Dee soni dee Lukasi sikifi
20 Wan daka di Jesosi bi ta lei sëmbë soni a di Wosu u Gadu, söseei di a bi ta paaja di bunu buka, hën dee fesima u dee begima ku dee sabima u Wëti ku dee gaanwomi u di köndë ko nëën. 2 Hën de hakisi ën taa: „Ambë manda i fii du dee soni aki? Ambë da i taki fii du dee soni aki? Kondëën da u.” 3 Hën Jesosi piki de taa: „Miseei o hakisi unu wan soni. Nöö un musu piki mi e. 4 Ambë bi manda Johanisi faa dopu sëmbë? Gadu ö, naa libisëmbë?” 5 Hën de go a së go dë ta pakisei di soni nango ta ko. De ta taki taa: „Ee u piki taa: ’Gadu hën mandëën,’ nöö a o hakisi u taa: ’Nöö faandi mbei wan bi ta biibi ën?’ 6 Ma ee u taki taa ’libisëmbë hën mandëën’, nöö dee sëmbë o naki u ku sitonu kii, u di de ta biibi taa Johanisi bi dë wan tjabukama u Gadu.” 7 Fëën mbei de piki Jesosi taa de an sabi ambë manda Johanisi faa dopu sëmbë. 8 Hën Jesosi piki de taa: „Nöö miseei an o piki unu ambë da mi taki u mi du dee soni aki.”
9 Hën a bigi konda wan woto da dee sëmbë. A taa: „Wan womi bi abi wan goon fëën, hën a paandi doloifi nëën te a kaba. Hën a juu di goon da wanlö sëmbë di ta paandi soni, hën a go fëën a woto köndë u wan pisiten. 10 Di dee doloifi lepi, hën a manda wan saafu fëën go a dee sëmbë faa go tei so u dee fuuta u di goon tja ko dëën. Ma dee sëmbë dee a bi juu di goon da kisi ën, hën de fon mën te a fon, hën de mandëën go maun hooo. 11 Nöö hën di womi toona manda wan woto saafu go möön. Hën de fon mën, söseei de dëën sen. Hën de mandëën go maun hooo. 12 Nöö hën di womi manda wan woto saafu go a de möön. Hën de dëën makei tu, hën de tuwëën go a döösë u di doloifi goon. 13 Hën di womi di abi di goon taa: ’Wë andi seei mi musu du möön? Mi o manda di womi mii u mi di mi lobi go a de. De o abi lesipeki dëën.’ 14 Ma di dee sëmbë dee bi juu di goon si di womi mii, hën de taki taa: ’Te di sëmbë di abi di doloifi goon dëdë, nöö di womi mii aki, hën o feni di goon. Wë boo kii ën, nöö di goon o fika da u wanwan.’ 15 Hën dee sëmbë puu ën a di goon tja go kii. Ma nöö andi un mëni taa di sëmbë di abi di goon o du ku de? 16 Na kii a o kii dee sëmbë dee bi juu di goon tuu fiaa, nöö a juu ën da woto sëmbë nö?”
Di dee sëmbë jei di woto aki, hën de taki taa: „Nönö, di soni dë an musu pasa sö e!” 17 Hën a luku de diiin, hën a taki taa: „Gadu buku taki taa: ’Dee sëmbë dee ta mbei wosu tuwë wan sitonu a kapëë, nöö hën di sitonu dë ko dë di mama sitonu di ta hoi di wosu.’ Wë andi di soni aki kë taki?’ 18 Hiniwan sëmbë di naki futu kai a di sitonu aki liba, o kisi gaan makei. Nöö ee di sitonu aki kai a wan sëmbë liba, nöö a o peetëën kii.”
