De ta mbei wan gaan hei wosu

SÖMËNI jaa bi pasa. Dee womi mii u Noa pai gaan hia mii. Nöö dee mii dë seei ko bigi te pai möön hia mii tu. Te u kaba fëën sëmbë ko hia a goonliba.

Noa bi a’ hia bakamii. Wan u de de kai Nimloti. A bi dë wan hogihati höndima di bi ta kii mbeti ku libisëmbë tuu. Nimloti mbei ën seei toon könu tu faa sa tii woto sëmbë. Gadu an bi lobi Nimloti.

A di ten dë hii sëmbë bi ta fan wan kodo töngö nöö. Nimloti bi kë hoi hii sëmbë a wan kamian sö taa a bi sa tii a de liba. Nöö i saandi a du ö? A piki dee sëmbë u de mbei wan köndë ku wan gaan hei wosu nëën. Luku de a di peentje fa de ta mbei sitonu.

Jehovah Gadu an bi wai taa de bi ta mbei di wosu dë. Gadu bi kë taa sëmbë bi musu paaja go libi a hii së u di goonliba. Ma dee sëmbë bai taa: ’Un ko ooo! Un boo mbei wan köndë ku wan gaan hei wosu, di o hei dou tee a liba ala. Nöö në fuu o bai!’ Dee sëmbë bi kë gafa da deseei, ka u de gafa Gadu.

Fëën mbei Gadu tapa de u de an mbei di gaan wosu go dou. I sabi unfa a du di soni dë u? Wantewante a mbei dee sëmbë fan tookatooka töngö. Nöö de an bi ta fusutan deseei möön. Hën mbei de bi ta kai di köndë Babel nasö Babilon, di kë taki „Buuja”.

Sö wë dee sëmbë bi bigi foloisi kumutu a Babel. Dee sëmbë dee bi ta fan di wan seei töngö bi hai go libi makandi a wan woto së u di goonliba.