Dee soni dee Lukasi sikifi

11 Wan daka hën Jesosi bi dë a wan kamian ta begi. Di a begi te a kaba, hën wan u dee bakama fëën hakisi ën taa: „Masa o, lei u fa fuu begi baa, leti kumafa Johanisi lei dee bakama fëën.”

2 Hën a piki de taa: „Te woon begi, nöö un musu begi sö: ’Taata o, be di në fii ko dë limbolimbo te dou e. U ta begi i be i tii goonliba aki. 3 U ta begi i fii da u di soni u njan di u abi fanöudu da di daka u tide. 4 Nöö da u paadon u dee föutu fuu, biga useei ta da wotowan paadon u dee soni di de ta du ku u. Söseei heepi u be wa du soni di an bunu.’”

5 Hën a piki de taa: „Boo taa wan fuunu abi wan mati. Hën i go nëën a gaan ndeti, hën i hakisi ën taa: ’Mati o, da mi dii bëëë fii baa, 6 biga wan mati u mi kumutu a wan longi kamian ko a mi pisi, nöö ma abi na wan soni u dëën faa njan.’ 7 Ma di sëmbë a di wosu piki i taa: ’Na kaakei mi möön. Mi söötö döö go kandi kaa, nöö dee mii u mi ta duumi. Ma sa hopo go tei bëëë da i möön e.’ 8 Mi taki e, kandë an o jabi di döö da i u di un dë mati hedi. Ma u di i ta naki di döö fëën nöömö, mbei a musu u hopo da i di soni di i abi fanöudu. 9 Fëën mbei mi ta piki unu taa, un musu ta hakisi soni nöömö, nöö woon feni. Un musu ta suku nöömö, nöö woon feni. Un musu ta naki di döö nöömö, nöö de o jabi di döö da unu. 10 Biga di sëmbë di ta hakisi, ta feni. Di sëmbë di ta suku, ta feni. Nöö di sëmbë di ta naki di döö, hën de o jabi di döö da. 11 Wë undi fuunu o da di mii fëën wan sindeki ee a hakisi i wan fisi? 12 Nasö ee a hakisi i wan obo, joo langa wan kukutulabu dëën u? 13 Wë ee un dee sëmbë dee an ta libi bunu a Gadu wojo saanfa u da dee mii fuunu bumbuu soni, nöö un sa dë seiki taa di Tata fuunu di dë a liba ala seei o da sëmbë di kaakiti fëën te de hakisi ën!”

14 Bakaten, hën Jesosi puu wan taku soni a wan womi liba. Di soni bi ta mbei di womi an bi sa fan, ma di a puu ën, hën a ko ta fan, nöö dee sëmbë bi foondo seei. 15 Ma so u de bi taki taa: „Belisabo,* di tiima u dee taku soni hën ta da di womi aki kaakiti faa puu taku soni a sëmbë liba.” 16 Nöö wanlö wotowan bi kë poobëën. Fëën mbei de hakisi ën faa lei de wan maaka di ta lei taa Gadu hën mandëën ko. 17 U di Jesosi bi sabi andi de bi ta pakisei, mbei a piki de taa: „Ee dee sëmbë dee dë a wan tii basu ta feti ku de na de, nöö di tii dë o booko. Söseei ee sëmbë u wan wosudendu ta feti ku de na de, nöö di wosudendu dë o booko tu. 18 Wë nöö ee Saatan ta feti ku dee wotowan fëën, nöö di tii fëën an o kaba a sösö nö? Biga un ta taki taa Belisabo hën ta da mi kaakiti u mi puu taku soni a sëmbë liba. 19 Wë ee mi ta puu taku soni a sëmbë liba ku di kaakiti u Belisabo, nöö naambë dee bakama fuunu ta feni kaakiti u puu taku soni a sëmbë liba? Fëën mbei mi taki taa dee bakama fuunu seei o kuutu unu taa wan abi leti. 20 Ma ee hën a dë taa ku di kaakiti* u Gadu mi ta puu taku soni a sëmbë liba, nöö hën da di Tii u Gadu dou a unu kaa e. 21 Te wan taanga womi dë fëën seekaseeka ku ën fetilai ta luku ën wosu, nöö na wan sëmbë sa ko fufuu soni fëën tja go. 22 Ma te wan sëmbë di taanga möön hën ko feti wini ën, nöö a o tei hii dee fetilai fëën. Biga dee fetilai dë a bi ta mëni taa bi o heepi ën. Baka di dë, a o tei dee soni fëën tja go paati da wotowan. 23 Ee wan sëmbë ja dë ku mi a wan së, nöö hën da i dë felantima u mi. Ee ja ta wooko makandi ku mi u hai sëmbë ko a mi së, nöö hën da i ta jaka de.

