Dee soni dee Maikusi sikifi
13 Di Jesosi bi ta kumutu a di Wosu u Gadu, hën wan u dee bakama fëën piki ën taa: „Mësitë o, luku fa di Wosu u Gadu waiti, nöö luku fa dee sitonu fëën bigi!” 2 Hën Jesosi piki ën taa: „I si di Wosu aki ö? Wan daka ta ko ka na wan u dee sitonu aki o fika woto a woto liba. De tuu de o booko tuwë a goon.”
3 Di a bi dë sindosindo a di Oleifi Kuun ta luku go a di së u di Wosu u Gadu, hën Petuisi, Jakobosi, Johanisi, ku Andiasi ko nëën, hën de hakisi ën taa: 4 „Na un ten dee soni aki o pasa? Nöö un maaka woo si di o lei u taa di ten u dë aki o kaba?” 5 Hën Jesosi bigi piki de taa: „Un köni be sëmbë an ganjan unu. 6 Sömëni sëmbë o ko, nöö de o taki taa: ’Mi da di Keesitu’, nöö de o feni sömëni sëmbë ganjan. 7 Söseei te un ta jei taa feti ta feti a peipei kamian, nöö wan musu panta e, biga dee soni aki musu pasa, ma nëën da di kaba dou jeti.
8 Di juu dë, nöö wan köndë o hopo go feti ku wan woto köndë, söseei wan könu o hopo go feti ku wan woto könu. Goon o ta seki, söseei kamian o ta bai ta latja a sömëni kamian. Söseei hangi pena o ko. Hii dee soni aki dë kuma di pen di wan mujëë ta fii te a o pai.
9 Un musu dë ku wojo e. Biga sëmbë o tjaa unu go a kuutu, söseei de o tjaa unu go wipi a dee wosu ka dee Dju nango dini Gadu. De o tjaa unu go a dee könu ku dee hedima u köndë, u mi në hedi. Nöö naandë woon feni pasi konda soni u mi da de. 10 Hii nasiön sëmbë u goonliba musu ko jei di bunu buka, nöö nëën ufö di kaba o dou. 11 Nöö te de o tjaa unu go a kuutu, nöö wan musu ta booko unu hedi ta hakisi unuseei ee andi woon taki e. Biga a di juu dë, di kaakiti u Gadu o mbei un sabi andi un musu taki. Nöö an o dë taa unu hën o fan di fan naandë e, ma di kaakiti u Gadu hën o heepi unu fuun sa fan. 12 Nöö wan baaa o tja hën baaa go sei u de tja go kii. Wan tata o tja hën mii go sei u de tja go kii. Söseei miii o hopo fia ku de mama ku de tata, nöö de o mbei sëmbë tja de go kii tu. 13 Sëmbë o buuse unu, u di un dë bakama u mi hedi. Ma di sëmbë di hoi dou te a di kaba, hën o feni libi.
14 Te un si di gaan hogi di ta poi soni ko dë taanputaanpu ka an musu taanpu, (be di sëmbë di ta lesi di soni aki buta pakisei nëën faa musu fusutëën bunu) nöö dee sëmbë dee ta libi a Judea musu bigi kule go a dee kuun. 15 Di sëmbë di dë a daki liba an musu saka ko a goon, nöö an musu go a wosu go tei lai tu. 16 Nöö di sëmbë di dë a goon dendu, an musu toona go a wosu go tei di djakiti fëën. 17 A o tjali möönsö da dee mujëë dee dë ku bëë ku dee dë ku miii a maun a di ten dë! 18 Un musu ta begi Gadu nöömö be an ko pasa taa un musu fusi a di kötö pisiten u di jaa. 19 Di ten dë o taanga seei. Sö wan gaan fuka an bi ko wan daka sensi di Gadu seti di goonliba te kisi di ten fuu aki, nöö an o pasa möön tu. 20 Ee Jehoufa* an bi o sati di ten u di gaan fuka dë, nöö na wan sëmbë bi o fika a libi. Ma a o sati di ten, u dee sëmbë dee a tei ko sëmbë fëën hedi.
21 Ee wan sëmbë ko piki unu taa: ’Un luku di Keesitu aki’, nasö ’un luku ën ala’, nöö wan musu biibi ën e. 22 Biga ganjanganjan Keesitu ku ganjanganjan tjabukama o ko dë di o du sömëni foombo soni u ganjan sëmbë. Ee a bi sa, nöö de bi o ganjan dee sëmbë dee Gadu tei ko sëmbë fëën tu. 23 Fëën mbei un musu ta mëni unuseei. Mi taki hii soni da unu a fesi kaa, nöö un musu ta köni e.
24 Baka di gaan fuka u di ten dë, nöö di sonu o ko dungu kankan, nöö di libawojo an o tuwë limbo möön tu. 25 Dee teeja o ta kai kumutu a liba ala, söseei hii soni u mundu ala o seki. 26 Nöö de o si di sëmbë di ko dë Libisëmbë Miii ta saka ta ko a dee bundji dendu ku gaan makiti ku hei. 27 A o manda dee basia u Gadu go a dee fö huku u goonliba u de go pii hii dee sëmbë dee Gadu kai tja ko buta a wan kamian. De o go a hii dee peipei kamian u goonliba ku liba ala tuu.
28 Un buta pakisei a di fuuta pau de kai figa. Te un si di pau dë ta buta njunjun uwii, nöö un ta sabi taa a deewei buka u dë. 29 Wë leti sö nöö, te un ta si dee soni dee mi taki da unu aki ta pasa, nöö un musu sabi taa di sëmbë di ko dë Libisëmbë Miii dë leti a dööbuka dë. 30 Mi taki da unu e, dee sëmbë u di ten aki an o dëdë ufö hii dee soni aki pasa. 31 Di goonliba ku di mundu o kaba a sösö, ma dee soni dee mi ta taki da unu aki an o lasi kaba a sösö möönsö.
32 Na wan sëmbë sabi di daka ku di juu di dee soni aki o pasa. Dee basia u Gadu a liba ala ku di Womi Mii seei an sabi ën. Ma di Tata wanwan nöö sabi ën. 33 Fëën mbei un musu ta dë kabakaba hiniwan ten, biga wan sabi di juu di Gadu buta. 34 A dë kuma wan womi di ta seeka faa go a woto köndë, nöö hën a kai dee saafu fëën hën a da de wooko u de du, hiniwan sëmbë ku ën wooko. Nöö hën a piki di sëmbë ta hoi wakiti a di dööbuka faa ta dë ku wojo. 35 Fëën mbei un musu ta dë seekaseeka hii juu, biga wan sabi na un ten di masa o toona ko. Ee a sapate buka, ee a gaan ndeti, ee a ganian kanda, nasö te kamian ta limbo. Wan sabi. 36 Na be a dë taa te a ko wan pasi vau sö, nöö i dë ta duumi. 37 Fa i si mi ta fan ku unu aki, nöö sö nöö mi ta fan ku hii sëmbë. Mi taki da unu e: Un musu ta dë seekaseeka hii juu.”