Dee soni dee Lukasi sikifi
22 Di daka bi zuntu u de hoi di piizii u di bëëë söndö sooda, di de bi ta kai di Pasika piizii. 2 Dee fesima u dee begima ku dee sabima u Wëti bi ta suku wan köni fasi nöömö u de sa feni Jesosi kii, biga de bi ta fëëë dee sëmbë u di köndë. 3 Hën Didibi go a di womi de kai Judasi Isikaliötu hati. Di womi aki bi dë wan u dee tuwalufu apösutu u Jesosi. 4 Hën a go a dee fesima u dee begima ku dee fesima u di Wosu u Gadu go fan ku de u de luku unfa a sa sei Jesosi da de. 5 Nöö hën de wai, hën de piki ën taa de o dëën soofu möni. 6 Nöö hën Judasi piki ku de. Hën a bigi ta suku fasi nöömö faa sei Jesosi söndö u sëmbë sabi.
7 Di daka u di piizii u bëëë söndö sooda dou ka de bi ta kii wan mbeti u de njan a di Pasika piizii. 8 Nöö hën Jesosi manda Petuisi ku Johanisi a soni. A taki da de taa: „Un go seeka soni fuu njan di Pasika.” 9 Hën de hakisi ën taa: „Naasë i kë fuu go seeka kamian fuu hoi di Pasika piizii?” 10 Hën a piki de taa: „Te un go a Jelusalën, nöö wan womi di ta tja wata a wan djogu o ko miti unu. Un faakëën go a di wosu ka a o denda go. 11 Nöö un piki di sëmbë di abi di wosu taa: ’Di Mësitë taki taa: „Na un kamba mi ku dee bakama u mi sa hoi di Pasika piizii?”’ 12 Nöö di womi dë o lei unu wan gaan kamba a di wosu a liba, nöö un seeka soni naandë.” 13 Hën de go, hën hii soni pasa leti kumafa Jesosi bi piki de, hën de seeka soni u de hoi di Pasika piizii.
14 Di di juu dou, hën a go sindo a tafa ta njan ku dee apösutu fëën. 15 Hën a piki de taa: „Mi bi ta hangi seei u mi njan di Pasika aki ku unu ufö di juu dou u mi tja sitaafu. 16 Biga ma o njan mën möön jeti, u te dee soni dee nama ku di Pasika aki tuu pasa a di Tii u Gadu.” 17 Nöö hën a tei wan kan, hën a da Gadu tangi te a kaba. Hën a taa: „Un tei ën nöö un tuu bebe lontu ko kai. 18 Ma mi taki e, ma o bebe di win aki möön u te di Tii u Gadu bigi tii.”
19 Hën a tei wan bëëë, hën a da Gadu tangi, hën a booko ën pisipisi, hën a da dee bakama fëën, hën a taa: „Di bëëë aki kë taki di sinkii u mi di mi o da fuunu hedi. Un musu ta du di soni aki nöömö, fuun ta mëni di dëdë di mi o dëdë da unu.” 20 Di de njan te de kaba, hën a du di wan seei soni ku di kan, hën a taa: „Di kan aki kë taki di njunjun buka di Gadu mbei ku libisëmbë ku di buuu u mi di o kai a goon fuunu hedi.
21 Ma un haika e! Di sëmbë di o sei mi dë a tafa ta njan ku mi aki. 22 Biga di sëmbë di ko dë Libisëmbë Miii o go disa unu, leti kumafa a bi sikifi a fesi kaa. Ma helu u di sëmbë di o sei di sëmbë di ko dë Libisëmbë Miii!” 23 Hën de bigi ta hakisi de na de ee undi u de bi o sa du sö wan soni.
24 Hën de kisi wan gaan toobi. De bi ta fia ee undi u de hei möön woto. 25 Hën Jesosi piki de taa: „Dee könu u dee woto köndë sëmbë ta duwengi dee sëmbë u di köndë, u de musu du dee soni di de kë, nöö sëmbë ta da dee heihei sëmbë apaiti në.* 26 Ma di lö libi naandë an musu dë a unu mindi e. Be di sëmbë di dë di möön heiwan fuunu ko dë kuma di möön pikiwan a unu mindi. Nöö be di sëmbë di ta tei fesi a unu mindi ko dë kuma wan wookoma a unu mindi. 27 Biga di sëmbë di ta sindo ta njan a tafa ku di sëmbë di ta buta njanjan a tafa, undi u de möön hei? Na di sëmbë ta sindo a tafa nö? Ma mim dë kuma di sëmbë di ta buta njanjan a tafa da wotowan.
