Jesosi dë a di djai dendu

DI JESOSI ku dee apösutu fëën kumutu disa di kamba a liba, hën de go a di djai de kai Gëtiseimani. De bi go dë sömëni pasi a fesi kaa. Ma di pasi aki Jesosi ta piki de u de tan ku wojo ta begi. Hën a go a möön baka u di djai, go kai tapa fesi a goon ta begi.

Bakaten Jesosi toona ko baka ka dee apösutu fëën dë. Andi i mëni de ta du? De dë ta duumi! Dii pasi Jesosi piki de taa de musu dë ku wojo, ma hiniwan juu te a toona ko baka, a ta ko si de duumiduumi. Di lasiti pasi di Jesosi toona ko baka, a hakisi de taa: ’Womi, unfa un sa duumi a sö wan juu? Di juu kisi u de sei mi da dee felantima u mi.’

Fa i si a ta fan dë, hën de jei wanlö hia sëmbë ta ko. De ta ko ku feti ufangi ku kodjo! Nöö de tja falambo u tuwë limbo da de. Di de go dou zuntu, hën wan u de waka tololoo go a Jesosi. Hën a bosi ën, kumafa i ta si aki. Di sëmbë dë da Judasi Isikaliotu! Faandi mbei a bosi Jesosi?

Jesosi hakisi ën taa: ’Womi Judasi, ku wan bosi i ta sei mi nö?’ Awa, di bosi Judasi bosi Jesosi bi dë wan maaka. A sö wan fasi dee womi dee bi dë ku Judasi bi o sabi taa di womi dë da di Jesosi di de ta suku. Fëën mbei dee felantima u Jesosi waka go kisi ën panjan gbaa. Ma Petuisi an o taanpu luku fa de ta tja Jesosi go. A hai ën feti ufangi di a bi tja ku ën hën a hiti go a wan womi bi taanpu nëën bandja. Di ufangi misi di womi hedi, hën a koti di letisë jesi fëën belim puu. Ma Jesosi panjan di jesi u di womi, hën a kulëën.

Jesosi piki Petuisi taa: ’Toona tuusi di ufangi fii buta baka. Ja sabi taa mi sa hakisi mi Tata faa manda dusudusu basia fëën ko heepi mi ö?’ Aai, a sa du sö! Ma Jesosi an hakisi Gadu faa manda basia fëën ko heepi ën, biga a sabi taa di juu dou u dee felantima fëën ko kisi ën. Fëën mbei a disa dee womi be de tjëën go. Boo go luku andi pasa ku Jesosi.