Dee soni dee Mateosi sikifi

15 Wanlö Faliseima ku sabima u Wëti bi kumutu a Jelusalën, hën de ko a Jesosi, hën de piki ën taa: 2 „Faandi mbei dee bakama fii ta poi dee guwenti u dee gaansëmbë fuu? De an ta wasi* de maun ufö de njan.”

3 Hën a piki de taa: „Faandi mbei un ta buta dee wëti u Gadu a wan së, nöö un ta buta dee guwenti fuunu a de kamian? 4 Biga Gadu taa ’i musu ta kai i mama ku i tata gaan soni’, söseei a taa ’sëmbë musu kii di sëmbë di ta kosi hën mama ku hën tata ta wisiwasi de’. 5 Ma uun ta piki sëmbë wan hii woto soni. ’Te wan sëmbë ta piki hën mama ku hën tata taa: „Di soni di mi bi abi u da unu, hën mi tei buta a wan së kaa u mi da Gadu”, 6 nöö un ta piki ën taa aanfu heepi hën mama ku hën tata a soni möön’. A sö wan fasi un ta buta dee wëti u Gadu a wan së, nöö un ta hai dee lei fuunu tja ko buta a de kamian. 7 Un dee bödjëëma aki. Fuunu di tjabukama Jesaaja bi taki di a bi taki taa: 8 ’Dee sëmbë aki, ku de buka de ta du kuma de ta hei mi, ma de an pena lobi mi seei. 9 U sösö seei de ta dini mi, u di na dee wëti u mi de ta lei sëmbë, ma libisëmbë wëti de ta lei sëmbë.’” 10 Nöö hën Jesosi kai dee hia sëmbë dee bi sai dë ko nëën, hën a taa: „Dee sëmbë o, mi o taki wan soni da unu aki, nöö un mbei möiti fuun fusutëën. 11 Na dee soni dee wan sëmbë ta njan, de ta sundju ën a Gadu wojo, ma dee soni dee a ta taki, de ta sundju ën a Gadu wojo.”

12 Hën dee bakama fëën ko nëën, hën de piki ën taa: „I sabi taa dee soni dee i taki dë toobi dee Faliseima u?” 13 Hën Jesosi piki de taa: „Hiniwan soni di mi Tata an paandi, a o hön puu. 14 Un disa de. De dë kuma bookowojoma di ta suku u lei sëmbë di pasi di de musu waka. Wë ee wan bookowojoma ta tja wan woto bookowojoma, nöö de tuu o kai go a ngötö.” 15 Hën Petuisi piki ën taa: „Booko ën a piki möni da u baa.” 16 Hën a piki de taa: „Wan fusutëën tu nö? 17 Dee soni di wan sëmbë ta njan, nango nëën bëë. Te u kaba fëën de ta toona kumutu baka. 18 Ma dee soni dee wan sëmbë ta taki ta kumutu nëën hati, nöö dee soni dë de ta sundju ën a Gadu wojo. 19 Biga a sëmbë hati dendu hii pei hogi ta kumutu. Soni kuma: kii sëmbë, waka da i manu nasö i mujëë, fufuu, fanafiti libi a di së u manu ku mujëë soni,* mindi soni, ku di sösö di sëmbë ta sösö dee soni dee nama ku Gadu. 20 Dee soni aki, de ta sundju wan sëmbë a Gadu wojo. Ma na te a njan söndö wasi* maun.”

21 Di Jesosi kumutu dë, hën a go a di pisiwata u Tilusi ku Sidön. 22 Hën wan Finisia mujëë di bi ta libi a di pisiwata dë ko nëën. A bi ta bai taa: „Masa o, Womi Mii* u Dafiti, abi tjalihati um’ baa. Taku soni dë a di mujëë mii u mi liba, nöö a ta tja sitaafu seei te na soni.” 23 Ma Jesosi an bi ta piki di mujëë. Fëën mbei dee bakama fëën piki ën taa: „Masa o, gaantangi, piki di mujëë be a disa u baa. Biga a ta bai ta ko a u baka këdë.” 24 Hën Jesosi taa: „Gadu manda mi go a dee Isaëli sëmbë dee dë kuma lasilasi sikapu. An manda mi go a woto sëmbë.” 25 Ma di mujëë ko tjökö kini nëën fesi, hën a begi ën taa: „Masa o, heepi mi baa.” 26 Hën Jesosi taa: „An fiti u puu bëëë a dee mii maun tuwë da dagu mii e.” 27 Hën di mujëë piki taa: „Aai Masa, sö a dë tuu o. Ma dee pikipiki pisi dee ta puu ta kai a tafa basu wë? Dee dagu mii an sa njan de nö?” 28 Hën Jesosi piki ën taa: „Aai mujëë, di biibi fii taanga tuu. Be soni pasa kumafa i kë.” Hën wantewante dë di mujëë mii fëën ko bëtë.

29 Di Jesosi kumutu dë, hën a go a wan kamian di dë zuntu ku di ze u Galilea. Hën a subi wan kuun, hën a go sindo. 30 Hën wanlö gaan hia sëmbë ko nëën, hën de tja wanlö lanma, wanlö bookowojoma, wanlö makisama, wanlö tapabukama, ku wanlö woto sëmbë dee bi dë ku suwaki ko nëën, hën a kula de. 31 Di dee sëmbë si fa dee tapabukama ko ta fan, fa dee lanma ko ta waka, fa dee makisama ko bëtë, söseei fa dee bookowojoma ko ta si soni, hën a foondo de tuutuu. Hën de gafa di Gadu u Isaëli.

32 Hën Jesosi kai dee bakama fëën ko nëën, hën a piki de taa: „Tjali u dee sëmbë aki kisi mi o. Biga tide mbei di u dii daka di de dë ku mi aki, nöö de an njan na wan soni möönsö. Ma sa manda de go söndö njan, biga kandë so u de sa faau a pasi.” 33 Hën dee bakama fëën hakisi ën taa: „Naasë woo feni bëëë da dee gaan hia sëmbë aki ka u dë a longi aki?” 34 Hën a hakisi de taa: „Un mëni bëëë un abi dë?” Hën de piki ën taa: „U abi seibi bëëë aki ku wantu piki fisi.” 35 Hën a manda dee sëmbë go sindo a goon. 36 Hën a tei dee seibi bëëë ku dee fisi, hën a da Gadu tangi te a kaba. Nöö hën a booko de pisipisi, hën a tëndë da dee bakama fëën u de tja go paati da dee sëmbë. 37 Hën hii dee sëmbë njan te bëë u de fuu, hën dee bakama go pii dee bëëë dee bi fika, nöö hën de fuu seibi gaan manda. 38 De bi dë 4000 womi dee bi njan, ufö i abi dee mujëë ku dee mii. 39 Baka di dë, hën Jesosi manda dee sëmbë go a wosu. Hën a tei boto go a di pisiwata u Magidala.