24 Te wan taku soni kumutu a wan sëmbë liba, nöö a ta waka ta lontu a dee sabana ta suku kamian faa libi. Ma te an feni möönsö, nöö a ta taki taa: ’Mi o toona go baka a di wosu ka mi bi kumutu.’ 25 Te a toona go baka, nöö a ta si taa di wosu bai seeka ko dë limbolimbo gbegedee. 26 Nöö a nango kai seibi woto taku soni di hogi möön hënseei, nöö hii de tuu ta denda a di wosu, nöö de go libi dë. Nöö di sëmbë dë ta ko möön hogi möön fa a bi dë a fesi.”

27 Fa Jesosi ta fan dë, hën wan mujëë di bi dë a dee hia sëmbë dendu dë, hopo bai fan ku ën. A taa: „Di mujëë di pai i, söseei di da i bobi feni wan gaan bunu e!” 28 Ma Jesosi piki ën taa: „Nönö e. Dee sëmbë dee ta jei di Wöutu u Gadu ta piki hën buka, de feni wan gaan bunu!”

29 Di möön hia sëmbë bi ta booko go a Jesosi, hën a taa: „Dee sëmbë u di ten aki abi hogihati. De ta kë si foombo soni ufö de biibi. Ma de an o si na wan woto foombo soni möönsö, boiti di bi pasa ku Jona. 30 Wë biga leti kumafa Jona bi dë wan maaka da dee sëmbë u Ninifei, sö nöö di sëmbë di ko dë Libisëmbë Miii o dë wan maaka da dee sëmbë u di ten u dë aki tu. 31 Di mujëë könu u Seiba o weki ko a libi baka makandi ku dee sëmbë u di ten aki a di daka di Gadu o kuutu sëmbë. A o lei taa dee sëmbë u di ten aki an ta libi bunu, u di hën a bi kumutu te a longi ko haika fa Salumön köni tjika. Ma wan sëmbë di hei möön Salumön dë ku unu aki e. 32 Dee sëmbë u Ninifei o weki ko a libi baka makandi ku dee sëmbë u di ten aki a di daka di Gadu o kuutu sëmbë. De o lei taa dee sëmbë u di ten aki an ta libi bunu, u di de de bi bia de libi di de bi jei di bosikopu u Jona. Ma wan sëmbë di hei möön Jona dë ku unu aki e. 33 Te wan sëmbë sëndë wan faja, nöö an o tapëën ku wan manda, söseei an o tjëën go tjubi a wan kamian. Ma a o hopo ën buta a liba, sö taa hii sëmbë di ta denda a di wosu sa si soni ku di limbo di a ta tuwë. 34 Wojo fii dë kuma wan faja di ta tuwë limbo da i. Te wojo fii limbo, nöö hii i sinkii o limbo gbegedee. Ma ee wojo fii an ta si soni limbolimbo, nöö sinkii fii o dë a dungu piii. 35 Ma un musu ta köni taa di limbo di dë a unu an dë dungudungu. 36 Fëën mbei ee hii i sinkii tuu dë limbolimbo gbegedee, nöö na wan pisi fëën dë dungudungu, nöö a o dë kuma wan faja di ta tuwë limbo da i.”

