Dee soni dee Lukasi sikifi

12 A di pisiten dë, dusudusu sëmbë ta ko a Jesosi tee kamian an tjika u hoi de, nöö de ta peeta deseei. Hën a piki dee bakama fëën taa: „Un musu ta köni ku di sooda u dee Faliseima. Hën da di ganjan di de ta ganjan sëmbë ta du kuma de da bumbuu sëmbë. 2 Biga na wan soni o dë a tjubi te nöö an o ko a limbo. Nöö na wan soni o pasa te nöö sëmbë an o ko sabi ën. 3 Dee soni dee un ta taki a dungu, de sëmbë o jei a gaan didia. Nöö dee soni dee un ta taki sapisapi a kamba dendu, de sëmbë o feni ta bai basia. 4 Un dee mati u mi aki, mi taki da unu e, wan musu fëëë dee sëmbë dee sa kii unu, ma di an sa du na wan soni ku unu möön. 5 Ma be mi piki unu ambë un musu fëëë. Un musu fëëë di Sëmbë di sa kii unu te a kaba, nöö a tuwë unu go a Gehëna.* Mi taki e, di Sëmbë dë hën un musu fëëë. 6 Sëmbë ta sei feifi piki fou u tu köpösënsi,* na sö nö? Ma tökuseei Gadu an ta fëëkëtë na wan u de. 7 Hii dee uwii dee dë a unu hedi seei a sabi. Fëën mbei wan musu booko unu hedi, biga un bumbuu gaanfa möön hii dee piki fou aki.

8 Mi taki e, ee wan sëmbë an ta fëëë u piki a lanti dendu taa mi ku ën nama, nöö di sëmbë di ko dë Libisëmbë Miii an o fëëë u piki dee basia u Gadu taa hën ku ën nama tu. 9 Ma ee wan sëmbë ja kë piki a lanti fesi taa mi ku i nama, nöö miseei ma o piki dee basia u Gadu taa mi ku i nama. 10 Ee wan sëmbë taki hogi u di sëmbë di ko dë Libisëmbë Miii, nöö Gadu o dëën paadon. Ma ee wan sëmbë wisiwasi di kaakiti u Gadu, nöö Gadu an o dëën paadon. 11 Te de tja unu go a lanti fesi,* a heihei sëmbë fesi, nasö a dee tiima u köndë, nöö wan musu ta booko unu hedi ta hakisi unuseei ee andi woon taki. 12 Biga a di juu dë, di kaakiti u Gadu o mbei un sabi andi un musu taki.”

13 Hën wan u dee sëmbë di bi dë a dee gaan hia sëmbë dë dendu bai piki Jesosi taa: „Mësitë o, piki mi baaa be a paati dee gudu u mi tata ku mi.” 14 Hën a piki ën taa: „Womi, ambë da mi di wooko u ko kuutu soni fuunu, nasö u ko heepi unu paati gudu?” 15 Nöö hën a taki da dee sëmbë taa: „Un musu mëni unu seei be wan ko abi langawojo a soni e. Biga na gudu hën ta mbei sëmbë feni libi.” 16 Di a fan sö te a kaba, hën a da de wan woto. A taa: „Wan guduma bi abi wan goon fëën, nöö di goon fëën bi ta ko soni seei. A bi ta puu hia njanjan nëën. 17 Hën a sindo pakisei taa: ’Wë unfa mi o du? Biga ma a’ wosu tjika u mi lai dee njanjan dee mi abi.’ 18 Hën a taa: ’Söö, mi saandi mi o du. Mi o booko dee suwa aki puu, nöö mi o mbei möön gaanwan, nöö mi o buta hii dee soni u njan u mi ku hii dee gudu u mi tuu a de dendu. 19 Nöö ma o pena booko mi hedi, biga dee gudu dee mi abi o tjaam’ sömëni jaa. Fëën mbei mi o ta njan, ta bebe, ta piizii u di libi.’ 20 Hën Gadu taki dëën taa: ’I donma ju! A di ndeti aki seei joo lasi di libi fii. Nöö ambë seei dee gudu fii o fika da?’ 21 Sö nöö soni dë da di sëmbë di ta suku u ko gudu a di goonliba aki, ma an gudu a Gadu wojo.”

