Di fasi fa Jesosi ta lei sëmbë soni

WAN daka Jesosi piki wan womi taa a musu lobi di wotowan fëën. Hën di womi hakisi Jesosi taa: ’Wë ambë da di wotowan u mi?’ Ma Jesosi saandi di womi ta pakisei. Di womi pakisei taa sëmbë u di lö fëën ku sëmbë di abi di biibi fëën nöö da wotowan fëën. Wë boo go luku andi Jesosi piki ën.

So juu Jesosi ta lei sëmbë soni ku wan woto di a ta konda. Nöö di soni dë a du aki tu. A konda wan woto u wan Dju ku wan Samalia womi. U bi lei kaa taa gaansë u dee Dju sëmbë an lobi Samalia sëmbë. Wë di woto aki Jesosi tei konda:

Wan daka wan Dju bi ta bazia wan kuun pasi nango fëën a Jelikou. Hën wanlö fufuuma ko kisi ën panjan. De tei hën möni, hën de fon mën te a fika piki a dëdë.

Bakaten wan begima u dee Dju ta waka pasa a di pasi liba. A si di womi de fon disa a goon dë. Andi i pakisei taa a du? Wë a koti lontu a woto së pasa go fëën. Baka u di dë, hën wan woto keikima ko ta pasa tu. A bi dë wan bakamii u Leifi. A heepi ën u? Nönö, a waka go fëën, an heepi di womi. Ja ta si di begima ku di bakamii u Leifi ta bazia nango ala u?

Ma luku ambë sai dë ku di womi di de fon. Wan Samalia womi wë e. A ta heepi di Dju. A ta lobi deesi a dee koti buka fëën. Baka di dë, a tei di Dju tja go a wan kamian ka a sa böö u te a kisi ënseei.

Baka di Jesosi kaba di woto fëën, hën a hakisi di womi di bi ko nëën taa: ’Undi u dee dii sëmbë naandë i pakisei taa libi ku di womi di de fon kuma di wotowan fëën di a lobi? Di begima, di bakamii u Leifi naa di Samalia womi?’

Hën di womi piki taa: ’Di Samalia womi. A bi a’ tjalihati u di womi di de bi fon.’

Hën Jesosi taa: ’Wë nöö i piki bunu. Nöö i go e, libi ku wotowan kumafa di womi dë libi dë.’

Ja lobi di fasi fa Jesosi ta lei sëmbë soni ö? U sa lei te a hia fanöudu soni te u ta haika andi Jesosi ta taki a di Bëibel, na sö nö?