37 Di Jesosi fan sö te a kaba, hën wan Faliseima kai ën faa ko njan nëën pisi. Hën a go ku ën, hën a sindo a tafa. 38 Ma a bi toobi di Faliseima di a si taa Jesosi an bi wasi maun* ufö a ko njan. 39 Hën Masa Jesosi piki ën taa: „Un dee Faliseima, un dë kuma kan ku paabi di dë limbolimbo a döösë, ma di dë sundjusundju a dendu. Un a’ langahati, söseei un a’ hogihati. 40 Unfa un du don sö? Wan sabi taa di sëmbë di mbei döösë nöö mbei dendu tu nö? 41 Te un ta du bunu da pootima, nöö un musu ta du ën ku hii unu hati. Te un ta du sö, nöö hii soni fuunu o dë limbolimbo gbegedee. 42 Mi bai helu da unu, un dee Faliseima. Biga un ta paati di uwii de kai menti, di uwii de kai winlutu,* söseei ku hiniwan woto uwii a teni pisi, nöö un ta da Gadu di u fëën pisi kumafa dee Wëti ta taki. Ma wan ta kuutu soni a wan leti fasi, söseei wan lobi Gadu! A bunu taa un ta da di u teni pisi u dee soni dee un abi, ma wan musu fëëkëtë dee möön fanöudu soni u dee Wëti. 43 Mi bai helu da unu, un dee Faliseima. Biga un lo’ u go sindo a dee möön bunu kamian a dee wosu ka dee Dju nango dini Gadu, söseei un lo’ te sëmbë ta da unu odi a wojowojo! 44 Mi bai helu da unu, biga un dë leti kuma dee geebi dee sëmbë an ta si sabi taa geebi hën sai dë. Nöö de ta waka pasa a de liba söndö u de sabi.”

45 Di Jesosi fan sö, hën wan u dee sëmbë di sabi dee Wëti bunu piki ën taa: „Mësitë o, fa i fan aki, nöö u i ta kosi tu o.” 46 Hën a taa: „Mi bai helu da unu tu, un dee sëmbë dee sabi dee Wëti bunu. Biga un ta mbei wëti di dë kuma gaan hebi lai da dee sëmbë u de tja, ma unuseei wan ta kë tja finga go nama a dee lai dë seei!

47 Mi bai helu da unu, biga un ta seeka dee geebi u dee tjabukama u Gadu, hii fa dee gaansëmbë fuunu hën kii de! 48 Un sabi bumbuu andi dee gaansëmbë fuunu bi du, ma tökuseei a kai ku unu. De bi kii dee tjabukama u Gadu, nöö unu wë ta seeka dee geebi u de. 49 Wë u di Gadu köni mbei a bi taki a fesi taa: ’Mi o manda tjabukama ku apösutu go a de, nöö de o kii so u de, nöö wotowan de o sitaafu. 50 Fëën mbei Gadu o kai dee sëmbë u di ten aki a kuutu, u dee tjabukama fëën di de bi kii sensi di goonliba seti. 51 Kumutu a Abëli te dou Sakalia di de bi kii a di Wosu u Gadu ku di begitafa mindi.’ Mi taki da unu e, taa Gadu o kai dee sëmbë u di ten aki a kuutu da hii dee soni aki.

52 Mi bai helu da unu, un dee sëmbë dee sabi dee Wëti bunu. Biga un tei di söötö di ta jabi di döö da sëmbë u de ko sabi soni u Gadu. Unuseei an denda go a dendu, nöö un ta tapa pasi da dee sëmbë dee ta mbei möiti u de go a dendu!”

53 Wë di Jesosi kumutu dë, hën dee sabima u Wëti ku dee Faliseima ko nëën liba ta hakisi ën sömëni soni. 54 Biga de bi kë faa misi buka taki wan soni u de sa feni föutu nëën.