Ee i kë hoi wan mati, nöö i musu dë wan mati tu

Tuutuu mati lobi de seei. Möön i ko sabi soni u Jehovah, möön di lobi di i abi dëën o ko bigi. Te di lobi di i abi da Gadu ta ko möön bigi, nöö di fii di i abi u dini ën o ko möön bigi tu. Di soni aki o mbei taa i toon wan bakama u Jesosi Keesitu (Mateosi 28:19). Te i ko dini Gadu makandi ku dee Jehovah Kotoigi di dë wan piizii famii, nöö joo sa dë wan mati u Gadu u teego. Andi i musu du?

I musu da jesi a dee wëti u Gadu ee i kë söi taa i lobi ën. „Biga ee u lobi Masa Gadu tuu, nöö woo hoi dee wëti fëën dee a da u fuu hoi. Nöö dee wëti fëën an hebi da u poi.”​—1 Johanisi 5:3.

I musu du dee soni di i lei. Jesosi bi konda wan woto di ta söi faandi mbei i musu du sö. Wan gaan köni womi bi mbei di wosu fëën a wan goonsei di taanga gingin kuma sitonu. Ma nöö wan gaan don womi bi mbei di wosu fëën a sandu liba. Di wan gaan tjuba ku wan gaan ventu ko, hën wë di wosu di bi mbei a wan taanga goonsei, taanpu fëën gingin. Ma di wosu di bi mbei a sandu liba, booko kai djolou kaba a sösö fijaa. Jesosi bi taki taa dee sëmbë dee jei di lei fëën, nöö de tei ën, dë kuma di gaan köni womi di bi mbei di wosu fëën a wan taanga goonsei liba. Ma dee sëmbë dee jei di lei fëën ma de an tei ën, dë kuma di gaan don womi di bi mbei di wosu fëën a sandu liba. Kuma undi u dee womi dë i kë dë?​—Mateosi 7:24-27.

Piki Gadu taa i kë dini ën. Hën da joo begi Jehovah, nöö joo konda dëën taa i kë du dee soni dee a kë, u teego. Te i ta du dee soni di Gadu kë, nöö i ta söi taa i da wan bakama u Jesosi Keesitu.​—Mateosi 11:29.

Tei dopu. „Go tei dopu. Nöö wasi dee zöndu fii puu a i liba, u di i ta kai Jesosi në.”​—Tjabukama 22:16.

Dini Gadu ku hii i hati. „Hiniwan soni di woon ta du kaa, nöö un musu ta du ën ku hii unu hati. Na du ën kuma i ta wooko da libisëmbë, ma kuma i ta du ën da Jehovah.”​—Kolosën 3:23.