Dee soni dee Lukasi sikifi
9 Hën a kai dee tuwalufu apösutu fëën ko nëën, hën a da de makiti u de puu taku soni a sëmbë liba. Söseei a da de makiti u kula hii pei siki. 2 Hën a manda de u de go konda di buka u di Tii u Gadu da sëmbë, söseei u de kula sëmbë. 3 Hën a piki de taa: „Wan musu tja na wan soni te un nango. Wan musu tja kokoti a maun. Wan musu tja saku ku soni u njan a dendu. Wan musu tja bëëë, wan musu tja möni,* söseei wan musu tja woto soni u bisi boiti dee un bisi dë kaa. 4 Ma te un go a wan wosu, nöö a di wosu dë un musu tuwë lai, u te un kumutu a di köndë dë. 5 Nöö ee un go a wan kamian ka sëmbë an tei unu ku wai, nöö un musu kumutu dë. Te un nango, nöö un musu naki di sandu di dë a unu basufutu puu tuwë disa naandë u lei taa de an bi libi bunu ku unu.” 6 Hën de go a dee köndëköndë go paaja di bunu buka, söseei de kula sëmbë.
7 Di Könu Helodi* di ta tii di pisiwata u Galilea bi ko jei dee soni dee bi ta pasa, nöö a toobi ën te na soni, biga so sëmbë bi ta taki taa Johanisi di Dopuma hën bi toona weki ko a libi baka. 8 Ma so sëmbë bi ta taki taa Elia hën bi weki ko a libi baka, nöö wotowan bi ta taki taa wan u dee tjabukama fu awooten hën bi weki ko a libi baka. 9 Hën Könu Helodi taa: „Wë mi bi manda sëmbë u koti Johanisi hedi puu, nöö ambë da di sëmbë di mi ta jei soni fëën dë?” Nöö hën a ta mbei möiti nöömö faa musu si Jesosi.
10 Di dee apösutu toona ko, hën de ko piki Jesosi hii dee soni di de bi du. Hën a tei de, hën a tja de go a wan köndë de kai Bëtisaida, u de go dë de wanwan. 11 Ma di dee sëmbë jei di soni dë, hën de faakëën. Hën a tei de ku wai, hën a bigi ta konda soni u di Tii u Gadu da de. Söseei a kula dee sëmbë dee bi dë ku suwaki. 12 A di sapate buka, hën dee tuwalufu apösutu u Jesosi ko nëën, hën de piki ën taa: „Manda dee sëmbë go be de go bai soni u njan, söseei u de go suku kamian u duumi a dee köndë dee dë a zuntu. Biga teka u dë aki, u dë a wan longi kamian.” 13 Hën Jesosi piki de taa: „Un da de soni u njan.” Hën de piki ën taa: „Wa abi soni u njan aki möön leki feifi bëëë ku tu fisi. Naa i kë fuu go bai soni u njan da hii dee sëmbë aki.” 14 Söwan 5000 womi bi sai dë. Ma a piki dee bakama fëën taa: „Be de go sindo a kulupukulupu u 50 sëmbë.” 15 Nöö hën de seeka dee sëmbë buta u de sindo leti kumafa a bi piki de. 16 Hën a tei dee feifi bëëë ku dee tu fisi, hën a hopo wojo luku liba, hën a da Gadu tangi te a kaba. Nöö hën a booko dee bëëë, hën a da dee bakama fëën, hën dee bakama fëën paati de da dee sëmbë u de njan. 17 Hën dee sëmbë njan te bëë u de fuu, hën dee bakama fëën pii dee pisipisi bëëë dee bi fika, te de fuu dou tuwalufu manda.
18 Wan daka möön, hën Jesosi go dë a wan kamian hën wanwan ta begi. Hën dee bakama fëën ko nëën, hën a hakisi de taa: „Andi u mi un ta jei de ta taki?” 19 Hën de piki ën taa: „De ta taki taa i da Johanisi di Dopuma, so u de ta taki taa i da Elia, nöö wotowan ta taki taa i da wan u dee tjabukama fu awooten di weki ko a libi baka.” 20 Hën a toona hakisi de taa: „Nöö unu wë? Andi u mi un ta pakisei?” Hën Petuisi piki ën taa: „I da di Keesitu u Gadu.” 21 Hën a piki dee bakama fëën u de an konda di soni aki da na wan sëmbë. 22 Hën a taa: „Di sëmbë di ko dë Libisëmbë Miii musu tja hia sitaafu, nöö dee gaanwomi ku dee fesima u dee begima, ku dee sabima u Wëti o du ku ën u te de kii ën. Nöö a di u dii daka a o toona weki ko a libi baka.”