22 Hën Jesosi piki dee bakama fëën taa: „Fëën mbei mi taki da unu taa wan musu ta booko unu hedi möön ta hakisi unuseei ee andi woon njan, andi woon bebe, nasö andi woon bisi. 23 Biga di libi fuunu dë gaan soni möön soni u njan, nöö di sinkii fuunu dë gaan soni möön soni u bisi. 24 Un luku dee fou ta buwa a liba ala. De aanbi goon ta paandi soni u de feni njan, söseei de aanbi suwa ta tjubi njanjan. Ma tökuseei Gadu ta sölugu de. Wë wan bumbuu gaanfa möön dee fou nö? 25 Undi fuunu sa libi tjë sö möön longi, u di a ta booko hën hedi ku soni? 26 Wë nöö ee ja sa du di piki soni dë, nöö ee i ta booko i hedi ku woto soni seei, nöö a o heepi ö? 27 Un luku dee folo. De an ta wooko, söseei de an ta mbei soni u bisi. Ma mi taki da unu e, fa Könu Salumön bi ta bisi dee gaan waiti bisi fëën seei, tökuseei dee bisi fëën an bi hanse kuma dee folo naandë. 28 Wë nöö ee Gadu ta bisi dee folo dë hanse sö, hii fa de ta dë hansehanse tide, nöö amanjan de puu kai a goon te sëmbë tja go tjuma, nöö ja si kuma hii fa biibi fii piki seei Gadu o da i soni u bisi nö? 29 Fëën mbei wan musu booko unu hedi möön ku andi woon njan, nasö andi woon bebe. Wan booko unu hedi möön e, 30 biga a dee soni aki baka dee sëmbë dee an sabi Gadu ta biinga. Ma di Tata fuunu a liba ala sabi taa un abi hii dee soni aki fanöudu. 31 Fëën mbei a di Tii u Gadu baka un musu ta biinga e, nöö Gadu o da unu hii dee soni u taki dë tuu.

32 Un dee sëmbë u mi aki, hii fa un dë wan piki kulupu seei, tökuseei wan musu fëëë e, biga unu Tata feni ën u bunu faa da unu di Tii fëën. 33 Go sei dee gudu dee i abi, nöö i da dee pootima di möni. Mbei möni saku di an ta gaandi. Di möni saku dë da dee gudu dee i abi a liba ala, di na ta kaba a sösö möönsö. Biga ala fufuuma an sa fufuu de, söseei kopikopi an sa njan de kaba a sösö. 34 Biga ka dee gudu fii dë, naandë hati fii o dë tu.

35 Dee sëmbë o, un musu dë kabakaba bisibisi ku lampu faja sëndësëndë e. 36 Söseei un musu dë leti kuma wanlö sëmbë di ta wakiti di masa u de u te a kumutu a tööu wosu toona ko baka. Nöö te a ko ta naki döö, nöö de sa jabi dëën wante. 37 Te di masa ko si taa dee saafu bi dë kabakaba ta wakiti ën, nöö soni o waka bunu da de. Mi taki da unu e, di masa o go seeka te a kaba, nöö a mbei de sindo a tafa, nöö a da de soni u njan. 38 Soni o waka bunu da dee saafu aki ee di masa u de ko a gaan ndeti,* nasö ee a ko a ganian kanda,* hën a si taa de dë kabakaba ta wakiti ën! 39 Ma un musu hoi a pakisei taa ee di sëmbë di abi di wosu bi sabi na un juu di fufuuma bi o ko, nöö an bi o dëën pasi faa booko ko a di wosu fëën. 40 Fëën mbei unuseei musu dë setiseti tu e. Biga di sëmbë di ko dë Libisëmbë Miii o ko a wan juu di wan bi mëni.”

