Di mii Jesosi dë a di Wosu u Gadu

LUKU di piki womi mii di ta fan ku dee gaan womi aki. De da leima u di Wosu u Gadu a Jelusalen. Nöö di womi mii da Jesosi. A ko möön bigi. Aki a’ 12 jaa.

Dee leima ta foondo seei taa Jesosi sabi sömëni soni u Gadu ku dee soni dee sikifi a Bëibel. Ma faandi mbei Malia ku Josëfu an dë aki tu? Naasë de dë? Wë boo go luku.

Hiniwan jaa Josëfu ta tja dee sëmbë fëën go a Jelusalen u de go njan di gaan piizii de ta kai Pasika. A dë wan langa pasi kumutu a Nazalëti go dou Jelusalen. Na wan sëmbë a’ wagi, nöö talanwagi an dë tu. Dee soni dë an bi dë a di ten dë. Gaansë u dee sëmbë bi ta waka ku futu, nöö a bi ta tei söwan dii daka u dou Jelusalen.

Ma Josëfu ku ën mujëë pai hia mii. Hën da Jesosi bi a’ piki baaa ku sisa di ën mama ku ën tata bi musu luku. Wë di jaa aki Josëfu ku Malia tei pasi nango baka a de wosu a Nazalëti ku dee mii u de. De mëni taa Jesosi ta waka makandi ku dee wotowan. Ma di de tapa waka di daka dë, hën de an sa feni Jesosi. De suku ën a dee woto famii ku dee mati u de, ma an bi dë u feni! Fëën mbei de toona go suku ën a Jelusalen.

Te wan pisi, hën de feni Jesosi aki ku dee leima. A ta haika de, nöö a ta buta hakisi da de tu. Nöö hii dee sëmbë foondo taa Jesosi köni sö. Ma Malia taa: ’Di mii o, andi mbei i du sö ku u? Mi ku i tata ta booko hedi ta suku i.’

Hën Jesosi toona hakisi de taa: ’Wë andi mbei un ta suku mi sö? Wan sabi taa mi musu dë a mi Tata wosu nö?’

Awa, Jesosi bi lo’ u dë a kamian ka a sa lei soni u Gadu. Na sö u musu dë tu nö? Di de toona go a wosu a Nazalëti, nöö Jesosi bi nango hiniwan wiki a dee komakandi u dini Gadu. Fu di hii juu a bi ta buta mëni, mbei a lei sömëni soni u Bëibel. Boo dë kuma Jesosi, nöö boo waka nëën baka.