Dee soni dee Mateosi sikifi

6 „Un köni be wan ta du bunu soni u di un kë u sëmbë gafa unu. Ee un ta du sö, nöö di Tata fuunu di dë a liba ala an o paka unu fëën. 2 Te joo du bunu da pootima, nöö na bai ën a lanti kumafa dee bödjëëma ta du a dee wosu ka dee Dju nango dini Gadu, söseei a dee sitaati u sëmbë musu gafa de. Mi taki da unu e, di gafa di libisëmbë ta gafa de, hën nöö de o feni.* 3 Ma te woon du pooti sëmbë wan bunu, nöö wan musu du ën u woto sëmbë sabi.* 4 Sëmbë aanfu sabi dee bunu soni dee un ta du da wotowan, nöö di Tata fii di dë a liba ala di ta si hii soni, o paka i fëën.

5 Söseei te woon begi, nöö wan musu du kuma dee bödjëëma, biga de lo’ u go taanpu begi a dee wosu ka dee Dju nango dini Gadu, söseei a dee gaan pasi u sëmbë sa si de. Mi taki da unu e, di soni de bi ta suku, hën de feni dë kaa. 6 Ma te joo begi, nöö i denda go i wanwan a i kamba, nöö i tapa i döö, nöö i begi di Tata fii a liba ala, di ta si i, nöö a o mbei i feni bunu. 7 Te woon begi, nöö wan musu ta taki dee seei soni nango ta ko nöömö kumafa dee woto köndë sëmbë ta du. Biga de ta mëni taa Gadu o jei de te de taki te a hia soni. 8 Wan musu du kuma de, biga di Tata fii a liba ala sabi andi i abi fanöudu ufö i hakisi ën seei.

9 Te woon begi, nöö sö un musu begi e:

’U Tata a liba ala, be di në fii ko dë limbolimbo te dou. 10 U ta begi i be i tii goonliba aki, sö taa soni sa pasa kumafa i kë a goonliba aki kumafa a ta pasa a liba ala. 11 U ta begi i fii da u soni u njan da di daka u tide. 12 Da u paadon u dee föutu fuu kumafa useei bi da wotowan paadon u dee soni di de du ku u. 13 Heepi u be wa du soni di an bunu, nöö i puu u a Didibi maun.’

14 Biga ee un ta da wotowan paadon u dee soni de ta du ku unu, nöö di Tata fuunu di dë a liba ala seei o da unu paadon tu. 15 Ma ee wan ta da wotowan paadon u dee soni de ta du ku unu, nöö di Tata fuunu di dë a liba ala seei an o da unu paadon tu.

16 Te woon dë söndö njan u wan pisiten,* nöö wan musu ta buta fesi fuunu tjalitjali kumafa dee bödjëëma ta du. Biga de ta du sö u sëmbë sa si taa de ta dë söndö njan. Mi taki da unu e, di soni de bi ta suku, hën de feni dë kaa. 17 Ma te woon dë söndö njan u wan pisiten, nöö un musu lobi fatu a unu hedi, nöö un wasi seeka sinkii. 18 Te un ta du sö, nöö sëmbë an o si taa un ta dë söndö njan u wan pisiten. Ma di Tata fuunu a libi ala wanwan o si. Nöö di Tata fii di dë a liba ala di ta si hii soni, o mbei i feni gaan bunu.

19 Wan tjubi dee gudu fuunu a goonliba aki, biga kopikopi* ku sukufu sa poi de kaba a sösö, söseei fufuuma sa ko fufuu de. Wan musu biinga fuun abi hia gudu a goonliba aki, biga kopikopi ku sukufu sa poi de kaba a sösö, söseei fufuuma sa ko fufuu de. 20 Ma tjubi dee gudu fii a Gadu a liba ala ka kopikopi ku sukufu an sa ko poi de kaba a sösö, söseei ka fufuuma an sa fufuu de. 21 Biga ka gudu fii dë, naandë hati fii o dë tu.

22 Wojo fii dë kuma wan faja di ta tuwë limbo da i. Fëën mbei ee wojo fii limbo, nöö hii i sinkii o limbo gbegedee. 23 Ma ee wojo fii an ta si soni limbolimbo, nöö sinkii fii o dë a dungu piii.

24 Na wan sëmbë sa wooko da tu masa, biga joo lobi wan möön di wotowan, nasö joo hëngi a wan möön di wotowan. Ja sa dini Gadu ku Gudu a di wan seei ten.

25 Fëën mbei mi taki da unu taa wan musu ta booko unu hedi möön ta hakisi unuseei ee andi woon njan, andi woon bebe, nasö andi woon bisi. Biga di libi fii bunu möön soni u njan, nöö di sinkii fii bunu möön soni u bisi. 26 Un luku dee fou ta buwa a liba ala. De an abi goon ta paandi soni u de feni njan, söseei de an abi suwa ta tjubi njanjan. Ma tökuseei di Tata fuu di dë a liba ala ta sölugu de. Wan bumbuu gaanfa möön dee fou nö? 27 Undi fuunu sa libi tjë sö möön longi, u di un ta booko unu hedi ku soni? 28 Faandi mbei un ta booko unu hedi ku andi woon bisi? Un luku dee folo. De an ta wooko, söseei de an ta mbei soni u bisi. 29 Ma mi taki da unu e, fa Könu Salumon bi ta bisi dee gaan waiti bisi fëën seei, tökuseei dee bisi fëën an bi hanse kuma dee folo naandë. 30 Wë nöö ee Gadu ta bisi dee folo dë hanse sö, hii fa de ta dë hansehanse tide, nöö amanjan de puu kai a goon te sëmbë tja go tjuma, nöö ja si kuma hii fa biibi fii piki seei Gadu o da i soni u bisi nö? 31 Fëën mbei wan musu ta booko unu hedi ta hakisi unuseei taa: ’Andi seei woo njan?’, ’Andi seei woo bebe?’ nasö ’andi seei woo bisi?’ 32 Biga a dee soni aki baka dee sëmbë dee an sabi Gadu ta biinga. Ma di Tata fii a liba ala sabi taa i abi hii dee soni aki fanöudu.

33 A di Tii u Gadu baka fosu un musu ta biinga, ta libi kumafa a kë, nöö Gadu o da unu hii dee soni u taki dë tuu. 34 Fëën mbei wan musu ta booko unu hedi ku andi o pasa amanjan e, biga amanjan o abi fëën bookohedi. Hiniwan daka ta abi fëën bookohedi.”