23 Hën a piki hii dee sëmbë dee bi sai dë taa: „Ee wan sëmbë kë waka a mi baka tuutuu, nöö a musu disa di soni di hënseei ta kë, nöö a musu tja di posu* fëën, nöö a musu ta waka a mi baka nöömö. 24 Biga di sëmbë di kë tjubi di libi fëën, o lasi ën. Ma di sëmbë di lasi hën libi u di a dë bakama u mi hedi, o feni libi. 25 Un wini a abi ee wan sëmbë feni hii soni u di goonliba aki tuu, ma hogi miti ën nasö a lasi di libi fëën? 26 Biga ee wan sëmbë sen ta kisi ën faa piki taa a nama ku mi, nasö ee sen ta kisi ën faa piki taa a ta biibi dee soni dee mi ta taki, nöö sen o kisi di sëmbë di ko dë Libisëmbë Miii tu te a o ko ku di gaan makiti fëën Tata ku dee basia u Gadu u piki taa di sëmbë dë da wan bakama fëën.” 27 Mi taki da unu e, so fuunu di dë aki an o dëdë ufö un si di Tii u Gadu.”
28 Baka söwan aiti daka di Jesosi taki dee soni aki, hën a tei Petuisi, Jakobosi ku Johanisi, hën de subi go a wan kuun liba u de go begi. 29 Nöö di a ta begi tee wan pisi, nöö hën fesi fëën ko tooka. Dee koosulai nëën sinkii tuu ko ta sëndë. De ko dë seei wetiweti faan. 30 Hën de si tu womi ko ta fan ku Jesosi. Dee tu womi aki bi dë Mosesi ku Elia. 31 Sinkii u de bi ta sëndë te na soni, nöö hën de bigi ta taki soni u di go di Jesosi bi o go. Di soni aki bi o pasa a Jelusalën. 32 Di juu dë, nöö Petuisi ku dee wotowan fëën bi ta duumi. Di de weki, hën de si Jesosi sinkii ta sëndë seei, söseei de si dee tu womi taanputaanpu nëën bandja. 33 Nöö hën di dee tu womi o toona go, hën Petuisi piki Jesosi taa: „Mësitë o, a bunu fa u ko aki e. Boo mbei dii tjëkëliba buta aki. Wan u fii, wan u Mosesi ku wan u Elia.” Ma fa Petuisi bi ta fan dë seei, an bi saandi a bi ta taki. 34 An bi kaba u fan seei, hën wan gaan bundji saka ko tapa de buuu, hën de ko ta fëëë te na soni. 35 Hën de jei wan töngö ta fan a di bundji dendu. A taa: „Di Womi Mii u mi hën disi, hën mi tei. Nöö hën fuun ta haika e.” 36 Nöö di de jei di fan, hën de ko si taa Jesosi wanwan tö nöö fika naandë. De an konda na wan u dee soni di de bi si da sëmbë u di ten dë möönsö.
37 Di debooko fëën, hën de kumutu a di kuun liba saka ko a goon, nöö hën wanlö gaan hia sëmbë ko miti ën. 38 Nöö hën wan womi dë a de dendu dë bai taa: „Mësitë, gaantangi, heepi mi ku di wan kodo womi mii u mi aki baa. 39 Wan taku soni ta ko nëën liba, nöö a ta bai ta ligei ta tëëmë, nöö sukuma ta kumutu nëën buka. Te a dëën makei ufö a ta kumutu nëën liba. 40 Mi begi dee bakama fii u de jaka di taku soni puu nëën liba, ma de an bi sa.” 41 Hën Jesosi taa: „Ee! Aai baa, un dee hogiduma u di ten aki. Faandi mbei wan ta biibi möönsö? Un longi mi musu dë ku unu aki ta hoi pasensi da unu? Tja di womi mii fii ko aki.” 42 Ma di di mii ta waka ta ko a Jesosi, hën di taku soni kisi di mii tuwë a goon, ta mbei a ta tëëmë ta ligei. Nöö hën Jesosi bai di taku soni be a kumutu a di mii liba, hën di mii ko bëtë. Hën Jesosi tei di mii hën a dëën tata. 43 Hën hii dee sëmbë foondo di de si fa Gadu abi makiti tjika.
