WOTO 6
Di Paladëisi dë zuntu!
Dee hogi soni dee ta pasa nöunöu a goonliba ta lei u taa di Paladëisi dë zuntu. Di Bëibel bi taa u bi o ta si hogi soni ta pasa ufö di Paladëisi bi o dou. A sö wan ten u ta libi nöunöu! Woo taki u so u dee soni di Bëibel bi taki taa bi o pasa:
Gaan feti. ’Wan köndë o hopo go feti ku wan woto köndë, wan könuköndë o hopo go feti ku wan woto könuköndë’ (Mateosi 24:7). Di soni di bi taki a fesi aki pasa tuutuu. Sensi di jaa 1914, tu gaan feti pasa a goonliba, söseei woto pikipiki feti. Dee feti dë mbei taa milionmilion sëmbë dëdë.
Taku siki di ta kii hiahia sëmbë. ’Taku siki bi o dë a wan kamian go miti wan woto kamian’ (Lukasi 21:11). Di soni aki pasa tuutuu ö? Aai. Kankël, hatisiki, tuberculose, malalia, AIDS, ku woto taku siki, kii milionmilion sëmbë.
Hangi pena. A hii di goonliba sëmbë dë di na ta feni njanjan tjika de. Hiniwan jaa, milionmilion sëmbë ta dëdë u hangi hedi. Disi da wan woto maaka di ta lei u ta di Paladëisi o ko abiti möön. Di Bëibel taki taa: ’Njanjan o ko biti.’—Maikusi 13:8.
Goonliba o ta seki. ’A wan kamian go miti wan woto kamian . . . goonliba o ta seki, kamian o ta bai ta latja’ (Mateosi 24:7). Di soni aki seei pasa a di ten fuu aki. A pasa wan milijon sëmbë di dëdë sensi 1914, u di goonliba seki latja kamian.
Hogidu sëmbë. Sëmbë bi o abi ’langahati u möni’, de bi o ’lobi de seei nöö’. De bi o „lobi piizii möön Gadu”. Miii ’an o ta saka de seei a de mama ku de tata basu möön’ (2 Timoteo 3:1-5). Na dee lö sëmbë dë u ta si tide u? De an ta lesipeki Gadu, nöö de ta toobi dee sëmbë dee ta biinga u ko sabi Gadu.
Hogi libi. ’Möönmöön hogi libi’ bi o ko dë u si (Mateosi 24:12). Kandë i seei si taa di libi ko dë möön hogi möön dee jaa dee pasa. Kamian an dë nöunöu teka sëmbë an ta fufuu wotowan, ganjan wotowan tei soni u de, nasö du hogi ku wotowan.
Hii dee soni aki ta lei u taa Gadu Könuköndë dë zuntu. Di Bëibel taa: ’Wë nöö söseei tu, te un si taa hii dee soni aki ta pasa, nöö un musu sabi taa di könuköndë u Gadu zuntu e’ (Lukasi 21:31). Andi da di Könuköndë u Gadu? Hën da di tii u Gadu di dë a hemel. Hën o tja di Paladëisi ko a di goonliba aki. Di Könuköndë u Gadu o tei di tii puu a libisëmbë maun dendu.—Daniëli 2:44.