Paulosu dë a Loomë

LUKU fa de bui Paulosu, nöö luku di Loomë sodati di ta watji ën. Paulosu dë a dunguwosu a Loomë. A ta wakiti u di Gaan Könu u Loomë taki andi de o du ku ën. Ma sëmbë sa go luku ën hii fa a dë a dunguwosu.

Dii daka baka di Paulosu dou a Loomë, hën a manda kai dee hedima u dee Dju u de ko luku ën. Fëën mbei sömëni Dju a Loomë go luku ën. Nöö Paulosu pleiki da de. A lei de soni u Jesosi ku di könuköndë u Gadu. So u de biibi, nöö de toon Keesitu sëmbë, ma wotowan an biibi.

Paulosu pleiki da peipei sodati di de bi buta u watji ën. A dee tu jaa di de hoi Paulosu a dunguwosu, a pleiki da hiniwan sëmbë di a feni. Te u kaba fëën dee sëmbë u di wosudendu u di Gaan Könu seei, jei di bunu buka u di Könuköndë, nöö so u de toon Keesitu sëmbë.

Ma ambë da di womi di sindo ta sikifi dë? I sa’ në fëën u? Aai, Timoteo wë. Timoteo seei bi dë a dunguwosu u di a bi ta pleiki u di Könuköndë u Gadu, ma de lusu ën baka. Nöö a ko aki u heepi Paulosu. I saandi Timoteo ta sikifi ö? Boo go luku.

I sa mëni dee köndë Filipi ku Efeise jeti ö, di u bi taki u de a Woto 110? Paulosu bi heepi u seti kemeente u Keesitu sëmbë a dee köndë dë. Nöö hii fa Paulosu dë a dunguwosu dë a ta sikifi biifi da dee Keesitu sëmbë u dee gemeente dë. Dee biifi dë dë a di Bëibel, nöö de ta kai de, biifi da dee Efeise sëmbë ku biifi da dee Filipi sëmbë. Konda wë Paulosu ta konda da Timoteo andi a musu sikifi da dee mati u de a Filipi.

Dee Filipi sëmbë libi bunu ku Paulosu seei. De manda wan soni dëën a dunguwosu, nöö Paulosu ta da de tangi. Epafodisi hën tja di soni go da Paulosu. Ma a ko siki seei, te a fika piki nöö a dëdë. Ma a ko bëtë baka, nöö a o toona go a wosu. A o tja dee biifi u Paulosu ku Timoteo te a o toona go a Filipi.

A dunguwosu dë Paulosu sikifi tu biifi jeti di dë a di Bëibel. Wan u de a sikifi da dee Keesitu sëmbë a Kolosën. I sa’ unfa de ta kai di biifi dë u? De ta kai ën di biifi da dee Kolosën sëmbë. Di woto biifi a sikifi da wan bumbuu mati fëën de kai Filemon di ta libi a Kolosën. Di biifi ta taki soni u wan futuboi u Filemon de kai Onësimusi.

Onësimusi bi fusi kumutu a Filemon wosu go a Loomë. Hën Onësimusi ko jei taa Paulosu dë a dunguwosu naandë. Hën wë a go luku Paulosu, nöö Paulosu pleiki dëën. Baka di dë Onësimusi toon wan biibima. Nöö tjali ko kisi ën taa a bi fusi go. Nöö i saandi Paulosu sikifi a di biifi di a manda da Filemon u?

Paulosu hakisi Filemon faa da Onësimusi paadon. Paulosu taa: ’Mi ta mandëën ko da i. Ma na futuboi fii nöö a dë nöunöu e. A toon wan bumbuu baaa fuu.’ Di Onësimusi nango baka a Kolosën, hën a tja dee tu biifi. A tja wan go da dee Kolosën sëmbë, nöö di wotowan a tja go da Filemon. Nöö pakisei fa Filemon wai seei di a jei taa di futuboi fëën toon wan biibima.

Paulosu bi a’ wan tu bunu njunsu u sikifi da dee Filipi sëmbë ku Filemon. A sikifi dee Filipi sëmbë taa: ’Mi ta manda Timoteo ko a unu. Ma bakaten mi seei o ko luku unu tu.’ Nöö a sikifi da Filemon taa: ’Seeka wan kamian a i wosu da mi u mi tan te mi ko ala.’

Di Paulosu kumutu a dunguwosu, a go a sömëni kamian go luku dee baaa ku sisa fëën a di biibi. Ma bakaten de buta Paulosu a dunguwosu baka a Loomë. Di pasi aki a sabi taa de o kii ën. Fëën mbei a sikifi Timoteo be a ko nëën hesihesi. Paulosu sikifi taa: ’Mi hoi mi seei a Gadu ku telu, nöö Gadu o paka mi.’ Wan tu jaa baka di de kii Paulosu, de booko Jelusalen kaba a sösö, ma di pasi aki dee Loomë sëmbë de du ën.

Ma möön soni dë a di Bëibel. Jehovah Gadu mbei di apösutu Johanisi sikifi di lasiti buku fëën, ku söseei di buku Akoalimbo. Di buku dë ta konda soni u di ten di ta ko. Boo go luku awaa andi o pasa a di ten di dë a u fesi.