wan köni fasi bi tja oli a wan bata, boiti di bi dë a di lampu u de kaa. 5 Di de sai dë ta wakiti di tööuma faa dou, hën de duumi go piii, u di di womi bi ko lati. 6 Hën de dë te gaan ndeti, hën de jei sëmbë ta bai taa: ’Di womi dou oo, un hopo go miti ën!’ 7 Hën hii dee wëndjë mujëë mii hopo, hën de go seeka dee lampu u de. 8 Hën dee mujëë mii dee bi du soni a wan don fasi piki dee köni wëndjë mujëë mii taa: ’Da u so oli fuunu baa, u di dee faja fuu ta tapa.’ 9 Hën dee köni wëndjë mujëë mii piki de taa: ’Di oli fuu an hia tjika fuu da unu e. Un go bai a dee wënkëma.’ 10 Di dee mujëë mii bi dë a pasi nango bai di oli, hën di tööuma dou. Dee wëndjë mujëë mii dee bi dë kabakaba ta wakiti go ku di tööuma a di tööu wosu, hën bakaten de tapa dee döö. 11 Bakaten, hën dee woto wëndjë mujëë mii ko dou, hën de taa: ’Masa, Masa, jabi di döö da u baa!’ 12 Ma a piki de taa: ’Un haika e, ma sabi unu.’
13 Fëën mbei un musu ta dë kabakaba hiniwan ten, biga wan sabi di juu ku di daka.
14 Di Tii u Gadu di dë a liba ala dë kuma wan womi di ta seeka faa go a woto köndë. Ufö a go, hën a kai dee saafu fëën, hën a da de dee gudu fëën u de luku de dëën. 15 Di womi bi sabi andi hiniwan u dee saafu fëën bi sa du. Fëën mbei a da di fosuwan feifi saku möni,* di u tu a da tu saku möni, nöö di u dii a da wan saku möni, hën a go fëën a woto köndë. 16 Hën wantewante dë, di saafu di a bi da dee feifi saku möni go du wooko ku de, hën a feni feifi saku möni a liba. 17 Di saafu di a bi da dee tu saku möni seei go du wooko ku dee u fëën, hën a feni tu saku möni a liba. 18 Ma di saafu di a bi da wan saku möni bi go diki wan baaku, hën a bei di möni* fëën masa buta a goonbasu.
19 Baka wan longi pisiten, hën di masa u dee saafu aki bi toona ko faa ko luku unfa de bi wooko ku di möni fëën. 20 Di saafu di a bi da dee feifi saku möni ko nëën ku dee feifi saku möni di a bi feni a liba, hën a taa: ’Masa o, i bi da mi feifi saku möni, hën mi wooko ku de te mi feni feifi a liba.’ 21 Hën di masa fëën piki ën taa: ’Aai womi, i dë u futööu. I dë wan bumbuu saafu! I wooko bunu ku di pikisö di mi da i, nöö mi o toona buta wan möön gaan soni a i maun. Ko boo piizii makandi.’ 22 Baka di dë, hën di saafu di a bi da dee tu saku möni ko nëën, hën a taa: ’Masa o, i bi da mi tu saku möni, hën mi wooko ku de te mi feni tu a liba.’ 23 Hën di masa fëën piki ën taa: ’Aai womi, i dë u futööu. I dë wan bumbuu saafu! I wooko bunu ku di pikisö di mi da i, nöö mi o toona buta wan möön gaan soni a i maun. Ko boo piizii makandi.’
24 Te u kaba fëën, hën di saafu di a bi da wan saku möni ko nëën, hën a taa: ’Masa o, mi sabi taa i da wan sëmbë di libi fii taanga. I ta koti soni ka ja bi paandi, nöö i ta pii soni ka ja bi jaa tuwë. 25 Di mi sabi sö fii kaa, hën mi fëëë, nöö hën mi go tjubi di möni fii a goon basu. Luku di möni fii aki.’ 26 Hën di masa fëën piki ën taa: ’Ju hogihati malëngëma ju! Di i bi sabi taa mi ta koti soni ka ma bi paandi, söseei taa mi ta pii soni ka ma bi jaa tuwë, 27 nöö faandi mbei ja tja di möni* u mi go buta a banku? Biga mi bi sa feni wan piki möni a liba te mi ko.’