19 Di a fan sö te a kaba, hën dee sabima u Wëti ku dee fesima u dee begima bi kë kisi ën tja go söötö, u di de bi sabi taa de wë Jesosi bi ta taki. Ma u di de bi ta fëëë dee sëmbë mbei de an du sö. 20 Nöö hën de sai dë ta watji Jesosi nöömö, hën de paka wanlö womi u de go fan ku ën kuma de da bumbuu sëmbë. Nöö ee a bi taki wan soni di an bunu, nöö de bi o tjëën go kaagi da dee tiima u di köndë. 21 Di de go a Jesosi, hën de taa: „Mësitë o, u sabi taa i ta taki tuutuu soni, ja ta paati bëë, söseei i ta lei sëmbë soni u Gadu gbelingbelin kumafa a dë. 22 A fiti u paka di Gaan könu u Loomë lantimöni ö, naa an fiti u pakëën?” 23 Ma Jesosi bi sabi taa suku de bi ta suku fasi u kisi ën. Fëën mbei a piki de taa: 24 „Un tja wan soofu möni* ko da mi i si. Ambë abi di në ku di fesi di dë a di möni liba aki?” Hën de taa: „Di Gaan könu.” 25 Hën Jesosi piki de taa: „Wë nöö un da Gaan könu di soni di dë u Gaan könu, nöö un da Gadu di soni di dë u Gadu.” 26 De an bi sa mbei a taki wan soni di an bunu. Ma de bi foondo di de bi jei di fasi fa a bi piki de. Fëën mbei de an bi sa taki na wan soni möön.
27 Hën so u dee Saduseima ko nëën. Dee sëmbë aki an bi ta biibi taa dëdë sëmbë sa toona weki ko a libi baka. Hën de hakisi ën taa: 28 „Mësitë o, Mosesi bi sikifi taa: ’Ee wan womi dëdë disa di mujëë fëën a baka söndö de pai miii, nöö di baaa fëën musu tööu ku di mujëë dë, nöö a musu pai miii ku ën da di baaa fëën. 29 Wë nöö de bi dë seibi baaa. Nöö hën di gaanwan tööu ku wan mujëë, hën a dëdë disa di mujëë. Ma hën ku di mujëë an pai möönsö. 30 Di u tu baaa tööu ku di mujëë, 31 ma a dëdë disa di mujëë söndö u de pai miii. Sö nöö a pasa ku di u dii baaa tu. Nöö sö hii dee seibi baaa tuu tööu ku di mujëë, ma na wan kodo u de pai miii ku di mujëë möönsö. 32 Te u kaba fëën, hën di mujëë seei ko lasi libi. 33 Wë nöö ee de toona ko a libi baka, nöö undi u dee seibi baaa o abi di mujëë? Biga de tuu bi tööu ku ën.”
34 Hën Jesosi piki de taa: „Dee sëmbë u di ten aki* ta tööu, 35 ma dee sëmbë dee fiti u de weki ko a libi baka a di ten di ta ko an o tööu. 36 Fuu taki ën, nöö de an o sa dëdë möön, biga de o dë kuma dee basia u Gadu dee dë a liba ala, söseei de o ko dë miii u Gadu te de weki ko a libi baka. 37 A di woto di Mosesi bi konda u di uwii di bi ta kisi faja ma an bi ta tjuma möönsö, nöö a bi lei taa sëmbë di dëdë sa toona ko a libi baka. A bi taki taa Jehoufa* da di Gadu u Abahamu, di Gadu u Isaki ku di Gadu u Jaköpu.’ 38 An dë di Gadu u dee sëmbë dee dëdë, ma a dë di Gadu u dee sëmbë dee dë ku libi. Biga de tuu dë ku libi jeti nëën wojo.” 39 Hën wanlö sabima u Wëti piki Jesosi taa: „Mësitë, i abi leti e. Sö a dë tuu!” 40 Na wan u de bi abi hati u hakisi Jesosi soni möön.
41 Hën a bia hakisi de taa: „Faandi mbei sëmbë ta taki taa di Keesitu da di womi mii u Dafiti? 42 Biga a di buku Psalöm, Dafiti bi taki taa ’Jehoufa* taki da mi Masa taa: „Ko sindo a mi leti së maun 43 u te mi buta dee felantima fii a i basufutu.”’ 44 Wë ee Dafiti ta kai ën Masa, nöö unfa a sa dë miii fëën?”
45 Di hii dee sëmbë bi dë ta haikëën, hën a piki dee bakama fëën taa: 46 „Un mëni unuseei ku dee sabima u Wëti e. De lo’ u ta waka lontu ku langa lai a sinkii, söseei de lo’ te sëmbë ta da de odi a wojowojo. Te de go a dee wosu ka dee Dju nango dini Gadu, nöö de nango sindo seei te a fesi,* söseei de lo’ u go sindo a dee möön bunu kamian te de go a wan piizii. 47 De ta ganjan dee mujëë dee manu u de dëdë, nöö de tei hii dee gudu u de, söseei de ta begi gaan langa begi u sëmbë musu ta si de. Dee sëmbë aki o kisi wan möön gaan* sitaafu.”