41 Hën Petuisi hakisi Jesosi taa: „Masa o, u wanwan i ta konda di woto aki da u? Naa i ta kondëën da hii sëmbë?” 42 Hën Jesosi piki ën taa: „Ambë da di wookoma di dë u futööu, di köniwan di hën masa o buta faa ta da dee wotowan fëën njanjan go dou a di juu di de abi ën fanöudu? 43 A o bunu seei da di saafu dë te hën masa dou, nöö a si taa a ta du di wooko fëën! 44 Mi taki da unu e, di masa fëën o butëën faa luku hii dee gudu dee a abi. 45 Ma ee di saafu dë ko ta pakisei taa: ’Mi masa an o ko jeti.’ Nöö hën a bigi ta fon dee woto saafu, ta njan ta bebe fu te a ko dööngö, 46 nöö di masa u di saafu dë o ko a wan daka, söseei a wan juu di an bi mëni, nöö a o sitaafu ën wan gaan hogi sitaafu. A o butëën makandi ku dee sëmbë dee an ta piki hën buka. 47 Baka di dë, di masa o fon di saafu te a fon. Biga hii fa di saafu bi fusutan andi hën masa bi hakisi ën, tökuseei an bi dë seekaseeka, söseei an bi du andi a bi musu du. 48 Ma di fon di de o fon di saafu di an bi fusutan andi a bi musu du an o hebi sö. Biga di sëmbë di i da möön gaan wooko, nöö nëën joo ta suku fii feni möön hia soni. Ee i da wan sëmbë taki a möön hia soni liba, nöö joo hakisi ën möön fa i bi naa.

49 Fa i si mi ko a goonliba aki, nöö mi ko u ko suti faja. Ma nöö ee di faja kisi kaa, nöö andi seei mi kë möön? 50 Ma wan dopu dë u mi dopu jeti. Te mi du di soni aki, nëën ufö mi o böö vëëë sö! 51 I mëni taa mi ko u tja bööböö libi ko a goonliba aki ö? Na seei! Mi taki e, mi ko u paati sëmbë ku sëmbë. 52 Bigi u tide, ee feifi sëmbë dë a wan wosudendu, nöö de o ta kisi toobi ku deseei u mi hedi. Dii u de o ta kisi toobi ku dee tu dee dë a wan së. Nöö tu u de o ta kisi toobi ku dee dii wotowan. 53 Wan tata o poi ku di womi mii fëën, nöö wan womi mii o poi ku di tata fëën. Wan mujëë mii o poi ku hën mama, nöö wan mama o poi ku di mujëë mii fëën. Mai ku mai o poi ku deseei.”

54 Hën Jesosi piki dee gaan hia sëmbë dee bi sai dë taa: „Te un si wan bundji ta kumutu a di së u sonu go, nöö un ta taki taa: ’Wan gaan tjuba o kai e’, nöö te u kaba fëën a ta pasa sö tuu. 55 Te un hopo wojo luku a di së u libasë, nöö te di ventu ta ko, nöö un ta taki taa: ’Di ventu di ta ko aki, di sonu wë o hati sö e.’ Nöö sonu ta hati tuu. 56 Un bödjëëma unu, un sa’ u wegi dee maaka u goonliba aki ku dee u liba ala, ma unfa a waka wan sa fusutan dee soni dee ta pasa a di ten aki? 57 Faandi mbei unuseei an ta öndösuku soni fuun ko sabi andi bunu ku andi an bunu? 58 Ee i ku wan sëmbë a’ soni, hën un dë a pasi nango a wan kuutuma, nöö i musu mbei möiti seeka di taki ufö un dou. Ee ja du sö, nöö di sëmbë sa tja i go leifi da di kuutuma, nöö di kuutuma sa mbei de söötö i. 59 Mi taki e, solanga ja paka di möni de o kai da i fii paka te dou di lasiti köpösënsi,* ja o sa kumutu dë möönsö.”