28 Hën a piki dee saafu fëën taa: ’Un puu di saku möni nëën, nöö un da di saafu di abi dee teni saku möni. 29 Biga di sëmbë di abi, o feni möön hia. A o feni te pasa maaka. Ma nöö di sëmbë di abi wan pikiwan nöö, nöö di pikiwan dë seei de o puu nëën maun. 30 Un tei di wisiwasi saafu dë tuwë go a döö a dungudungu ala. Ala a o dë ta këë, ta njan tanda.’
31 Te di sëmbë di ko dë Libisëmbë Miii o ko ku gaan hei makandi ku hii dee basia u Gadu, nöö a o go sindo a di gaan waiti könu bangi fëën. 32 Hii dee nasiön sëmbë u goonliba o ko makandi nëën fesi, nöö a o paati dee sëmbë leti kumafa wan sëmbë di ta kiija sikapu ta paati sikapu buta a wan së ku kaabita a wan së. 33 A o buta dee sikapu a letisë maun fëën, nöö a o buta dee kaabita a töötösë maun fëën.
34 Nöö di Könu o piki dee sëmbë dee dë a letisë maun fëën taa: ’Un dee sëmbë dee mi Tata feni bunu, un ko tei di kamian fuunu a di Tii u Gadu di a bi seti da unu sensi di goonliba seti. 35 Biga di hangi bi kisi mi, hën un da mi soni u mi njan. Di dëëwata bi kisi mi, hën un da mi wata u mi bebe. Di ma bi abi kamian u mi libi, nöö hën un tei mi buta a unu wosu hii fa wan bi sabi mi. 36 Di mi bi dë söndö soni a sinkii,* hën un da mi soni u bisi. Di mi bi dë ku suwaki, hën un sölugu mi. Di de bi söötö mi a dunguwosu, hën un ko luku mi.’ 37 Nöö dee sëmbë dee ta libi kumafa Gadu kë, o hakisi ën taa: ’Wë Masa o, na un ten u bi si i a kamian ka hangi bi ta kii i, hën u da i soni fii njan? Na un ten u bi si taa dëëwata kisi i, hën u da i wata fii bebe? 38 Na un ten u bi si i kuma sëmbë di an abi kamian u libi, hën u tei i buta a wosu? Na un ten u bi si i söndö soni u bisi, hën u da i soni u bisi? 39 Na un ten u bi si i suwakisuwaki ee nasö a dunguwosu, hën u bi ko luku i?’ 40 Nöö di Könu o piki de taa: ’Mi taki da unu taa ee un bi du ën da wan u dee möön mofina wan u dee baaa u mi, nöö miseei wë un bi du ën da e.’
41 Nöö a o bia piki dee sëmbë dee dë nëën töötösë maun taa: ’Un waka pasa kumutu a mi fesi dë, biga Gadu siba unu. Woon tjuma a di faja di ta kisi u teego di de bi seeka da Didibi ku dee basia fëën. 42 Biga di hangi bi kisi mi, wan bi da mi soni u njan. Di dëëwata bi kisi mi, wan bi da mi soni u mi bebe. 43 Di ma bi abi kamian u mi libi, nöö wan bi tei mi buta a wosu. Di ma bi abi soni u bisi, nöö wan bi da mi soni u bisi. Di mi bi dë ku suwaki, söseei di mi bi dë a dunguwosu, nöö wan bi ko luku mi.’ 44 Nöö deseei o hakisi ën tu taa: ’Masa o, na un ten u bi si i a kamian ka hangi bi ta kii i, nasö taa dëëwata kisi i, hën wa heepi i? Na un ten ja bi abi kamian u libi, nasö soni u bisi, hën wa heepi i? Nöö na un ten i bi dë ku suwaki, nasö a dunguwosu, hën wa ko heepi i?’ 45 Nöö a o piki de taa: ’Mi taki da unu e, ee wan bi du ën da wan u dee möön mofina wan u dee baaa u mi, nöö hën da wan bi du ën da mi.’ 46 Dee lö sëmbë dë o dëdë, nöö na wan daka seei de o ko a libi möön. Ma dee sëmbë dee ta libi bunu a Gadu wojo o feni di libi u teego.”