Dee soni dee Maikusi sikifi

9 A taki da de möön taa: „Mi taki da unu taa so fuunu di dë aki an o dëdë ufö un si di Tii u Gadu bigi tii.” 2 Baka sikisi daka, hën Jesosi tei Petuisi, Jakobosi ku Johanisi, hën de subi go a wan hei kuun liba. Hën de sai dë te wan pisi, hën Jesosi ko tooka a de wojo seei. 3 Dee lai nëën sinkii ko weti faan. Ka de weti tjika dë, na wan libisëmbë tjika u mbei koosu lai ko weti sö. 4 De bi si Mosesi ku Elia tu. De bi ko ta fan ku Jesosi. 5 Hën Petuisi piki Jesosi taa: „Labi* o, a bunu fa u ko aki e. Boo mbei dii tjëkëliba buta aki. Wan u fii, wan da Mosesi ku wan da Elia.” 6 Fa a fan dë seei, an bi saandi a musu taki, biga hii de tuu bi ta fëëë te na soni. 7 Hën wan bundji saka ko tapa de buuu. Hën de jei wan töngö ta fan a di bundji dendu. A taa: „Di lobi Womi Mii u mi hën disi. Libi fëën ta kai ku mi. Nöö hën fuun ta haika e.” 8 Te u de kë mëni, hën de an si dee tu sëmbë dë möön. Jesosi wanwan tö nöö de si fika dë.

9 Di de ta bazia di kuun, hën Jesosi piki de taa de an musu konda dee soni di de si da na wan sëmbë u te kuma di sëmbë di ko dë Libisëmbë Miii dëdë toona weki baka. 10 De bi du andi Jesosi bi piki de.* Ma de bi ta taki u di soni dë nöömö, u di de bi kë sabi andi a bi kë taki di a bi taa a o dëdë toona weki baka. 11 Hën de hakisi ën taa: „Faandi mbei dee sabima u Wëti ta taki taa Elia hën musu ko ufö di Keesitu?” 12 Hën a piki de taa: „Elia o ko tuu, nöö a o seeka hii soni ko bunu baka. Ma nöö faandi mbei a sikifi a Gadu Buku taa di sëmbë di ko dë Libisëmbë Miii musu tja sitaafu, söseei taa sëmbë o sösö ën? 13 Ma nöö mi taki da unu taa Elia ko kaa, hën de du ku ën kumafa de kë, leti kumafa a bi sikifi a Gadu Buku.”

14 Nöö hën de ko dou ka dee woto bakama bi dë, hën de si sömëni sëmbë lomboto de, nöö dee sabima u Wëti bi ta buja ku de. 15 Ma di dee sëmbë si Jesosi, hën de foondo, hën de kule go dëën odi. 16 Hën a hakisi de taa: „Faandi mbei un ta buja sö?” 17 Hën wan u dee sëmbë piki taa: „Mësitë o, mi tja di womi mii u mi ko a i u di wan taku soni dë nëën liba di ta mbei taa an sa fan. 18 Te a ta ko nëën liba, nöö a ta kisi ën ta tuwë a goon holou, nöö sukuma ta kumutu nëën buka fukuu, a ta tai tanda gingin, söseei a ta ko suwaki seei. Mi hakisi dee bakama fii u de jaka di taku soni puu nëën liba, ma de an bi sa.” 19 Hën Jesosi piki de taa: „Ee! Aai baa, faandi mbei wan ta biibi möönsö? Un longi mi musu dë ku unu aki ta hoi pasensi da unu? Un tja di mii ko a mi aki.” 20 Nöö hën de go tei di mii tja go dëën. Ma nöö di di taku soni si Jesosi, hën a kisi di mii tuwë a goon. Hën di mii ta logoda a goon, ta puu sukuma a buka seei. 21 Hën Jesosi hakisi di tata u di mii taa: „Un longi di soni dë ku ën kaa?” Hën a taa: „Sensi di a dë piki mii. 22 Sömëni pasi a ta naki ën tuwë a faja, nöö so juu a ta tuwëën a wata u kii ën. Wë ee i sa heepi u, nöö gaantangi mi begi i abi tjalihati fuu nöö i heepi u baa.” 23 Hën Jesosi piki ën taa: „Faandi mbei i ta taki ’ee i sa’? Wan sëmbë di abi biibi sa du hii soni.” 24 Wantewante dë di tata u di mii taa: „Mi a’ biibi e, ma nöö heepi mi ee ma a’ biibi tjika.”

