Di möön taanga womi

I SABI di në u di möön taanga womi di bi libi a goonliba u? Hën da wan kuutuma de kai Simison. Jehovah hën da Simison di kaakiti fëën. Ufö Simison mama pai ën Jehovah piki ën taa: ’Abiti möön joo pai wan womi mii. A o tei fesi u puu dee Isaëli sëmbë a dee Filisiti sëmbë basu.’

Dee Filisiti sëmbë dë hogihati sëmbë di ta libi a Kaana. De abi hia fetima, nöö de ta pena dee Isaëli sëmbë tuutuu. Wan daka di Simison dë a pasi nango teka dee Filisiti sëmbë ta libi, hën wan gaan lëun ta bai ta ko miti ën. Ma Simison kii di lëun ku hën maun wanwan. A kii höndöhöndö hogihati Filisiti sëmbë tu.

Bakaten Simison ko lobi wan mujëë de kai Delaila. Dee fesima u dee Filisiti sëmbë paamusi taa hiniwan u de o da Delaila 1100 pisi soofu möni ee a piki de unfa a du ko taa Simison taanga sö. Delaila kë hii di möni dë. An dë wan tuutuu mati u Simison ku dee sëmbë u Gadu. Fëën mbei a ta hakisi Simison nöömö unfa a du ko taa a taanga sö.

Te u kaba fëën Delaila kisi Simison taa a konda dëën faandi mbei a taanga sö. A piki ën taa: ’Uwii u mi an koti wan daka. Sensi di de pai mi, Gadu tei mi ko buta kuma wan apaiti futuboi fëën, wan Nasilei sëmbë. Ee de koti di uwii u mi, mi o lasi di kaakiti u mi.’

Wë di Delaila ko sabi di soni aki, a mbei Simison duumi nëën futuliba. Hën a kai wan womi ko a dendu ko koti Simison uwii . Di Simison weki, a lasi di kaakiti fëën. Baka di dë dee Filisiti sëmbë denda a di wosu, hën de kisi ën. De diki dee tu wojo fëën puu, hën de tei ën buta saafuma u de.

Wan daka dee Filisiti sëmbë ta hoi wan gaan piizii u de da de gadu Dagon. De puu Simison a dunguwosu u de tei ën buta fama. A di ten dë Simison uwii göö ko baka. Simison piki di piki womi mii di panjëën a maun ta tja taa: ’Be mi panjan dee posu dee ta hoi di wosu.’ Hën Simison begi Jehovah faa dëën kaakiti, hën a kisi dee posu hoi. A bai taanga taa: ’Be mi dëdë ku dee Filisiti sëmbë ooo.’ Dii dusu Filisiti sëmbë dë a di piizii. Di Simison tötö dee posu, hën di wosu kai holou kii dee hogihati sëmbë dë tuu fiaa.