Dee soni dee Lukasi sikifi

21 Di Jesosi hopo hedi luku, hën a si fa dee guduma ta buta möni a dee möni këdë. 2 Hën a si wan pooti mujëë di manu fëën bi dëdë ta buta tu piki sënsi* a wan u dee möni këdë. 3 Hën a taa: „Mi taki da unu e, di pooti mujëë di manu fëën dëdë aki buta möön hia möni möön hii dee woto sëmbë. 4 Biga hii dee woto sëmbë buta pikisö u di hia möni di de abi, ma hii fa di mujëë aki bi pooti, tökuseei a buta hii soni di a bi abi u sölugu hënseei.”

5 Bakaten, so sëmbë bi ta taki soni u di Wosu u Gadu. De bi ta taki fa dee sitonu fëën waiti tjika, söseei de bi ta taki u dee soni dee bi dë nëën dee sëmbë bi tja ko da Gadu. 6 Hën Jesosi taa: „Fa i si dee soni dë sai dë, wan ten o ko ka hii dee soni dee u ta si aki o booko kaba a sösö fiaa. Na wan u dee sitonu aki o fika woto a woto liba.” 7 Hën de hakisi ën taa: „Wë Mësitë o, na un ten dee soni aki o pasa? Nöö un maaka woo si di o lei u taa dee soni aki o pasa?” 8 Hën a piki de taa: „Un musu ta köni be sëmbë an feni unu ganjan e. Biga sömëni sëmbë o ko, nöö de o taki taa: ’Mi da di Keesitu’, nasö de o taa: ’Di juu dou.’ Wan musu waka a de baka e. 9 Söseei te un ta jei taa feti ta feti a peipei kamian, nöö wan musu panta e, biga dee soni aki musu pasa, ma nëën da di kaba dou jeti.”

10 Hën a piki de taa: „Wan köndë o hopo go feti ku wan woto köndë, söseei wan könu o hopo go feti ku wan woto könu. 11 Goon o ta seki, söseei kamian o ta bai ta latja a sömëni kamian. Hangi pena ku taku siki o ko dë a hii së. Sëmbë o ta si soni di o ta mbei de ta fëëë, söseei de o ta si gaangaan maaka a liba ala.

12 Ma ufö hii dee soni aki pasa, sëmbë o ta du ku unu. De o tja unu go a kuutu, söseei de o tja unu go söötö a dunguwosu. De o tja unu go a dee könu ku dee hedima u köndë, u mi në hedi. 13 Nöö naandë woon feni pasi konda soni u mi da de. 14 Fëën mbei wan musu ta booko unu hedi ta hakisi unuseei ee andi woon taki. 15 Biga mi o da unu köni fuun sabi fa fuun piki de, sö taa na wan u dee felantima fuunu o sa feni unu tai ku fan. 16 Unu mama ku unu tata ku dee baaa fuunu, ku dee famii fuunu ku dee mati fuunu tuu, o tja unu go a kuutu* u de musu sitaafu unu. Nöö sömëni fuunu de o kii. 17 Sëmbë o buuse unu, u di un dë bakama u mi hedi. 18 Ma wan o lasi na wan u dee hedi uwii fuunu. 19 Te un hoi dou, nöö woon feni libi.

20 Te un si taa sodati seti kampu lontu Jelusalën, nöö un musu sabi taa di ten dou u de booko ën puu. 21 Dee sëmbë dee ta libi a Judea musu bigi kule go a dee kuun. Dee sëmbë dee dë a köndë ganda musu kule kumutu dë, nöö dee sëmbë dee dë a goon dendu, an musu toona go a köndë ganda möön. 22 Biga a di daka dë Gadu o sitaafu sëmbë kumafa di Wöutu fëën bi taki a fesi. 23 A o tjali möönsö da dee mujëë dee dë ku bëë ku dee dë ku miii a maun a di ten dë! Biga wan gaan fuka o ko a di köndë. Gadu o sitaafu dee sëmbë u di köndë. 24 De o kii de ku ufangi, söseei de o kisi de tja go kuma sitaafuma a woto köndë. Nöö dee woto köndë sëmbë o makisa Jelusalën fiönfiön ku futu u te kuma di ten di Gadu bi buta da de pasa.

25 Söseei de o ta si gaangaan maaka a di sonu ku di libawojo, ku dee teeja tuu a liba ala. Nöö a goonliba aki, di ze o ta seki ta giinta tee hii sëmbë a dee köndëköndë o ta fëëë te de an o saandi de musu du. 26 Sëmbë o ta panta tee. De o si taa de dë a dëdë ku libi maun, u di de an saandi o pasa a goonliba. Biga hii soni u mundu ala o ta seki. 27 Nöö de o si di sëmbë di ko dë Libisëmbë Miii ta saka ta ko a dee bundji dendu ku gaan makiti ku hei. 28 Ma te un si dee soni dë bigi ta pasa, nöö un musu hopo hedi, nöö un taanpu tololoo. Biga di juu zuntu fuun ko fii.”

29 Hën a konda wan woto da de. A taa: „Un buta pakisei a di fuuta pau de kai figa ku hii dee woto pau. 30 Te un si de ta buta uwii, nöö un ta sabi taa a deewei buka u dë. 31 Wë leti sö nöö, te un ta si dee soni dee mi bi taki da unu aki ta pasa, nöö un musu sabi taa di Tii u Gadu dë leti a dööbuka dë. 32 Mi taki da unu e, dee sëmbë u di ten aki an o dëdë ufö hii dee soni aki pasa. 33 Di goonliba ku di mundu o kaba a sösö, ma dee soni dee mi ta taki da unu aki an o kaba a sösö möönsö.

34 Un mëni unu seei e, fu wan ta njan ta bebe pasa maaka, söseei fu wan ta booko unu hedi ku dee soni u di goonliba te nöö di daka kisi unu söndö fuun mëni. 35 Biga di daka dë o kai ko a hii sëmbë u di goonliba aki tuu liba kuma aviti. 36 Fëën mbei un musu dë ku wojo ta begi Gadu nöömö fuun sa pasa dee soni u taki aki, söseei fuun sa ko taanpu a di sëmbë di ko dë Libisëmbë Miii fesi.”

37 Te didia, nöö a bi ta lei sëmbë soni a di Wosu u Gadu, ma te ndeti nöö a bi nango duumi a di kuun de kai Olëifi Kuun. 38 Nöö te mamate fuukufuuku, nöö hii dee sëmbë bi ta ko a di Wosu u Gadu u de ko jei andi a o taki da de.