Dee soni dee Mateosi sikifi
16 Dee Faliseima ku dee Saduseima ko a Jesosi. U di de bi kë poobëën, mbei de hakisi ën faa lei de wan maaka di ta lei taa Gadu hën mandëën ko. 2 Hën Jesosi piki de taa: „Te sapate te un si taa dee bundji a liba ala dë bë njaan, nöö un ta taki taa ’amanjan sonu o hati’, 3 nöö te mamate te liba ala dë bë njaan, ma tjuba baaka ta ko, nöö un ta taki taa ’tjuba o kai tide’. Un sa’ u wegi dee maaka u liba ala, ma wan sa’ u wegi dee maaka u dee soni dee ta pasa a di ten aki. 4 Dee hogihati sëmbë u di ten aki dee an ta hoi deseei a Gadu ta kë si wan foombo soni ufö de biibi. Ma de an o si na wan woto foombo soni möönsö, boiti di bi pasa ku Jona.” Di a taki sö te a kaba, hën a waka go disa de.
5 Baka di dë, hën dee bakama u Jesosi subi a boto go a di woto së banda, ma de bi fëëkëtë u tja bëëë. 6 Hën Jesosi piki de taa: „Un mëni unuseei e, nöö un köni ku di sooda u dee Faliseima ku dee Saduseima.” 7 Hën de dë ta fan nango ta ko, ta taki taa: „A sa kan taa a ta taki di soni aki u di wa tja bëëë u?” 8 Di Jesosi jei de, hën a taki taa: „Unfa un sa mëni taa bëëë soni mi ta taki? Unfa biibi fuunu piki sö? 9 Wan fusutan andi mi kë taki nö? Un fëëkëtë dee feifi bëëë di dee 5000 womi bi njan u? Ku dee sömëni manda dee un bi lai ku dee bëëë dee bi fika u? 10 Söseei un fëëkëtë dee seibi bëëë di dee 4000 womi bi njan u? Ku dee sömëni gaan manda dee un bi lai ku dee bëëë dee bi fika u? 11 Unfa a waka taa wan fusutan taa na bëëë soni mi bi ta taki? Ma mi taki e, un musu mëni unuseei ku di sooda u dee Faliseima ku dee Saduseima.” 12 Awaa de ko fusutan taa na di sooda di de ta tei u mbei bëëë Jesosi bi ta taki, ma a bi ta taki u dee soni di dee Faliseima ku dee Saduseima bi ta lei sëmbë.
13 Di Jesosi dou a di pisiwata de kai Sesalia Filipi, hën a hakisi dee bakama fëën taa: „Andi un ta jei de ta taki u di sëmbë di ko dë Libisëmbë Miii?” 14 Hën de piki ën taa: „Wë u ta jei so sëmbë ta taki taa hën da Johanisi di Dopuma, so sëmbë ta taki taa hën da Elia, nöö wotowan ta taki taa hën da Jelemia, nasö wan u dee woto tjabukama.” 15 Hën a toona hakisi de taa: „Unu wë? Andi un ta pakisei u mi?” 16 Hën Simön Petuisi piki ën taa: „I da di Keesitu, di Womi Mii u di libilibi Gadu.” 17 Di Jesosi jei fa a fan dë, hën a taa: „Simön, ju di womi mii u Jonasi, i musu wai e! Biga di soni di i ko fusutan dë na libisëmbë hën lei i ën, ma mi Tata a liba ala hën mbei i ko fusutëën. 18 Nöö mi kë piki i tu taa: Ju da Petuisi,* nöö a di gaan sitonu aki liba mi o seti di kemeente u mi, nöö dëdë* seei an o sa wini ën möönsö. 19 Mi o da i dee söötö u di Tii u Gadu a liba ala. Nöö hiniwan soni di i tai a goonliba aki, o dë taitai a liba ala. Söseei hiniwan soni di i lusu a goonliba aki, o dë lusulusu a liba ala.” 20 Baka di dë, hën a piki dee bakama fëën u de an konda da na wan sëmbë taa hën da di Keesitu.
21 Sensi di ten dë, hën Jesosi bigi ta piki dee bakama fëën taa a musu go a Jelusalën, nöö dee gaanwomi ku dee fesima u dee begima, ku dee sabima u Wëti o du ku ën u te de kii ën. Nöö a di u dii daka a o toona weki ko a libi baka. 22 Di a taki sö, hën Petuisi kai ën tja go a së, hën a gandji dëën. A taa: „Masa, na taki dee lö soni dë e. Biga de an o sa pasa ku i seei, kwetikweti.” 23 Hën Jesosi bia gandji dëën taa: „Waka pasa kumutu a mi fesi dë, ju Saatan.* I dë kuma wan sitonu a pasi da mi u mi naki futu kai. Biga fa i fan dë, nöö na Gadu pakisei hën di dë e, ma libisëmbë pakisei hën di dë.”
24 Hën Jesosi piki dee bakama fëën taa: „Ee wan sëmbë kë waka a mi baka tuutuu, nöö a musu disa di soni di hënseei ta kë, nöö a musu tja di posu* fëën, nöö a musu ta waka a mi baka nöömö. 25 Biga di sëmbë di kë tjubi di libi fëën, o lasi ën. Ma di sëmbë di lasi hën libi fu di a dë bakama u mi hedi, o feni libi. 26 Un wini a abi da i ee i feni hii soni u di goonliba aki tuu, ma i lasi di libi fii? Nöö andi seei dë a goonliba aki waiti tjika fii tookëën ku di libi fii? 27 Biga wan daka, di sëmbë di ko dë Libisëmbë Miii o ko ku di gaan hei fëën Tata ku dee basia fëën. Nöö a o paka hiniwan sëmbë kumafa a bi libi a goonliba aki. 28 Mi taki da unu e, so fuunu di dë aki an o dëdë möönsö ufö un si di sëmbë di ko dë Libisëmbë Miii toona ko dou ku di Tii fëën.”