Dee soni dee Maikusi sikifi

16 Nöö di di Saba daka pasa, hën Malia Magidala ku Malia di mama u Jakobosi, ku Salome go bai peipei sumëësuti soni u de go lobi a di dëdë sinkii u Jesosi. 2 A di fuuku mamate u di fosu daka u di wiki, hën de go dou a di geebi. Di pisiten dë sonu bi jabi kaa. 3 De bi ta hakisi deseei taa: „Ambë seei woo feni heepi u logoda di sitonu puu a di baaku buka?” 4 Di de hopo wojo luku go a di së u di geebi, hën de ko si taa di gaan gindi sitonu di bi dë a di baaku buka, dë te a wan së ala. 5 Di de denda go a di baaku, hën de si wan njönku kijoo dë sindosindo a letisë maun a di baaku dendu. A bi bisi wan weti djapona faan sö. Di dee mujëë si ën, hën de panta seei. 6 Hën di kijoo piki de taa: „Wan fëëë e. Mi sabi taa un ta suku Jesosi di womi u Nazalëti, di de bi peka a wan posu kii. A weki ko a libi baka. An dë aki. Un luku di kamian ka de bi butëën. 7 Un go, nöö un piki Petuisi ku dee woto bakama fëën taa: ’A dë a unu fesi nango a Galilea, nöö woon si ën ala, leti kumafa a bi piki unu.’” 8 Di de kumutu a di baaku ko a döö, hën de kule go. De bi fëëë seei, nöö de bi ta tëëmë. Di soni dë mbei de an piki na wan sëmbë andi bi pasa.*