Gaan langa womi a goonliba

ANDI i bi o pakisei ee wan sëmbë di langa kuma di tapatapa u di wosu fii ta waka ta ko miti i? Wë i bi o fëëë seei! Wan ten bi dë di dee lö gaan langa womi dë bi dë a goonliba. Di Bëibel ta lei u taa dee tata u de bi dë engel di bi kumutu a liba ala. Ma unfa sö wan soni bi kan?

Na fëëkëtë taa di hogi engel, Saatan, bi ta suku toobi ta pii woto a liba ala. A bi ta pooba seei u mbei dee engel u Gadu ko hogi. Bakaten so u dee engel dë bi bigi haika Saatan. De bi disa di wooko di Gadu bi da de u du nëën ala. Hën de ko a goonliba, hën de mbei libisëmbë sinkii da deseei. I sa’ faandi mbei ö?

Di Bëibel ta taki taa dee womi mii u Gadu bi si dee hanse mujëë a goonliba, nöö de bi kë libi ku de. Fëën mbei de bi ko a goonliba, hën de toou ku dee mujëë dë. Di Bëibel taki taa di soni dë an bunu, biga Gadu mbei dee engel u libi ku ën ala.

Di dee engel ku dee mujëë u de pai miii, nöö dee mii dë bi tooka seei u dee mii di libisëmbë ta pai. Bigibigi kandë ja bi sa si unfa de tooka. Ma möönmöön de bi ta ko bigi, de bi ta ko möön taanga u tee de toon gaan langa womi.

Dee langa womi dë bi hogi seei. U di de bi bigi nöö de bi taanga te na soni, mbei de bi ta du hogi ku sëmbë. De bi ta pooba u duwengi hii sëmbë u ko hogi kuma de.

Enöku bi dëdë kaa, ma wan womi bi dë a goonliba di bi dë wan bumbuu womi. Di womi dë de bi ta kai Noa. Hii juu a bi ta du andi Gadu bi kë taa a musu du.

Wan daka Gadu piki Noa taa di juu bi dou faa kii hii dee hogi sëmbë puu. Ma Gadu bi o tjubi Noa ku di wosudendu fëën ku sömëni u dee mbeti. Boo luku unfa Gadu bi du di soni dë.