Dee soni dee Mateosi sikifi
28 A bi dë di fosu daka u di wiki, nöö di Saba daka bi pasa. Di kamian bi bigi ta limbo, hën Malia Magidala ku di woto Malia go luku di geebi.
2 Goon bi seki te na soni, u di wan basia u Jehoufa* bi kumutu a liba ala ko puu di gaan sitonu di de bi tei tapa di baaku buka, hën a go sindo nëën liba. 3 Fesi fëën bi dë kuma te faja koti a liba ala, nöö dee koosu fëën bi dë wetiweti faan. 4 Dee sodati dee bi ta hoi wakiti a di geebi bi ko fëëë tee de ta tëëmë tjatjatjatja. De bi ko dë piii kuma de dëdë.
5 Ma di basia u Gadu piki dee mujëë taa: „Wan fëëë e. Mi sabi taa un ta suku Jesosi di de bi peka a wan posu kii. 6 Ma an dë aki e, biga a weki ko a libi baka kumafa a bi piki unu. Un ko luku di kamian ka de bi butëën. 7 Nöö un go hesihesi go piki dee bakama fëën taa a weki ko a libi baka. A ta waka a unu fesi go a Galilea, nöö woon si ën ala. Di buka aki mi bi musu konda da unu e.”
8 Hën dee mujëë kumutu a di geebi hesihesi. De bi fëëë, ma de bi ta wai seei te na soni. Hën de kule tja di buka go konda da dee bakama u Jesosi. 9 Fa de nango dë, hën de ku Jesosi miti, hën a taa: „Un dë nö?” Hën de tjökö kini a goon nëën fesi, hën de panjëën nëën futu hoi. 10 Hën Jesosi piki de taa: „Wan fëëë e! Ma un go piki dee baaa* u mi taa de musu go a Galilea, nöö ala de o si mi.”
11 Di dee mujëë bi dë a pasi nango, hën so u dee sodati dee bi ta hoi wakiti a di geebi go a di köndë, hën de go piki dee fesima u dee begima hii dee soni dee bi pasa. 12 Baka di dee fesima u dee begima ku dee gaanwomi bi kuutu te de kaba, hën de da dee sodati gaan hia soofu möni, 13 hën de piki de taa: „Un musu piki sëmbë taa: ’Di u bi dë ta duumi, hën dee bakama fëën fufuu ën tei tja go.’ 14 Ee di taki aki dou a gaama jesi, nöö woo heepi unu fan ku ën. An dë fuun booko unu hedi.” 15 Hën dee sodati tei di möni, hën de du leti kumafa de piki de. Nöö di woto aki dee Dju ta paaja te kisi di ten fuu aki.
16 Ma dee ëlufu bakama u Jesosi bi go a Galilea a di kuun ka Jesosi bi piki de u de miti ën. 17 Di de si ën, hën de tjökö kini a goon nëën fesi. Ma so u de an bi ta kaba biibi taa hën di dë. 18 Jesosi waka ko a de, hën a piki de taa: „Mi kisi hii makiti a liba ala ku goonliba aki tuu. 19 Fëën mbei un musu go a sëmbë u hii pei köndë, nöö un heepi de u de bia ko dë bakama u mi. Un musu dopu de a di në u di Tata, a di në u di Womi Mii, söseei a di në u di kaakiti u Gadu. 20 Nöö un musu lei de u de du hii dee soni dee mi manda unu fuun musu ta du. Nöö woon si taa mi o dë ku unu hiniwan ten, u te di ten* di u dë aki o kaba.”