25 Di Jesosi si taa sömëni sëmbë ta booko ta ko a de naandë, hën a bai di taku soni di bi dë a di mii liba taa: „Ju di soni di dë a di mii aki liba ta tapëën jesi ku hën buka, mi taa, hetji pasa kumutu disëën! Nöö na toona ko nëën nöiti möön!” 26 Nöö fa a bai ën dë kaa, hën di soni bai kai wolo, hën di mii ta seki ta du soni, hën di taku soni kumutu a di mii liba. Ma nöö di mii fika a goon piii, nöö hën dee sëmbë dee bi sai naandë taa: „Di mii dëdë e.” 27 Ma nöö hën Jesosi panjëën a maun, hën a heepi ën faa hopo taanpu. 28 Di a denda a wan wosu, hën dee bakama fëën kai ën ko a së, hën de hakisi ën taa: „Unfa a waka taa wa bi sa puu di taku soni a di mii liba?” 29 Hën a piki de taa: „Begi nöö sa heepi i puu dee lö taku soni aki a sëmbë liba.”

30 Nöö hën de kumutu naandë, hën de pasa a di pisiwata u Galilea. Ma Jesosi an bi kë u sëmbë sabi naasë a dë, 31 u di a bi kë lei dee bakama fëën soni. A bi ta piki de taa: „Wan daka de o buta di sëmbë di ko dë Libisëmbë Miii a dee felantima fëën maun, nöö de o kii ën. Ma hii fa de o kii ën, tökuseei a o toona weki baka a di u dii daka fëën.” 32 Ma nöö dee bakama fëën an bi fusutan di soni di a taki da de, ma de bi fëëë u hakisi ën tu.

33 Di de dou a Kapënaumi, hën de denda a wosu, hën Jesosi hakisi dee bakama fëën taa: „Fuun soni un bi ta fia ku unuseei di u bi dë a pasi?” 34 Ma de an piki ën, biga de bi ta fia ee undi u de dë möön hei möön dee woto. 35 Hën Jesosi sindo, hën a kai dee tuwalufu apösutu ko nëën, hën a piki de taa: „Ee wan sëmbë kë ko dë di fosuwan a unu mindi, nöö a musu ko dë di lasitiwan, söseei a musu ko dë kuma wan wookoma da unu.” 36 Hën Jesosi tei wan piki mii, hën a butëën faa taanpu a de mindi, hën a buta maun nëën ahömaun, hën a piki de taa: 37 „Di sëmbë di du bunu da sö wan mii u mi në hedi, nöö miseei wë a du bunu da e. Nöö di sëmbë di du bunu da mi, du bunu da di Sëmbë di manda mi ko tu.”

38 Johanisi piki Jesosi taa: „Mësitë o, u si wan sëmbë ta kai i në ta puu taku soni a sëmbë liba. U bi pooba u tapëën, biga an ta waka ku u.” 39 Hën Jesosi piki ën taa: „Wë an dë fuun tapëën e. U di na wan sëmbë di ta kai mi në u du foombo wooko, o bia kosi mi hesihesi. 40 Biga ee wan sëmbë an dë felantima fuu, nöö hën da u ku ën dë a wan së. 41 Nöö mi taki e, ee wan sëmbë da i so wata u bebe u di i dë bakama u Keesitu, nöö di sëmbë dë o feni gaan bunu. 42 Ma ee wan sëmbë mbei wan u dee pikiwan di ta biibi mi aki kumutu go disa di biibi, nöö a bi o möön bunu u de tei wan gaan gindi sitonu* tai nëën gangaa, nöö de tjëën go tuwë a di ze.

43 Ee maun fii ta mbei i du soni di sa puu i a Gadu pasi, nöö i musu koti ën puu tuwë. Biga a möön bëtë i lasi wan së maun fii ma i feni libi, ka u de vinde i go ku dee tu së maun fii tuu go a Gehëna,* di faja di an sa tapa möönsö. 44* —— 45 Nöö ee futu fii ta mbei i du soni di sa puu i a Gadu pasi, nöö i musu koti ën puu tuwë. Biga a möön bëtë i lasi wan së futu fii ma i feni libi, ka u de vinde i go ku dee tu së futu fii tuu go a Gehëna.* 46* —— 47 Ee wojo fii ta mbei i du soni di sa puu i a Gadu pasi, nöö i musu diki ën puu tuwë. Biga a möön bëtë i lasi wan së wojo fii ma i denda a di Tii u Gadu, ka u de vinde i go ku dee tu së wojo fii tuu go a Gehëna,* 48 di kamian ka bitju an ta dëdë, söseei ka faja an sa tapa möönsö.

49 De o tuwë faja a de liba kuma te sëmbë ta tuwë satu a njanjan. 50 Satu da wan bumbuu soni. Ma ee di satu lasi di tesi fëën, nöö andi i sa du u mbei a kisi di tesi fëën baka? Un musu dë kuma satu, nöö un musu ta libi fiifii ku unuseei.”