A di pisiten di dee sëmbë ta foondo u dee soni di Jesosi bi ta du, hën a piki dee bakama fëën taa: 44 „Un haika e. Mi o taki wan soni da unu aki, nöö wan musu fëëkëtëën e. Wan daka de o buta di sëmbë di ko dë Libisëmbë Miii a dee felantima fëën maun.” 45 Ma nöö dee bakama fëën an bi fusutan di soni di a taki da de, biga a bi dë wan tjubitjubi soni da de. Ma de bi fëëë u hakisi ën andi di soni di a bi taki dë kë taki.
46 Hën wan gaan toobi hopo ko a dee bakama dendu. De bi ta fia ku deseei ee undi u de dë möön hei möön dee woto. 47 Jesosi bi sabi andi de bi ta pakisei. Fëën mbei a tei wan piki mii, hën a butëën faa taanpu nëën bandja, 48 hën a taa: „Di sëmbë di du bunu da sö wan mii u mi në hedi, nöö miseei wë a du bunu da e. Nöö di sëmbë di du bunu da mi, du bunu da di Sëmbë di manda mi ko tu. Di sëmbë di a’ sakafasi te a ta buta hënseei a hii dee wotowan fëën basu, nöö hën da di möön hei sëmbë.”
49 Hën Johanisi piki ën taa: „Mësitë o, u si wan sëmbë ta kai i në ta puu taku soni a sëmbë liba. U bi pooba u tapëën, biga an ta waka ku u.” 50 Hën Jesosi piki ën taa: „Wë an dë fuun tapëën e. Biga ee wan sëmbë an dë felantima fuunu, nöö hën da unu ku ën dë a wan së.”
51 Di di juu u Jesosi ko zuntu faa go a liba ala, hën a taa a musu u go a Jelusalën nöömö. 52 Hën a manda wantu u dee bakama fëën go a fesi u de go suku kamian u de duumi a pasi. Hën dee bakama go a wan u dee köndë u Samalia u seeka soni dëën. 53 Ma dee sëmbë u di köndë an bi kë hoi Jesosi ala, u di de bi ko sabi taa a bi kë go a Jelusalën nömönömö. 54 Nöö di Johanisi ku Jakobosi jei di soni, hën de hakisi Jesosi taa: „Masa o, ja kë fuu kai faja kumutu a liba ala ko kaba dee sëmbë dë a sösö u?” 55 Hën Jesosi bia luku de, hën a gandji da de. 56 Hën de go u de a wan woto köndë.
57 Di de dë a pasi nango, hën wan sëmbë piki Jesosi taa: „Mi o ta waka a i baka a hii kamian ka i nango.” 58 Ma Jesosi piki ën taa: „Dee matu dagu abi baaku ka de ta libi, nöö dee fou u liba ala abi wosu. Ma di sëmbë di ko dë Libisëmbë Miii, an abi kamian ka a ta duumi e.” 59 Hën Jesosi piki wan woto womi taa: „Ko dë bakama u mi.” Hën di womi piki ën taa: „Masa, dam’ pasi be mi bei mi tata ufö baa.” 60 Ma Jesosi piki ën taa: „Be dee dëdë sëmbë bei dee sëmbë u de dee dëdë. Ma ju i musu go paaja di buka u di Tii u Gadu a hii së.” 61 Nöö hën wan wotowan piki ën taa: „Mi o ko dë bakama fii. Ma da mi pasi u mi go da dee sëmbë u mi wosu adjoisi ufö.” 62 Hën Jesosi piki ën taa: „Ee wan sëmbë ta bia doti a wan goon, ma a ta bia luku dee soni dee dë nëën baka, nöö sö wan sëmbë an fiti u dë a di Tii u Gadu.”