28 Unu da dee sëmbë dee bi dë ku mi di fuka bi ta miti mi. 29 Wë mi mbei wan buka ku unu fuun feni wan Tii leti kumafa mi Tata mbei wan buka ku mi. 30 Mi mbei di buka aki ku unu sö taa un sa ta njan ta bebe a tafa a di Tii u mi, söseei fuun sa sindo a könu sutuu u kuutu dee tuwalufu lö u Isaëli.
31 Simön o! Haika e, Saatan buta taa a o seki unu leti kumafa wan sëmbë ta fon alisi ta böö puu kakisa. 32 Ma mi begi da i fu ja musu disa di biibi fii di i abi. Ma te i toona ko a mi baka, nöö i musu heepi dee baaa fii u de ko möön taanga a di biibi.” 33 Hën a taa: „Masa o! Fa mi dë aki, nöö mi dë kabakaba u mi go ku i a dunguwosu. Mi dë seei kabakaba u dëdë da i.” 34 Hën Jesosi piki ën taa: „Womi Petuisi, mi taki e, tide seei ufö wan ganian kanda joo fia dii pasi taa ja sabi mi.”
35 Hën a toona piki de taa: „Di mi bi manda unu go paaja di bunu buka söndö möni, söndö saku, söseei söndö susu, un bi ta pena u?” Nöö hën de taa: „Wë nönö!” 36 Hën Jesosi piki de taa: „Söö. Ma te woon go paaja di bunu buka möön, nöö ee wan sëmbë abi saku, nöö be a tjëën e. Ee wan sëmbë a’ möni, nöö be a tjëën. Nöö ee wan sëmbë aanbi ufangi, nöö be a sei di djakiti fëën nöö a bai ufangi. 37 Mi taki e, wan soni u mi dë sikifisikifi a di Wöutu u Gadu. A sikifi taa: ’De bi ta si ën kuma wan hogiduma.’ Nöö hii dee soni di di Wöutu u Gadu bi taki u mi, ta pasa tuu fa u dë aki e.” 38 Hën de piki ën taa: „Masa o, luku. U abi tu ufangi aki.” Hën a piki de taa: „A bunu, dee tu dë tjika.”
39 Di a nango, hën a go a di Olëifi Kuun kumafa a bi guwenti. Dee bakama fëën bi faakëën. 40 Di de dou ala, hën a piki de taa: „Un musu ta begi nöömö be na wan soni ganjan unu fuun go du soni di an bunu.” 41 Nöö hën a waka kumutu dë go a wan së. An bi go longi poi. Nöö hën a tjökö kini a goon dë begi Gadu. 42 A taa: „Taata o, di soni di i lai a di kan da mi u mi bebe aki, nöö mi begi i i puu ën dam’ baa. Ma nöö fa mi fan aki seei, na du di soni di mi kë e, ma be a pasa kumafa i kë.” 43 Baka di dë, hën wan basia u Gadu ko nëën ko dëën degihati. 44 Ma di soni ko hebi dëën tee an saanfa-u-du. Hën a bigi begi möön taanga, nöö hën di suwa fëën ko dë kuma buuu ta koti ta kai a goon. 45 Nöö di a kaba u begi, hën a hopo, hën a toona go a dee bakama fëën. Hën a si de tuu ta duumi. Biga de bi ta kusumi te na soni. 46 Hën a piki de taa: „Duumi un ta duumi sö nö? Wë un hopo, nöö un ta begi nöömö be na wan soni ganjan unu fuun go du soni di an bunu.”
47 Jesosi an bi kaba fan seei, hën Judasi, di bi dë wan u dee tuwalufu apösutu bi waka ko dou naandë ku wanlö gaan hia sëmbë. Nöö hën a waka ko zuntu ku Jesosi faa bosi ën. 48 Hën Jesosi piki ën taa: „Judasi, ku bosi i ta sei di sëmbë di ko dë Libisëmbë Miii nö?” 49 Di dee sëmbë dee bi dë makandi ku Jesosi si andi bi o pasa, hën de taa: „Masa o, u musu tei ufangi fuu feti ku de u?” 50 Hën wan u de hai di ufangi fëën valau, hën a koti di letisë jesi u di saafu u di gaan begima belim puu. 51 Hën Jesosi taa: „Womi, nönö. Na du sö.” Nöö hën a go panjan di jesi u di saafu, hën a kulëën. 52 Hën Jesosi piki dee fesima u dee begima ku dee fesima u di Wosu u Gadu ku dee gaanwomi dee ko dë taa: „Faandi mbei un ko a mi aki ku kodjo ku ufangi fuun ko kisi mi kuma mi da fufuuma? 53 Hiniwan daka mi bi ta dë a di Wosu u Gadu ta lei sëmbë soni, ma tökuseei wan bi kisi mi. Ma hii fasi, di juu fuunu hën dou, söseei di juu u dungu hën dou faa du hën wooko.”
54 Hën de kisi ën panjan, hën de tjëën go a di gaan begima pisi. Ma Petuisi bi ta waka sapisapi nango a de baka. Ma a bi dë seei te a longi. 55 De bi mbei wan gaan faja a mindi u di djai, nöö hia sëmbë bi sindo naandë, hën Petuisi seei ko sindo a dee sëmbë bandja tu. 56 Ma wan mujëë mii di bi dë wan saafu si Petuisi sindosindo ku dee wotowan, hën a luku ën diiin, hën a taa: „Di womi aki seei bi ta dë makandi ku ën.” 57 Ma a fia taa: „Ma sabi di womi dë e mujëë!” 58 An bi tei longi seei, hën wan woto sëmbë si ën, hën di sëmbë taa: „Iseei da wan u dee bakama fëën.” Ma Petuisi toona fia möön taa: „Womi, na tuu e.” 59 Baka wan juu longi sö, hën wan woto womi toona piki ën taa: „A musu u dë taa di womi aki bi ta dë makandi ku ën. Biga hën da wan Galilea sëmbë!” 60 Hën Petuisi taa: „Wë womi o, ma saandi i ta taki e.” An bi kaba u fan seei, hën wantewante dë wan ganian bai kanda. 61 Di juu dë, hën Jesosi bia luku ën diiin. Hën Petuisi ko pakisei di woto di Masa Jesosi bi taki dëën. A bi taa: „Tide seei ganian an o kanda bifö joo fia dii pasi taa ja sabi mi.” 62 Hën a kule go a döö go këë te a bigi.
63 Nöö hën dee womi dee bi kisi Jesosi bigi ta mbei ën fa, ta naki ën. 64 Hën de tapëën fesi ku wan koosu, hën de taa: „Ee i da wan tjabukama u Gadu tuutuu, nöö i piki u ambë naki i dë!” 65 De bi ta taki sömëni woto soni dëën u wisiwasi ën.
66 Nöö hën a di debooko fëën, hën dee gaanwomi tuu ko makandi. Dee fesima u dee begima ku dee sabima u Wëti tuu bi ko. Hën de tja Jesosi ko a di Gaan kuutuwosu u dee Dju. Hën de taa: 67 „Ee ju da di Keesitu, nöö i piki u.” Hën a piki de taa: „Ee mi piki unu seei, wan o kë biibi mi. 68 Nöö ee mi hakisi unu wan soni tu, nöö wan o piki mi. 69 Ma nöunöu, di sëmbë di ko dë Libisëmbë Miii o sindo a di letisë maun u di makiti Gadu.” 70 Nöö hën de tuu hakisi ën taa: „Wë womi, fa i fan dë, nöö i da di Womi Mii u Gadu nö?” Hën a taki da de taa: „A dë leti kumafa un taki dë.” 71 Hën de taa: „A dë fuu go suku kotoigi möön nö? Biga unu seei jei nëën seei buka andi a taki.”